Khan brei thau ka mikva bangsa takik thau cambaih dom kan kandah di jit HIV/AIDS

Tui PGS, TS Nguyễn Hoàng Long, akaok Cục pacang caga HIV/AIDS, jalan daok pamaong tal di Việt Nam abih jit HIV/AIDS di thun 2030 hu makna lac tal tukvak nan, jit AIDS oh daok lac sa bruk njauk huac di yaok urang, di rahra, nyu jeng sa janih ruak bhian gaok. Ong Long ndem lac: "khol drei thau hu cambaih dom urang njom trun daok ala sa ribau urang sa thun, manuac metai pambuak tal HIV/AIDS ala 1/100.000 urang ye khol drei hu iek lac abih jit AIDS".

Cục pacang caga HIV/AIDS brei thau: dalam labaih 10 thun tapa, Việt Nam gam gam mek hu klau trun, lac: Dom urang bahrau njom HIV, dom urang ruak salih tapa AIDS saong dom urang metai pambual tal HIV/AIDS. Dom urang njom HIV dalam rahra hu pacang ala 0,3%. Meng thun 2000 tal urak ni, Việt Nam hu caga ka labaih 500 ribau urang oh njauk njom mbak HIV saong 200 ribau urang oh metai kayua AIDS.

Ndem tal prein taong ruak, di Việt Nam, bruk iek ruak meng jru ARV daok peih praong, prein taong ruak siam. Urak ni hu labaih 153 ribau urang ruak daok taong ruak meng ARV, dom urang ngak tui 12 bilan hu 88%. Taong ruak njiel dom janih phiel daok hu khik saong salih bahrau. Urak ni hu labaih 52 ribau urang ruak daok taong ruak meng methadone yaok harei, hu siam lagaih glaong. Taong ruak caga dahlau phơi nhiễm (PrEP) hu peih ngak siam ngan saong labaih 12 ribau urang daok pandar PrEP.

Abih di nyu nan lac, thun blaoh Việt Nam salih hu siam bruk taong ruak ARV meng bruk daong di negar lingiu tapa BHYT. Urak ni hu jaik 50 ribau urang ruak daok taduan jru ARV tapa BHYT. Urang hu HIV manyum jru ARV yaok harei tui tacei pato di bác sĩ tal tuk halei mek hu saong khik hu tải lượng virus oh duah mboh, oh mbuan mbak ruak ka urang karei tapa jalan likei kumei mbang ndih haong gauk. Bruk manyum jru aval, menyum gam gam saong ngak njauk, ngak catang dom jalan taong ruak jeng hu daong ka urang njom HIV patrun bruk mbuan metai kayua dom ruak laka.

Min, di Việt Nam, tui kuhria thun 2020, dom urang njom HIV/AIDS daok diuk lac jaik 230 ribau urang, dang ka 4 dut saong dom negar dalam bhum Đông Nam Á. Dom urang njom daok tagok glaong, njauk hu sangka, taong ruak gam gam, luac rai. Yaok thun jeng daok hu 10 ribau urang njom HIV bahrau; hu 2.000 - 3.000 urang metai kayua HIV/AIDS, ngak kan kandah praong tal prein yava, kinh tế - xã hội.

Urak ni, jalan njom mbak ruak HIV hu salih karei, hu dom bruk mbuan njom mbak glaong HIV bahrau. Dom urang likei mbang ndih haong gauk yau diuk pasang (MSM) hu khan lac sa dalam dom urang mbuan mbuan njom glaong abih di jit HIV di Việt Nam. Atah di ni 7 thun, dom urang ini bahrau hu 4% dương tính saong HIV ye urak ni tagok labaih 10-12%, hu labik tagok tal 15%.

Dalam nan, dom urang dương tính bahrau dalam sa thun biak glaong. Nan lac sa bruk brei thau dahlau lac jit tagok biak samar drah di dom urang likei mbang ndih haong gauk yau diuk pasang. Bruk taom gaok jaik haong HIV dalam dom urang MSM, urang chuyển giới piah ba tame taong ruak ARV samar drah jeng lac sa bruk kan kandah. Taphia di nan, dom urang ruak hu dut iek meng BHYT daok bier. Kan kandah dalam bruk pajeng ba mẫu saong bruk bayar jien jeng daok lac sa paga pacang dalam bruk dut iek meng jien BHYT. Bruk paok jien daong meng negar lingiu cakak trun, urang hu ilamo pacang caga HIV/AIDS trun rilo jeng ngak kan kandah tal bruk pacang caga jit HIV/AIDS di Việt Nam. 

Kayua yau nan ye, tui Cục Pacang caga HIV-AIDS, dom thun tal, Việt Nam njauk patui jalan peih praong brei ka urang njom HIV hu iek ruak meng jru ARV aval, peih praong bruk iek ruak HIV/AIDS; pasiam di abih jalan iek ruak meng ARV tui panuac kakei di WHO. Saong brei ngak ka urang thau rilo jang ka bruk njom mbak HIV di dom urang MSM, chuyển giới hu iek ruak meng jru ARV aval, patagok pasang iek HIV pacang jru saong parilo janih iek ruak pacang caga dahlau di tuk njom mbak./.

Urang lang: Thu Thảo – 01/12