Urang đoàn – dam dara phường Tân Thiện tuk halei jeng patagok bruk ba akaok nao dahlau, halan hatian ka raidiuk bhap bini

Luac tukvak dalam thun, tapa dom asal kadha, dom bruk praong di bilan dam dara, bruk dam dara halan hatian bilan hè,... Kapul dam dara phường Tân Thiện hu ba tabiak ngak rilo danak dak, rilo bruk rik daong cakrok puk palei dalam rilo gah. Meng bruk gam gam ba gauk tabiak puh ramik haci hacih puk palei, jah sa-at hareik hareim, kuac kuah ribaong dalam mblang hamu. Tukvak tapa, kapul dam dara phường jak ba hu labaih 350 triệu đồng tuh bê tông jalan palei, ngak jalan điện, ramik pasiam sang ilamu dom khu phố, labik me-in ka uranaih...

Taphia nan, bruk iek glang raidiuk ka dom sang kan kathaot dalam palei jeng hu kapul dam dara caik hatai sangka. Meng thun 2016 tal ini, hu jak ba pasiam veik saong ngak bahrau 5 baoh sang, brei labaih 300 paok pandap ka dom sang kan kathaot ngan saong yaom jien abih tih lac 170 triệu đồng. Gam haong nan, bruk iek glang uranaih jeng hu kapul dam dara phường Tân Thiện iek praong, hu labaih 100 triệu đồng hu caik tabiak blei pandap alin saong brei jien bac ka dom anek saih sang kan kandah. Njauk caik hatai lac, anak bruk jit ruak Covid-19, Kapul dam dara phường Tân Thiện hu jak ba jien padai, blei 1.300 blah pataih pacang mbaok haong 70 klaok ia rao tangin pametai anek ruak brei saoh ka dom sang bac trung học cơ sở, tiểu học dalam phường. Gam haong nan, pathau khan tal dom baoh sang bruk tame pandar  Bluezone, dom jalan pacang caga jit.

Dom thun tapa, BCH kapul dam dara phường Tân Thiện hu pambuak bruk haong Gilang pariak sarak karja, gilang pariak ngak nong saong patagok palei pala ban sit La Gi dalam bruk daong palagaih brei mesraiy phun jien piah daong ka urang đoàn cakrok bruk ngak mbang, bac megru saong langyah bruk ia hacih, sa-at alam môi trường. Kuhria tal harei ini, Kapul dam dara phường khik ramik bruk mesraiy jien ngan saong yaom jien mesraiy abih tih labaih 2 tỷ meteh.

Gam haong nan, 1 dalam dom bruk hu kapul dam dara Tân Thiện biak caik hatai sangka lac jak ba likei dam umo 17 thun tut angan pasang iek prein yava nao ngak lin. Yaok thun, dom likei dam dalam phường nao ngak lin tuk halei jeng hu ginup menuac tui bruk ba tabiak di pakat angaok. Ngan saong bruk “Taong abih bhap bini khik caga an ninh palei negar” saong bruk “Taong abih bhap bini jum pataom dak padang raidiuk ilamu”, kapul dam dara Tân Thiện hu peih rilo mbang tabiak khik kajap salamat bruk nao mai angaok jalan. Padang ngak hu 7 “Chibi giao thông” (lac dom thaot binguk pathau khan) di dom canah jalan, piah pathau khan brei bhap bini ngak njauk tui hukum nao mai angaok jalan.

Dalam 2 thun 2018, 2019 kapul dam dara phường Tân Thiện hadah mbaok meta taduan hu harak meyaom di mBan chấp hành Kapul dam dara CS Hồ Chí Minh kayua ngak hu rilo bruk praong gah dam dara saong uranah. Thun 2018, 2019 saong 2020 taduan hu harak meyaom di akaok UB bhap bini tỉnh Bình Thuận kayua ngak hu biak siam bruk dam dara halan hatian bilan hè, rik daong cakrok bruk ngak mbang KTXH di puk palei.. Lingiu di nan, mBan chấp hành kapul dam dara phường Tân Thiện daok taduan hu harak meyaom di akaok UB bhap bini ban sit kayua ngak hu siam bruk bac megru saong ngak tui jalan hadah krah siam mekre di Hồ Chí Minh vaktu 2018 - 2020; bruk pakacah gauk jak ba gheih 2016 - 2020...

Meng blah ao hijao, dam dara tuk halei jeng hu dalam rup bruk halan hatian di urang ranaih umo, ba baoh hatai anit ranam saong hatai caong rik prein yava  tame ngak dom bruk hu kein ka bol bhap rahra.. "Jhui tangi taneh ia hu ngak hagait brei ka drei. Bo njauk sua drei hu ngak hagait ka taneh ia harei ini...". Kapul dam dara phường Tân Thiện daok ba tangin tame, Rik prein brei ka dunya umo daok ranaih./.

Urang lang: M. Phương – 28/03