Urang nong hu tabiak mblang di drei pala drak 

Palei Bầu saong palei Ly, xã Ea Trol, huyện Sông Hinh hu labaih 1.500 urang. Puac bilan 6/2021, 2 palei jaikm taphia gauk ini, lac labik “pandiak” di jit ruak ngan haong 22 urang njauk ruak Covid-19, jaik 200 urang brei nao daok karei pataom sa labik, pacang veik labik daok di bol bhap rahra labaih 22 harei. Jit ruak tamuh khang di dom palei di bhap bani Ê Đê nan ye bruk pacang jit tuk akaok mereip gaok biak rilo kan kandah ka bol bhap saong ka karja palei. Huyện Sông Hinh samar brei pacang veik labik, mek mẫu dut iek peih prong piah ba F0 tabiak truh rah ra, samar pacang cakak jit. Tal jurak ini, huyện pacang hu jit ruak saong bhap bani hu mai veik rai diuk siam mekre bahrau.

Lac sa dalam 20 urang di palei Ly, xã Ea Trol dahlau daih njauk ruak Covid-19 nan ye sa-ai Ksor Y Phú (umo 41 thun) thau cambaih dom huac kanda di manuac sia tuk njauk jit ruak. Sa-ai Ksor Y Phú khan lac, 23 harei daok dalam sang iek ruak nan lac tukvak sa-ai oh van hu. Tuk hu mai sang veik, sa-ai kham merat pathau khan, jak ba mikva dalam palei, gauk gar manuac urang dalam sang paglaong hatai saneng, pacang caga jit ruak. Sa-ai Ksor Y Phú brei thau, bhap bani Ê Đê bhian randap haong bruk pataom gauk ndom glai, mbang menyum, hu bruk hagait jeng daong gauk, urak ini manuac sia dalam palei njauk salih bruk bhian randap nan piah pacang caga jit:

“Dahlau diah daok pataom gauk mbang menyum. Meng harei brei daok karei mai sang jeng oh daok pataom gauk mbang menyum, sang thei thei daok. Jit ruak urak ini oh daok pataom gauk piah ndom glai, mbang menyum. Pathau khan brei ka mikva thau jit ruak nan lac oh pataom gauk meng 5 tal 10 urang.”

Oh lac ta-eng sa-ai Ksor Y Phú bo yaok pluh urang karei di bhum urang bangsa takik Ea Trol dahlau daih lac F0 taong abih ruak jeng abih hatai pathau khan bruk pacang caga jit ruak ka bhap bani drei. Sa-ai Hoàng Thị Quyên, daok di palei Ly, xã Ea Trol saong anek kamei dahlau daih njauk Covid-19. Hu taong abih ruak, mai veik haong puk palei, sa-ai Quyên jak ba mikva tuk nao sai padai njauk ngak tui 5 paka di Mentri Y tế:

“Drei njauk ruak nan ye brei daok karei plaih taom gaok manuac urang. Min oh plaih hu abih, kayua hu manuac urang ba padai mai sai, siam di abih drei njauk cuk siuk pabang mbaok ka nyu tani tanat.”

Xã Ea Trol, huyện Sông Hinh hu labaih 90% bhap bani bangsa takik. Adat cambat, tanarakun meng kan mai nyu kak kajap haong rai diuk di mikva Ê Đê labik ini. Urak ini, tuk tabiak truh sang bhap bini jeng cuk siuk pabang mbaok saong dang atah di gauk, blaoh bruk langiu hamu ye nao tapak tal sang.

Ong Lê Văn Tấn, Akaok UB bhap bani xã Ea Trol, huyện Sông Hinh brei thau, piah khik hu siam bruk pacang caga jit ruak Covid-19 tuk padang veik rai diuk bahrau, bhap bani dalam palei njauk salih bahrau bruk bhian randap, ngak ka drei randap jang haong dom kadha bahrau dalam rai diuk.

“Mikva ngak njauk bruk pacang caga jit ruak tui panuac ieu di karja. Oh peih ngak dom adat cambat tanarakun ngak yang ngak bhang saong brei daok atah di gauk rilo jang. F0 ye hadei di taong abih ruak mai veik palei brei daok karei di sang 14 harei. Urak ini, dom urang nan hu mai veik haong rai diuk yau dahlau. Dom urang nan jeng dom urang pathau khan biak siam.

Tal urak ini, tỉnh Phú Yên tok daok 3 xã phường daok brei paatah di gauk tui Sarak 16 di Thủ tướng. Dom palei daok veik ngak tui Sarak 15 di Thủ tướng Raja-ei. Binah prong dom huyện bhum ceik di tỉnh Phú Yên daok khik catang “bhum hijao”./.

Urang lang: Jasi -22/9