Ong Phạm Chánh Trung, Phaok akaok Chi cục menuac sia, baoh sang, ndih tapui tui sarak karja bal raya HCM

Hadei di tuk jit Covid-19 pasang iek hu, sa-ai Trang Nguyễn Phương Thanh, urang jakar iek gah menuac sia, ndih tapui tui sarak karja Phường 3, Quận 3, TPHCM haong dom urang pambuak bruk duah jalan nao taom gaok bhap bani, pathau khan dom sarak menuac sia, iek glang pren yava dahlau di tuk lakhah, dut iek prein yava dahlau di tuk menek, abih di nyu lac jak ba yaok diuk pasang menek ginup 2 urang anek. Sa-ai Thanh brei thau, rilo diuk pasang daok ranaih umo kayua nduac tui bruk ngak, oh ka sahneng tal bruk menek atau oh hu rilo tukvak iek glang anek bhik, nan ye tok menek sa urang anek. Kayua YAU nan ye bruk pathau khan oh lac mbuan laghaih, abih di nyu lac ngan haong dom urang lac menuac sia meng labik karei mai daok: “Dom baoh sang hu rai diuk kan kandah ye drei oh ndom hu. Oh hu jien nan ye mikva oh kuhria hu ka anek bhik nan ye oh khin menek. Daok dom urang karei, yau huac menek ye nyim ong amuk ndom tame.”

Anak meta mboh lac, huac menek lac bruk di rilo diuk pasang ranaih umo di bal raya HCM urak ini. Tui bruk yaok pataom menuac sia saong sang daok harei 1/4/2019, kuhria rah tapa sa urang kamei dalam umo menek di bal raya HCM hu labaih 1 urang anek (di tanut 1,39), lac tanut biar abih dut haong tanut menek salih di negar nan lac labaih 2 urang anek (di tanut 2,09). Meng thun 2000 tal thun 2019 brei mboh, bruk menek di bal trun gam gam. Thun 2000 lac 1,76 dut haong thun 2019 lac 1,39. TPHCM urak daok dalam nyaom 21 tỉnh, bal hu tanut menek biar di abih.

Tui Thạc sỹ Nguyễn Quang Việt Ngân, Phaok Khoa Địa lý, Sang bac Đại học Khoa học xã hội saong Nhân văn TPHCM, tuk dom uranaih menek tabiak takik, dalam sang meda hu tỉ lệ 4-2-1. Nan lac 4 urang hu gam ong amuk dua gah, haong amaik ame tok mong iek sa uranaih. Min tuk dom urang nan taha nao, ye sa uranaih njauk mong iek tal 6 urang, ngak jeng naong trak ka uranaih dalam harei hadei, ka gah jien ndo, iek glang, daong ba… Tui amuk Ngân, rilo bhap bani daok mboh lac, urak ini bal raya HCM hu biak rilo manuac, nan ye bruk pathau khan  kurang urang ngak ka harei hadei lac biak kan pachreih urang pang tui. Gam haong nan, dom kan kandah dalam raidiuk jeng ngak ka dom diuk pasang ranaih umo mboh lac njauk pataom prein yava, jien ndo piah raong pato siam abih ka sa urang anek nan ye tok menek sa urang. Ini lac sa cuang kandah prong ka dom urang ngak sarak gah menuac sia: “Kadha kan abih dalam bruk patagok tanut menek di sarak samu haong bruk taha nao menuac sia di bal raya HCM oh njauk lac bhap bani oh khin menek bo urang mboh hu dom kan kandah. Bruk menek sa urang ngan haong dom ayut daok ranaih nan lac ginup trách nhiệm paje, saong tuk menek anek ka dua nan lac bruk palih ruah di trách nhiệm dalam bruk raong iek anek bhik saong glaih glar dalam rai diuk.”

Tui ong Phạm Chánh Trung, Phaok akaok Chi cục menuac sia, baoh sang, ndih tapui tui sarak karja bal raya HCM, sarak menuac sia thun 2021 – 2025 brei ngak dahlau kadha tanut menek biar. Dom jalan ngak piah pachreih menek hu ba tabiak yau daong oh mek jien, mek meteh jien viện phí dalam mbang menek anek ka dua ngan haong urang hu hộ khẩu daok di bal raya; brei ngak dahlau bruk pabak daong brei mesre, blei sang atau pah sang daok ngan haong dom diuk pasang menek ginup dua urang anek hu hộ khẩu daok di bal raya HCM. Gam haong nan lac oh mek jien, brei trun meteh jien bac ka uranaih umo ala 10 thun; peih ngak danak dak aia tasau dalam sang bac…

Ong Trung brei thau, meda hu sarak paglaong cơ chế cộng đồng, ba tabiak  bruk pakacah gauk peih ngak sarak menuac sia di dom phường xã: “Kasa phường nan njauk hu 75% diuk pasang menek ginup 2 anek, ka dua lac ngak hu dom tanut gah pasang iek pren yava dahlau di tuk lakhah. Ka 3  lac mek hu saong tapa tanut gah sàng lọc dahlau di tuk menek saong tuk hu anek kaman, puac di abih nan lac njauk pasang iek hu bruk likei kumei oh samu gauk tuk menek.”

Bruk patagok tanut menek dalam bal HCM oh meda ngak hu dalam drah samar. Salih tame nan njauk patagok bruk pathau khan angaok harak báo  piah jak ba bhap bani peih ngak “Yaok baoh sang menek ginup dua urang anek”. Praong di abih lac, bruk paglaong rai diuk, pasiam bruk pato pakai, y tế... meda pabak pren khang piah ka dom baoh sang sahanag hatai menek anek ka dua./.

Urang lang: Jasi – 21/10