Pathau mikva saong taong abih gauk! Bruk urang kan kathaot kham merat yam tagok tabiak truh kan kathaot daok ngak jeng pren pambak praong hatai caong yam tagok padang rai diuk trei sil, hanem phon tal yaok bhum palei di huyện Hàm Thuận Bắc, tỉnh Bình Thuận. Hadei di ini lac kadha vak di Khắc Thể angaok harak báo Bình Thuận.

Rilo thun dahlau, sang saai K’ Thị Khuổng bangsa K’ho, xã Đông Tiến, huyện Hàm Thuận Bắc, tỉnh Bình Thuận lac sang kan kathaot kayua oh hu phun jien ngak mbang, pala drak njauk khat lahik, anek daok sit. Yaok thun, sang hu mbang tui rilo sarak daong di karja yau daong brah yaok bilan, jien bac ka anek… Thun 2007, sang hu duk giao dịch gilang pariak sarak karja huyện brei mesraiy phun jien ưu đãi saong hu mbaok tame tal pasram patagok bruk raong glang. Meng phun jien mesraiy 25 triệu đồng, sang saai pataom tame raong palao pabe, limo, menuk, nan ye meng thun 2013 sang saai hu jien mek tame labaih 25 triệu đồng saong hu rai diuk dak harei dak tani tanat.

Thun 2014, sang saai halan hatian ngak harak likau tabiak truh baoh sang kan kathaot. Saai Khuổng chreih chrai lac: “dahlak likau tabiak truh baoh sang kan kathaot oh njauk lac kaya meda bo lac di xã Đông Tiến daok hu sang kan kandah jang. Meyah sang drei daok miat dalam angan baoh sang kan kathaot ye mboh melau saong puk palei lo. Urak ini hu phun jien dalam tangin, brei eng drei kham merat yam tagok oh cang karja daong tra”. Dreih yau sang saai Khuổng, sang dom saai K’ Thị Hồm, K’ Thị Núi, K’ Thị Ép… jeng kham merat yam tagok meng bruk bruk ngak padai ia, tangei lai, raong limo laisind, menuk ada… hu kein laba. Thun 2013, 2014 dom saai ngak harak likau tabiak truh baoh sang kan kathaot. Dom baoh sang ini oh ka kaya meda min halan hatian brei veik dom kein laba meng bruk lac sang kan kathaot ka dom baoh sang kan kandah jang piah yam tagok meng pren di drei.

Ong Nguyễn Ngọc Chiếu - akaok Ủy ban Mặt trận negar Việt Nam huyện Hàm Thuận Bắc  brei thau: piah patrun kan kathaot hu kein lagaih, dom xã, ban sit dalam huyện pataom tame pasang iek duah thau cambaih sang kan kathaot, padang angan saong padang jalan daong ka nyu njauk menuac”. Tapa duah thau, mboh sang halei tari tarieng ngak mbang, meda patagok kinh tế hu meng dom bruk ngak di anak meta, UBMT negar VN huyện dom pakat pachreih ba tut angan tame bruk patruh kan kathaot dalam yaok thun./.