Pathau mikva saong grauk ayut! Dalam tuk rilo urang nong daok di dom tỉnh tapen tasik dalam bhum taneran kraong Cửu Long khat lihik abih kayua raong hadang công nghiệp, ye yaok ribau baoh sang di Trà Vinh duah hu megeik jien meng bruk raong kaya ikan ala halui glai. Jalan ngak nan oh lac takik khat lahik, jien duah hu tani tanat bo daok daong ka puk palei samar pasaim veik taneh glai dauk ia mbak tapen tasik. Kadha vak di Sa Oanh, urang vak di Rayo sap ndem Viet Nam daok di bhum taneran kraong Cuu Long brei thau ka bruk nan:

Labaih pluh thun ini mai, dalam tuk rilo urang raong hadang di xã Hiệp Thạnh, huyện Duyên Hải khat lahik abih, sre dange kayua hadang metai meng langik hajan pandiak oh lagaih saong danao ia raong neriak tachrauk, ye sang ong Phan Văn Huấn ngan saong 4hecta meteh danao hu halui phun đước pacang abih meteh, thun halei sang ong jeng laba hu meng 120 tal 150 triệu đồng meng bruk raong hadang – arieng. Yaom jien duah hu ini oh ka biak ralo min phun jien buh tame takik, abih takik prein yawa iek glang saong biak grap tanat. Bahrau ini, ong Phan Văn Huấn daok buh jien tame pala glai di taneh praong 3 hecta daok veik daok veik piah hu halui pacang takik di abih 40% saong peih praong taneh raong kaya ikan dalam ia."Drei palao raong takik khat lahik jang, raong ariang, ikan chẽm laba oh glaong min tani tanat. Daok raong hadang kong nghiep oh thau yau halei. Hu hadom hecta ye raong hadang glai abih, min glai di drei phun daok sit drei ka ngak hu rilo."

Daok ong Phan Văn Cảnh daok di xã Long Vĩnh, huyện Duyên Hải brei thau, ong njauk khat lihik dalam 3 thun gam, tavak sre kayua raong hadang cong nghiep. Dahlau diah, tuk birau mai daok labik ini, ong jeng yau dom urang karei dalam palei thei jeng tak kayau, raok danao raong hadang. Camereip raong jeng hu min hadei mai dak thun dak lahik. Meng nan, ong pala veik glai bloh raong hadang saong ariang tui jaln birau. Ong Phan Van Canh khan lac: "Ngak oh hu. Dahlau diah oh hu glai kayua labik ini dahlak tak abih mbong, tapa nan dahlak khat lahik dalam 3 thun gam. Tal tuk pala veik glai, meng nan jien mek tame yaok thun labaih 100 trieu dong."

Tui taong yaom di gah chức năng, bruk raong hadang- arieng ala halui glai tui jalan birau hu rilo siam lagaih jang raong thâm canh saong meteh thâm canh. Meyah caik 60% taneh raong kaya ikan dalam ia, 40% taneh pala glai ye jien laba meda mek hu 100 triệu đồng sa hecta. Ini lac jaln ngak mbang birau ba mai lein laba glaong dalm tuk raong hadang kong nghiep gaok kan kandah kayua jit ruak. Langiu di nan, daok rik daong khik caga alam moi truong, khik glai siam jang. Ong Tran Truong Giang, Akok Jabak ngak nong saong patagok palei pala huyện Duyên Hải lac:"Bruk ngak ini abih takik phun jien, takik khat lahik, lagaih saong mikva daok tapen bhum tasik. Tui kuhria hu 80% baoh sang raong tui jalan birau ini mek hu kein laba."

Meng kein laba di bruk ngak nan, meng thun 2010 tal thun 2014, mikva daok tapen tasik tỉnh Trà Vinh buh jien tame pala bahrau glai hu jaik 3.200 hecta piah raong hadang, ariang… Tui nan, glai dauk ia mbak di tỉnh tagok labaih 7.520 hecta, dalam nan hu jaik 1.600 hecta glai tamuh eng saong 5.900 hecta glai hu pasiam veik. Urak ini, tỉnh daok peih bruk iek glang saong pala bahrau 10.000 hecta glai dauk ia mbak tapen tasik tui Danak dak khik caga saong cak rok glai kahng kajap di Rajaei, ngan saong yaom jien jaik 80 tỷ đồng. Danak dak hu peih ngak di 12 xã, ban sit dalm 3 huyện tapen tasik nan lac Châu Thành, Cầu Ngang, Duyên Hải. Dalam nan, huyện Duyên Hải lac labik hu tỉnh palih ruah pala praong, ngan saong taneh pala  birau tal jaik 9.500 hecta.

Taphia bruk peih ngak danak dak pala glai birau, tỉnh Trà Vinh daok quy hoạch, parabha labik saong pachreih ba bhap bini tame ngak piah patagok ralo janih sinh thái dalam glai dauk ia mbak pambuak saong bruk raong kaya ikan. Ong Tran Van Tri, Akok Jabat rami ramik, khik iek glai, Chi cục kiểm lâm tinh Trà Vinh lac:"Buh jien tame pala glai pambuak saong raong hadang ba mai kein laba glaong saong tani tanat, duk saong raong hadang kong nghiep. Meng kein laba daok ba mai, urak ini mikva sangka buh jien padai tame pala veik dom glai njauk tak klak, daok lahik nao. Gam khik alam moi truong gam mek hu kein laba."

Kien laba meng bruk pala glai saong raong hadang ba mai oh lac daong pagalong raidiuk urang daok tapen tasik, bo daok rik daong khik ramik saong patagok hệ sinh thái glai dauk ia mbak di huyện Duyên Hải, gam daong ka tỉnh ini pacang hu siam bruk biến đổi khí hậu di dunya./.