Ông Vừ Gà Lử, sa-ai likei di anh hung liệt sỹ Vừ A Dính thun ini umo 95 thun, pren yava oh khang kajap yau dahlau daih, min ong jeng daok hadar, kanal ralo bruk ka rai diuk di bhap bini labik ini dom thun hadei cách mạng bilan 8. Harei nan, kol prang biak jhak, kol nyu kateik greik, neh rabha bangsa, meblah drap ar di bhap bini. Pang tui panuac Wa Hồ, bhap bini Pú Nhung sa hatai tui Đảng, jia tame jalan ngak, sarak jum pataom bangsa di đảng ba gauk taong pateok kol khamang meblah taneh ia. tuk taneh ia hu sron mbon, rai diuk di bhap bini gaok ralo kan kandah, ralo meng lac tự cung, tự cấp, min ala bruk pan akaok di đảng, bruk đầu tư di karja gam saong bruk kham merat yam tagok di bhap bini, pú Nhung urak ini hu ralo salih barau. Ong Lử brei thau:

 “Dahlau daih bhap bini Pú Nhung rambah lo, min urak ini hu salih karei ye, oh daok iek lipa, anek bhik hu nao bac, karja sangka buh jien padang ngak sang bac, jalan mbak nao mai, daong pajaih phun pal aka bhap bini tra. Umo glaong, pren yava oh daok khang kajap, maong mboh puk palei hu salih barau yau harei ini, taha ini bui sambai chreih chrai lo”.

Ngak tui bruk salih barau taneh ia, gam saong bruk sangka buh jien tame dom danak dak dự án di karja, bhap bini xã Pú Nhung kham merat ngak mbang pala drak, pasiam hamu bậc thang, ba dom janih pajaih phun pala, athur raong tame thâm canh tang vụ piah patagok năng suất, oh lac khik kajap an ninh lương thực di labik bo daok ngak tabiak pandap pablei ka darak pasar, patagok jien mek tame ka baoh sang. Nan ye, meng labik eik lipa gam gam, urak ini abih tih sản lượng lương thực mek hu labaih 2.700 tấn sa thun, lương thực akaok menuac hu jaik 430 kg sa thun, baoh sang kan kathaot daok labaih 10% min. Ong Sùng Dũng Thào, bản Khó Bua, xã Pú Nhung, huyện Tuần Giáo brei thau:

 “Dahlau daih, sang gaok rilo kan kandah, abih di nyu nan lac dalam bruk ngak mbang, oh ka thau jalan ngak mbang nan ye rambah lo. Bloh hu đảng, karja tacei jalan ye hu dom pajaih barau ini, dahlau daih tok pala phun angaok thu urak ini hu salih pajaih, mùa vụ, ngak hamu, rai diuk urak ini jeng hu salih barau duk saong dahlau daih”.

Rai diuk di bhap bini dak harei dak hu patagok, mbaok meta palei pala anh hung liệt sỹ Vừ A Dính dak harei dak hadah hadai, kayua cơ sở hạ tầng: điện, jalan mbak, sang bac, balai iek ruak hu buh jien tame ngak siam mekre, khang kajap. Rai diuk ilamu, mbang ngui daok dang di bhap bini jeng dak harei dak patagok; dom yaom glaong ilamu meng kan di bhap bini bangsa hu khik ramik saong patagok; an ninh chính trị, trật tự an toàn XH hu khik kajap. Jaik 90% dom baoh sang sang mek hu angan baoh sang ilamu, xã jeng ngak hu salah bloh 6/19 tiêu chí padang ngak palei pala barau. Ong Vừ Sái Sùng, Bí thư, akaok Uỷ ban bhap bini xã Pú Nhung, huyện Tuần Giáo - Điện Biên brei thau:

“Dalam dom thun tapa, đảng ủy hu tabiak sarak salih jalan ngak mbang kinh tế, pandar dom tiến bộ ilamu kỹ thuật tame bruk pala drak, abih di nyu nan lac pajaih barau hu năng suất glaong saong pandar dom kỹ thuật yau pandar khak drak cân đối, pandar jru khik caga phun pala, pandar abih dom taneh daok hu piah pala drak, abih di nyu nan lac dom taneh bo pala drak hu dua vụ”.

Angaok bhum taneh Pú Nhung harei ini, yaok bhap bini daok ngak tui  jalan di anh hung liệt sỹ Vừ A Dính, kham merat pakacah gauk ngak mbang pala drak, patagok kinh tế, daong ngak ka puk, palei dak harei dak patagok, njauk saong bhum taneh hu ilamu cách mạng./.