QUYEN LOI URANG BLEI BAO HIEM Y TE DI PASAK Y TE BAN SIT RACH GIA GAOK KLAK VAR

Urak ini, urang blei BHYT di pasak  y tế ban sit Rạch Giá, tỉnh Kiên Giang daok duh hatai, huac lac drei nao cap cuu atau ndih tapui langiu tukvak ngak bruk, harei padheih, harei roya. Kayua lac dom harei nan, Pasak y te ban sit kareik pambang, oh ngak bruk, oh hu thei piah vak harak ba tagok tuyen angaok. Bhapbini njauk nao tal labik y te karei, nan ye oh hu mbang tui  quyen loi di Bao hiem y te. Bruk ini rah tabiak dalam rilo thun, dom gah chuc nang di tinh Kien Giang yau So y te, Bao hiem xa hoi jeng thau, min bruk ini oh ka hu  sangka, langyah. Kadha vak di Lam Hieu – urang vak di rayo sap ndom Biet Nam daok di bhum taneran kraong Cuu Long brei thau ka bruk nan:
       Saai Nguyễn Thị Ngọc Thủy, ndih tapui thun 1981, blei BHYT saong tut angan iek ruak dahlau di pasak y te ban sit Rạch Giá. Puac thun 2013, saai Thủy pandik hatian, jaik si menek yau nan ye sang ba sa-ai tame pasak y te ban sit. Kayua harei nan lac harei thanecan, pasak oh ngak bruk, nan ye sang meng ba sa-ai nao tal sang iek ruak da khoa tinh Kien Giang. Pak ini, sang iek ruak oh brei ka sa-ai mbang bao hiem cap cuu bo njauk hu harak di pasak ba sa-ai tagok ini meng hu mbang 80% jien ndih iek ruak. Sang saai nduac trun nduac tagok piah likau harak di pasak min oh hu, kayua pasak oh ngak bruk, oh hu thei hu mbaok di pasak y te. Tuk mai sang, saai njauk kak jien ndih iek ruak jaik 1 trieu 800 rabau dong kayua nao suan tuyen. Saai Danh Chương, pasang di saai Thủy pandik hatai ndom lac :Dahlak sahaneng lac, dom urang ini ngak kan, urang hu bao hiem y te, hu chung minh nhan dan, oh nyim di thei, yau nan bo pandar urang nao likau harak gioi thieu, nduac trun nduac tagok bo harei nan lingik pandiak, nduac trun nduac tagok piah likau harak gioi thieu, meyah laik anek yau habal. Dahlak hu ndom lac, harei nan harei thanecan oh hu thei ngak bruk  ngak habal likau.  

Bác sỹ Phan Thị Mai Hoa, akaok khoa ndih tapui, sang iek ruak Đa khoa tỉnh Kiên Giang brei thau, dalam bruk ini sang iek ruak oh meda brei ka saai Thuy mbang tui bao hiem cap cuu kayua saai Thuy bahrau pacah ia un labaih sa tuk, oh daok dalam bruk hu mbang tui cap cuu tui quy dinh. Gah nguyen tac, drei tacei pato piah urang ruak pandar BHYT min ini oh njauk lac  urang cap cuu, pacah ia un bahrau  labaih sa tuk ye urang ruak ini njauk hu harak giới thiệu mai pak ini. Oh patuah ka saai ini, harei nan laik tame harei thanecan pasak oh ngak bruk, oh hu thei hu mbaok, oh likau hu harak. Bruk ini biak kan kandah ka kol dahlak, meyah brei ka sai Thuy hu mbang tui 80% ye  Bao hiem xa hoi oh bayar jien  ka kol dahlak. Ngan saong bac sy ye njauk ngak habal ka urang ruak hu siam mekre di  abih, min gaok tavak tavaiy praong di Bao hiem y te.

Hadei di tuk tabiak truh sang iek ruak, sang saai Thuy hu ngak harak payua ka bao hiem xa hoi ban sit piah ndok veik quyen loi di drei, min urak ini bruk nan daok hu jhul nao jhul mai di bao hiem xa hoi saong gah y te. Oh ta-eng hagait saai Ngoc Thuy bo tukvak tapa hu rilo urang tut angan iek ruak meng bao hiem di pasak y te ban sit Rach Gia gaok khat lahik kayua ruak laik tame harei oh ngak bruk. Bác sỹ Nguyễn Văn Tĩnh, akaok pasak y te ban sit ndom lac :  Tui dahlak, meyah quyen loi di dom urang nan oh hu khik caga ye co so y te saong bao hiem y te njauk daok la veik saong gauk piah langyah ka bhapbini. Drei njauk thau lac sarak bao hiem y te nan lac sarak an sinh xa hoi praong di Dang, karja. Meyah daok tavak tavaiy di labik halei njauk daok veik saong gauk piah langyah oh njauk lac bao hiem daok di nan tok thau pablei bao hiem, mek jien blaoh meng rilo jalan bao hiem caong bayar jien ka co so rilo. Njauk lac, gah co so y te iek ruak tapak, duh ka urang ruak, dom kadha hagait oh njauk hatai,  urang ruak tuh abih ka co so y te. Dom urang nan oh thau lac bao hiem kak mek jien ini..  

Tuk ba bruk ini tabiak tangi sua, ong Thái Văn Tính, Phó akaok Bảo hiểm xã hội tỉnh Kiên Giang ndom lac : Dom labik iek ruak oh hu menuac trực, caik ka urang ruak eng drei nao tapa tuyen ini lac bruk suan di gah y te. Mintri y te tacei lac dom co so iek ruak njauk khik kajap dom kadha, dahlau di abih lac co so vat chat, dua tra lac ginup pandap panda, anek menuac, trực ….dalam bruk ini, So y te Kien Giang njauk ramik veik bruk iek ruak.

Tal tukvak ini, pasak y te ban sit Rạch Giá jeng oh ka mbaoh tangin tame harak pambuak bruk pabak brei dom dich vu iek ruak saong bao hiem xa hoi tinh kayua 3 thun ini mai, bao hiem xa hoi tinh oh ka bayan jien ka pasak. Dalam tuk dua gah oh ka mbaoh tangin tame harak pambuak bruk ye bao hiem xa hoi jeng daok pablei bao hiem ka bhapbini mai iek ruak di pasak y te ban sit Rach Gia. Mboh lac, kayua makna hagait bo bao hiem xa hoi saong gah y te Kien Giang mek nao quyen loi di urang blei bao hiem y te di ban sit Rach Gia yau urak ini nan lac sa bruk ngak suan jalan ngak di Dang saong Karja ka bao hiem y te bhapbini; ngak pandik hatai bhapbini.  

Thúy Linh