Dom tỉnh gah merong dok yam tame tabung glong di bilan pandiak thu, ia di rilo binek dalam tỉnh Bình Thuận dok trun beir jang tanut trung bình. Bruk nan nyu ba tal kurang ia pandar biak khang di dom puk palei kayua ia meng dom sang mac oh ginup pabak. Urang pambuak bruk Bích Phượng hu kadha vak brei thau ka bruk nan, daa mik va song tong abih gauk tui pang:

            Bilai njuk ia Thạnh Cần di huyện Hàm Thuận Nam hu pren khang 250 mét khối ia sa harei melam, pabak ia pandar ka yaok ribau boh sang bhap bini daok di 2 xã Hàm Thạnh song Hàm Cần. Min jaik sa thun ni mai, bilai ini oh daok ngak bruk kayua dom bingun ia nyu thu tal mbat. Yaok rituh boh sang dok jiak tapen sang mac dok kurang ia pandar biak khang. Piah hu ia pandar, urang kuac raok bingun, min dom bingun nan rilo meng njom phèn, ia oh hacih saat. Piah hu ia hacih saat piah pandar, yaok bilan, rilo sang abih  meng yaok rituh ribau tal labaih sa triệu đồng piah blei ia bình, ia tiệt trùng. Saai Trần Văn Hùng song saai Nguyễn Thị Lan, urang daok di xã Hàm Thạnh, huyện Hàm Thuận Nam khan lac: Nao likau ia bingun di sang ini, sang deih mai pandar. Dok ia blei yaok bình 12 ribau đồng, yaok sang pandar yaok harei meng 2 tal 3  bình.

 Drei pandar ia phông-tên, ia hacih saat. Meng di tuk ia abih ye drei pandar ia ni, min nerak lo, piah rao panyin jam min. Daok ia ngak mbang huak saong ia pandar yaok harei njauk blei taong abih.

Dok xã Hồng Sơn, huyện Hàm Thuận Bắc hu 4 palei min jalan ia di xã urak ni ginup pabak ka labaih meteh dom boh sang dalam palei. Tame bilan pandiak thu, bruk kurang ia dak harei dak khang kayua ia di sang mac jeng thu lagu, ia nduac tanjoh toc toc. Yaom lac sang dok jiak jalan ia, min ong Võ Phi Hùng saong rilo urang karei brei medeih meng kreh melam piah pandok ia, padang mepiah dalam tong abih dom janih pandap meda padang ia hu. Labik sang hulin ia biak yếu,  tapa gah deih jalan ye oh hu ia dalam bilan pandiak. Khin hu ia pandar ye kreh melam tagok pandok ia. Hulin pandok meng xô tuh tame thung phuy,  kayua glaong lô ia oh tagok tal. 

Ngan song dom boh sang dok atah bilai pabak ia dok rambah jang. Mikva rilo meng bhian randap saong bruk oh hu ia jamriak pandar meng akaok bilan thu. Salih tame nan urang pandar ia hu ba meng krong, craoh, bingun mai. Ong Trần Phước Thủy, Akaok cụm ba ia Hồng Liêm - Hồng Sơn, huyện Hàm Thuận Bắc brei thau Kayua drei kurang ia, sang mac hu tuk abih ia dalam danao, jamriak padeih ngak bruk, labaih 3 tuk hadei ia dalam danao meng hu veik song jamriak meng peih njuk ia. Tuk nan dom baoh sang daok jiak sang mac meng hu hasit ia, daok dom baoh sang daok tah ye oh hu hagait.

          Urak ni, pasak ia hacih song saat alam môi trường palei pala Bình Thuận dok khik ramik 38 danak dak pabak ia di dom xã, ban sit. Kuhria rah tapa, dom danak dak ni pabak hu 25 ribau mét khối ia yaok harei melam, min yam tame bilan thu, ia tok hu jiak 20 ribau mét khối. Makna di nyu kayua kurang phun jien buh tame piah peih prong dom danak dak song padang ngak dom danak dak bahrau. Ong Lý Hữu Phước, akaok pasak ia hacih song sa-at alam môi trường palei pala Bình Thuận ndom lac:  Urak ni danak dak pabak ia oh meda buh jien tabiak ngak sit sot yau dahlau deih, kayua oh ba mai kein lagaih. Sang mac ia dahlau deih tok pabak ka sa palei, sa xã ye urak ni tui jalan ngak di taneh ia jang yau tui ilamu di tỉnh, ye sang mac ia bahrau njauk buh jien tame pabak ka dom xã meng hu siam lagaih. Tui jalan ngak yau nan nyu abih biak rilo phun jien, kol dahlak oh ngak truh.

Bilan thu thun ni, tỉnh Bình Thuận patom tame pabak ia ka dom labik caong hu ia pandar glong meng bruk ba ia meng labik karei mai song kuac raok bingun bahrau. Lingiu di nan, tỉnh jeng dok hu quy hoạch piah peih ngak dom danak dak pabak ia bahrau, praong jang./.

                                                                   Biên dịch: Ha ni pha