Yaok takai yam nao dalam 70 thun dak padang saong patagok di rayo sap ndom Việt Nam tuk halei jeng hu bruk nao gam  di urang pang rayo – dom urang tuk halei jeng caik hatai anit ranam brei ka riyak lingik papar sap. Ralo urang pang rayo halar hatian pataom gauk jeng Klup kapul di dom tỉnh, bal. Urang vak Lưu Huyền hu taom gaok dom urang pang Rayo piah thau cambaih jang ka hatai saneng, ka hatung hatian anit ranam brei ka riyak lingik sap ndom Việt Nam.

“Hu ralo mbang dahlak mehit sap: Ini lac sap ndom Việt Nam; Papar sap meng Hà Nội; sap riyak lingik yava daneiy; tatuan megei baoh hatai hulin”… Dom panuac ariya nan hu urang dahlau diah ngak bol lin angan Hà Phi Hải, sa urang dalam Klup kapul Urang dahlau diah ngak bol lin pang Rayo daok pak bal Việt Trì, Phú Thọ paneh tabiak. Ong Hải khan lac, Rayo sap ndom Viet Nam hu pambuak pagam haong ong yau ayut sahabat meng saman mesruh metak tal saman sron mbon. Drut droi di abih nan lac tukvak Rayo sap ndom VN brei thau lac Wa Hồ palang mehik, taong abih bol lin, ayut sahabat di ong tuk nan daok di chiến trường Tây Nguyên, oh thei ndom haong thei, gandang gandi, blaoh ba gauk hia. Saong kanar di abih nan lac tuk pang sap phát thanh viên di rayo sap ndom VN ndom tagok dalam dom vaktu dakrai sajarah prong di taneh aia, pachreih bol lin saong bhap bani yam tagok meblah mek jayak. Yau nan, Rayo sap ndom VN tuk halei jeng nao gam, jeng ayut sahabat haong dom urang lin saman mesruh metak. Urak ini, tuk umo taha, baoh rayo sit jeng lac ayut sahabat tuk halei jeng daok taphia ong. Ong Hải biak takre dom danak dak ndom tapak hu bruk ndom biai nao mai haong urang pang rayo. Yaok mbang papar sap danak dak ndom tapak, dom urang dahlau diah ngak bol lin dalam klup kapul pataom gauk veik piah pang, ralo mbang hu iew phon piah giao lưu, ndom biai nao mai haong biên tập viên saong dom urang tuai daa. Tui ong Hải, ini lac bruk salih bahrau hu mboh di meta di dom danak dak papar sap urak ini: “Dahlak mboh Rayo brei thau biak samar dom sarak di Đảng, Karja. Hadei di tuk pang Rayo, hu dom kadha hagait ka sarak, jalan ngak di Đảng dahlak jeng khan veik ka mikva daok jaik taphia thau piah ngak tui saong khan veik ka dom anek kamuan. Abih di nyu nan lac dom danak dak ndom tapak haong urang pang rayo dahlak biak takre. Dahlak caong khin riyak di Rayo sap ndom VN meda hu nao tal bhum atah bayah, ba sap ndom di Đảng  saong bhap bani tal taong abih manuac urang dalam negar”

Meda pang hu Rayo di yaok labik, yaok tuk biak mbuan lagaih, nan lac panuac di amuk Nguyễn Thị Hiền, urang dalam klup kapul Urang pang rayo palei Lựa, xã Việt Hùng, huyện Quế Võ, tỉnh Bắc Ninh. Ngan haong bhap bani daok pak bhum palei pala, bruk ngak hamu ngak apuh, darak pasar… tuk halei jeng jan van, nan ye tok thau dom khaw tin tapa Rayo sap ndom VN. Amuk Hiền khan lac, amuk oh klaak tapa sa danak dak halei di Rayo pambuak pagam tal bruk ngak nong, urang nong, palei pala atau dom danak dak ndom ka urang kamei. Tuk halei papar sap dom danak dak nan, amuk tok “pang nhạc hiệu” lac “thau danak dak”. Kayua ini lac dom danak dak biak jaik taphia, hu kein laba, daong ka bhap bani thau cambaih jang ka bruk daok dang, kham merat ngak bruk pah hala saong ngak tui dom kreih camin bo Rayo yaih khan piah yam tapa ngak kaya meda: “Dahlak mboh taong abih dom danak dak jeng hu makna biak siam, abih di nyu nan lac dom danak dak yau Ayut sahabat di urang nong saong Daong gauk ngak kaya meda angaok Rayo sap ndom VN. Khaol dahlak pang saong pathau khan tal dom urang dalam klup kapul piah tui pang dom danak dak nan,  daong ka khaol dahlak ngak kaya meda meng mblang hamu. Dahlak biak ranam rayo sap ndom VN, tuk halei, labik halei kol dahlak jeng pang hu, tuk nao ngak khaol dahlak jeng pang Rayo sap ndom VN angaok điện thoại”

Dom urang dalam klup kapul Ayut sahabat pang rayo huyện Yên Dũng, tỉnh Bắc Giang tuk halei jeng hu baoh radio caik akaok taneng. Amuk Trần Thị Lệ Toàn, urang dalam klup kapul ini brei thau, page tagok pang rayo, tuk mbang, tuk lahaiy pang Rayo, dahlau di tuk nao ndih jeng pang Dalikan lavik melam meng ndih hu. Hadei di tuk pang Rayo, dom urang dalam klup, kapul ini pataom gauk veik piah khan brei ka gauk thau dom kadha bahrau, abih di nyu nan lac dom sarak, hukum bahrau, klah rabha dom kadha daok hu menuac sia sangka yau bruk pato megru, y tế, urang ngak, bruk ngak… Amuk Toàn brei thau, amuk biak takre dom danak dak daoh ragu daoh bhap bani saong ragam daoh meng kan hu papar sap angaok rayo sap ndom VN: “Urak ini rayo bak 70 thun. Khaol dahlak caong khin Rayo peih ralo danak dak gheih saong siam jang piah ka khaol dahlak pang, pablak tame dom danak dak daoh ragu bhap bani saong ragam daoh meng kan piah ba tame rai diuk di bhap bani. Dom ragam daoh bhap bani nan lac dom pandap mbang  tinh thần di khaol dahlak. Dom kadha, danak dak karei caong khin Rayo sap ndom VN cập nhật samar saong cambaih jang piah ka khaol dahlak hu thau yaok harei”

Yaok triệu triệu urang pang rayo grauk labik dalam negar, meng tapen negar tal pulao kaoh atah bayah jeng harei melam tui pang dom danak dak angaok riyak papar sap. Oh lac dalam negar, ralo klup kapul riyak katut panak pang rayo jeng hu padang tagok pak dom negar langiu yau Angola, Nhật Bản, Pháp…, bhian payua harak thư pok meyaom saong rik panuac daong piah ka Sap ndom VN dak harei dak cakrok patagok. Sa kadha njauk ndom lac, tok hu jia, ranam, urang pang rayo dalam saong langiu negar meng pambuak pagam trak dalam haong Rayo yau nan./.