Tui tacei pato di Thủ tướng Raja-ei saong tacei ba di dom Mentri, dom ngành, tỉnh Bình Dương hu padang dom kapul ngak bruk piah pataom tame langyah saong daong ka dom doanh nghiệp pasiam veik dom khat lahik, grap tanat bruk ngak mbang. Bruk daong ba nan nao gam haong dom kham merat di yaok doanh nghiệp saong urang ngak, bruk ngak di dom doanh nghiệp nan hu samar pasiam veik. Urak ini taong abih doanh nghiệp njauk khat lahik meng blaoh pak Bình Dương hu peih ngak veik. Kadha njauk ndom nan lac bruk srau kadau meng blaoh oh pambak hagait tal bruk pachreih urang buh jien tame ngak mbang pak Bình Dương.

 Thun 2000, Kapul Esquel – Hong Kong ba tame pandar sang mac  Esquel Vietnam pak Khu công nghiệp Việt Nam – Singapore 1. Nan lac Công ty Esquel Garment Manufacturing, chuyên ngak ao thun cao cấp piah pablei tabiak negar langiu. Jak jeng praong abih di Esquel Vietnam dalam 14 thun tapa nan lac padang hu kapul 5.500 urang ngak hu talei pambuak bruk khang kajap haong gauk. Kayua nan ye, dalam bruk srau kadau rah tabiak meng blaoh nan, urang dang akaok saong urang di công ty hu dang tabiak pacang khik an toàn ka sang mac. Urak ini, công ty hu brei sang mac peih ngak veik saong daok hu kế họach peih prong bruk ngak mbang pablei salih. Amuk Marjorie Yang, Akaok Kapul Esquel – Hong Kong brei thau: “14 thun dahlau dahlak peih sang mac pak Bình Dương, bruk pachreih  dahlak nan lac cơ sở hạ tầng saong taneh riya. Min urak ini bruk nan lac anek manuac. Dahlak sanya buh jien tame ngak mbang suai lavik pak Bình Dương. Caong khin di dahlak nan lac ngak ka sang mac pak Bình Dương jeng sa sang mac siam abih pak Bình Dương”

Kuhria tal tukvak ini taong abih doanh nghiệp njauk khat lahik dalam bruk srau kadau meng blaoh pak Bình Dương hu peih gilac bruk ngak di drei. Urang ngak gilac veik ngak bruk mboh labaih 98%. Urak ini dalam dom sang mac, bruk sản xuất mboh biak jar var, ralo doanh nghiệp anak meta brei urang ngak thêm giờ piah ngak salah đơn hàng hu mboh tangin blaoh haong dom gah pambuak bruk.. Ong Bùi Mạnh Lân, Akaok Hội đồng quản trị Công ty cổ phần Khu công nghiệp Đồng An brei thau: “Cục thuế saong Hải quan hu brei ka doanh nghiệp tạm nhập, tái xuất pandap panda tuk oh ka ginup dom harak ba-ar, chứng từ. Blaoh hadei di nan meda truy lục nguồn gốc piah pabak ka dom urang đầu tư biak samar, lagaih”

Gam haong sarak daong ka dom doanh nghiệp njauk khat lahik pambuak pagam tal thuế, blei tame pablei tabiak pandap panda, phun jien mesre, bayar bảo hiểm…, bruk langyah dom thủ tục hành chính jeng hu tỉnh Bình Dương peih ngak samar drah jang dahlau. Ngan haong dom doanh nghiệp gaok kan kandah ka nhà xưởng labik ngak, tỉnh Bình Dương hu langyah brei pah labik ngak hu padang ngak blaoh dalam dom khu công nghiệp piah sản xuất. Mentri Jien padai saong Ủy ban bhap bani tỉnh bahrau pambuak bruk peih ngak “Danak dak dom doanh nghiệp bảo hiểm tạm ứng jien bảo hiểm” ka 113 doanh nghiệp ngan haong yaom jien tạm ứng meng dom doanh nghiệp bảo hiểm labaih 114 tỷ đồng. Harei 18/6 meng blaoh, Ủy ban bhap bani tỉnh Bình Dương jeng brei thau mbang ka 1 dom doanh nghiệp njauk khat lahik hu daong brei. Ong Lê Thanh Cung, Chủ tịch Ủy ban bhap bani tỉnh Bình Dương brei thau: “Mboh lac tal urak ini, dom urang đầu tư biak sahanang hatai tame bruk ngak di drei, ngak tui dom kadha tacei pato di Raja-ei saong di tỉnh Bình Dương”

Bruk sangka, klah rabha saong nao gam di Raja-ei, di tỉnh Bình Dương hu daong ka dom urang buh jien tame ngak mbang dak harei dak jia tame jalan ba di Đảng saong sarak di Karja drei, sahanang hatai saong jia tame bruk đầu tư di tỉnh. Mboh cambaih laih di abih nan lac akaok bilan 6 bahrau ini, Ủy ban bhap bani tỉnh Bình Dương hu peih bruk jao ba-ar chứng nhận đầu tư ka 41 dự án FDI đầu tư tame Bình Dương, ngan haong yaom phun jien abih tih tagok tal jaik 155 triệu USD. Dom dự án đầu tư ini mai meng ralo taneh aia saong bhum taneh. Tapa nan nyu patagok taong abih phun jien FDI buh tame Bình Dương meng akaok thun tal ini labaih 978 triệu đô la Mỹ, mek hu 97,8% bruk ba tabiak dalam thun 2014, tagok jaik 15% dut haong tukvak ini thun dahlau. Bruk nan brei thau lac: ralo urang đầu tư negar langiu jeng daok palih ruah Bình Dương nan lac labik piah peih ngak dom dự án đầu tư bahrau./.