Harei taduan hu baoh sang Jum pataom kayua Uỷ ban Mặt trận Negar xã Quảng Hiệp daong brei, sa-ai Nguyễn Thị Ngoan daok di palei Hiệp Thịnh, xã Quảng Hiệp, huyện Cư M’gar, tỉnh Đắk Lắk druat druai tuk hatai caong hu baoh sang khang kajap hu jeng biak:

“Dahlak jaoh jo nan ye raidiuk biak kan kandah. Hu karja palei daong meneing phun jien dahlak ngak hu sa baoh sang. Sang dahlak biak bui sambai, thau dhar phol karja, dom urang ngak pahala hu daong ka sang dahlak.”

Sang sa-ai Ngoan lac sa dalam dom pluh baoh sang di xã Quảng Hiệp hu daong jien padang ngak sang daok meng dom “drei pabui haluk” patak pataom kayua Mặt trận Negar xã peih tabiak. Oh lac daong sang daok, dom “drei pabui haluk” di Quảng Hiệp daok hu daong brei phun pajaih, athur raong, ba mbuan lagaih ka dom baoh sang kathaot ngak mbang patagok. Ong Lô Hoàng Thuận, daok di palei Hiệp Tiến khan lac, thun 2018 ong ruak tai biến metai meteh rup, sang laik tame kan kandah. Mặt trận Negar xã hu blei alin ka sang ong dua drei pabe binai. Tal harei ini, taphon pabe tagok hu labaih 10 drei. Raidiuk dak harei dak hu tani tanat.

“ 2 thun dahlau sang dahlak hu xã Quảng Hiệp alin brei dua drei pabe piah raong, tal urak ini, taphon pabe  menek hu 13 drei. Meng nan sang dahlak kham ngak mbang, yam tagok tabiak truh kathaot”.

Xã Quảng Hiệp urak ini hu labaih 15 ribau menuac, ngan saong 13 bangsa diukrai haong gauk, raidiuk di mikva daok rilo kan kandah, abih di nyu nan lac dom palei hu rilo urang bangsa takik. Meng thun 2011, Uỷ ban Mặt trận Negar xã Quảng Hiệp hu peih bruk raong pabui haluk, rik jien tame piah daong urang kathaot hu jalan yam tagok dalam raidiuk. Ong Hoà Mạnh Quân, Akok Uỷ ban Mặt trận Negar xã Quảng Hiệp brei thau, tal urak ini,  abih tih jien buh tame pabui haluk  patak pataom hu labaih 2 tỷ đồng, rik daong yaok pluh baoh sang tabiak truh kathaot.

  “Meng bruk raong pabui haluk, dalam 11 thun tapa, khol dahlak padang hu 27 baoh sang ka urang kathaot, daong ngak pasiam sang danaok ka 12 baoh sang, labaih 60 baoh sang, menuac urang gaok bala kayua langik tasik, ruak kik hu daong meng kadung jien pabui haluk nan. Meng thun 2017, khol dahlak peih ngak salih tapa bruk daong phun pajaih, athur raong ka baoh sang kathaot, mbiah tal urak ini, taphon pabe hu labaih 700 drei”.

  “Raong pabui haluk”, sa bruk ngak yaom lac sit min biak lagaih hu jeng bruk praong, dui pachreih hu rilo bhap bini dalam xã Quảng Hiệp, huyện Cư M’gar, tỉnh Đắk Lắk hu mbaok tame. Ini lac bruk ngak hu makna bac megru saong ngak tui jalan diukrai siam mekre di Ho Chi Minh di bhap bini dom bangsa daok di Quảng Hiệp./.

Urang lang: Ai Nghiem -10/12/2021