Urang hu klauk ginup vaccine brei tame sieu thi

Hadei di tukvak suai lavik daok dalam sang kayua pa-atah di gauk, dom harei tapa, muk Trần Thu Lan, daok di phường Tân Phú, Quận 7, TP.HCM saong rilo bhap bini meda tabiak Mblang bein Hồ Bán Nguyệt tuk biar harei piah pasram rup pabhap. Hu nduac takai dalam mblang bein muk saong urang dalam sang mboh chreih chrai, prein yawa khang kadang. Quận 7 brei nao kabak, pasram rup pabhap, me-in the thao di langiu pak dua mblang bein, 5 mblang taong tenis dalam quận, pachreih rahra pasram rup pabhap di dom labik khik hu siam mekre salamat. Muk Trần Thu Lan lac:

  “Hu tabiak mblang bein pasram yau ini mikva bui sambai lo, abih di nyu lac dom urang umo taha, nao pasram min dahlak khik rup lo, pacang caga ginup abih, caong khin jit ruak samar tapa piah raidiuk mikva hu tani tanat.”

Bruk brei peih gilac veik dom bruk pasram rup pabhap, me-in the thao brei mboh lac radiuk daok hu siam mekre veik. Anak meta, Quận 7 brei ngak iek ka bhap bini dua phường Tân Phong saong Tân Phú hu pasram tui mon ba tabiak meng ini tal harei 30/9. Hadei di nan, tui bruk rah tabiak meda brei peih veik dom bruk ngak mbang praong jang. Dahlau di nan, Q7 jeng hu ngak iek peih gilac veik bruk ngak mbang pablei salih, pablei pandap mbang ba nao sang ka 151 labik, doanh nghiệp; brei harak ka bhap bini nao blei pandap di dom sieu thi… Ong Trần Chí Dũng, Phó Bí thư Thường trực Quận ủy Quận 7 brei thau:

 “Lac labik ngak iek, Q7 hu bruk sangka di Thành ủy, Ủy ban bhap bini Ban raya bhian tacei pato jalan ngak saong dong. Meng hatai caong di urang pan akaok Ban raya, khol dahlak jeng mboh brei hu trách nhiệm jang dalam bruk ba tabiak jalan langyah piah ngak habar gam ngak iek hu jayak gam khik hu bruk pacang caga jit.”

Di huyện Củ Chi, tal urak ini, bruk pacang caga jit Covid-19 di quận jeng daok khik hu siam. Huyen hu veik xã Tân Phú Trung lac xã jaik hijao hu jeng xã bhum hijao, patagok abih tih labik hijao di huyen lac 16 dalam 21 xã, ban sit saong hu 18 xã hu mai veik siam mekre bahrau. Rilo doanh nghiep, labik pablei salih di Củ Chi sumu ngak tui jalan “3 di labik” atau “sa jalan nao, 2 labik tal”. Dom bruk siam tagok nan ngak brei bhap bini biak bui sambai. Sa-ai Nguyễn Văn Quan, bhap bini xã Tân An Hội brei thau:

 “Dahlak mboh bhap bini tabiak jalan ralo jang. Ralo meng lac urang nao darak, nao klauk vaccine, nao hamu…Raidiuk chreih chrai rilo jang. Bhap bini biak bui sambai min oh sahaneng iek biar”.

Dalam tuk ngak iek, huyen pulao Cần Giờ jeng hu peih veik rilo bruk ngak, dalam nan hu bruk peih ngak dom tuor dulich sinh thái. Tal urak ini, bhap bini umo meng 18 thun tagok  di Cần Giờ hu klauk vaccine mbang sa hu labaih 99%, daok veik oh hu mbaok di huyen. Bruk daok pamaong ngak lac tal harei 15/10, huyen klauk hu taong abih mbang 2, oh lac urang dalam huyen atau labik karei mai. Bí thư Huyện ủy Cần Giờ Lê Minh Dũng lac:

  “Ngak tui tacei pato di Ban raya, khol dahlak brei nao darak, bruk pablei salih hu tut angan; taong chap kaya ikan dalam ia…Dom bruk ngak brei khik hu  salamat ye huyen meng brei ngak.”

Hadei di jaik 2 adit  peih ngak bhum hijao salamat, rilo bruk duh ka raidiuk bhap bini hu peih gilac veik,  khik caga salamat, tani tanat di klau labik  ngak iek lac Quận 7, huyện Cần Giờ saong huyện Củ Chi. Meng nan, langyah hu rilo bruk an sinh, pabak hu hatai caong di bhap bini dom quan, huyen jeng yau bhap bini Ban raya HCM ka raidiuk siam mekre sron  mbon meda samar  mai veik./.

Urang lang: Ai Nghiem - 29/9/2021