Rilo urang ngak hu po sang patrun yaom jien pah sang 

Phường Tam Bình, ban Thủ Đức daok jaik darak đầu mối kaya nong Thủ Đức, Khu chế xuất Linh Trung di ban raya saong labik ngak kong Sóng Thần (tỉnh Bình Dương) nan ye hu biak rilo sang ngak mbang gah brei pah  sang trọ. Tukvak ini, dom po sang trọ rilo meng brei trun yaom pah duk bilik piah klah rabha kan kandah haong urang ngak.

Ba akaok nao dahlau dalam bruk trun yaom jien pah bilik daok ka urang ngak gaok kan kandah kayua jit praong lac sang sa-ai Nguyễn Thị Bích Hạnh – po sang trọ Bảy Tài, daok di labik 45 jalan ka 11, khu phố 4, phường Tam Bình. dalam 4 mbang jit, sa-ai Hạnh jeng brei trun yaom pah saong sangka daong pandap brei ka dom urang ngak atah palei. Jien mek tame di sang sa-ai lac meng 50 bilik brei pah nan ye bruk trun 30% yaom pah jeng ngak kan kandah oh sit, min sang sa-ai jeng halan hatian klah rabha kan kandah, daong ka urang pah labik daok:

“Jien mek tame di sang dahlak lac meng dom bilik brei pah daok. Urak ini tui bruk “hala siam pacang hala tahak” nan ye khin klah rabha kan kandah haong dom menuac pah daok piah yam tapa mbang jit biak trak ini. Jeng caong khin taong abih urang daok brei pah bilik daok dalam phường saong dalam ban trun yaom atau klah rabha kan kandah haong dom menuac pah labik daok tui prein di drei”.

Sa-ai Nguyễn Thị Hồng Nga pah bilik daok di sang trọ Bảy Tài oh padauk hu bui sambai tuk po sang trọ brei thau lac trun 30% yaom jien pah bilik daok dalam 2 bilan tal. Sa-ai Nga lac urang ngak bruk jhik jien bilan tok hu 7 triệu đồng sa bilan. Jit ruak tamuh tabiak Cty takik hu menuac blei nan ye bruk ngak jeng takik tui. Dalam tuk kan kandah, yaok bilan hu trun 480.000 đồng jien pah bilik daok, sa-ai Nga drut drui lac:

“Bahrau mboh hu po sang trọ siam hatai yau nan. Tuk kan kandah anai po sang trọ labik ini jeng bhian brei brah, menyek mbang, saradang, pandap mbang yaok harei….. Bilik dahlak daok pah yaom 1.600.000 đồng sa bilan, hu trun 30% jeng biak uan tabuan lo. Tuk ka oh hu jit nao ngak hu tăng ca rilo, urak ini bruk takik, oh tani tanat, hu trun yaom pah 30% lac biak uan tabuan”

Dalam tuk jit Covid-19 tamuh tabiak khang, TP.HCM gam gam brei pa-atah di gauk, hu bruk ngak dalam tukvak ini ngan saong rilo menuac lac biak patuah. Oh patuah yau sa-ai Nga, diuk pasang sa-ai Nguyễn Thị Ngọc Huyền daok pah bilik daok di labik 458 jalan Mai Chí Thọ, phường An Phú, ban Thủ Đức (Quận 2 klak) oh hu bruk ngak, oh hu jien mek tame jaik sa bilan ini mai. Sa-ai Huyền brei thau, sa-ai ngak bruk daong bruk sang, daok pasang likei ngak bruk vệ sinh sang glaong tal, labaih 1 bilan ini mai oh hu thei pah. Patuah, sang sa-ai Huyền haong rilo sang karei dalam labik ini hu amuk Lê Thị Kim Chi – po sang trọ brei trun yaom pah sang, alin hadiah pandap mbang, gaok mai daok brei jien blei bảo hiểm y tế:

“Dahlak mboh biak uan tabuantuk taduan hu bruk daong di anai po sang yau ye trun yaom pah sang, brei brah, brei pandap mbang. Blaoh daok brei tavak jien pah sang tra, tuk halei nao ngak hu jien meng bayar. Dahlak pah rilo labik ye, oh hu labik halei siam yau labik ini, dahlak thau dhar phor po sang biak rilo”.

Amuk Lê Thị Kim Chi, po sang trọ ndom lac, urang halei daok dalam bruk yau ini jeng ngak yau amuk. Mboh urang pah bilik daok biak glaih glar duah jien dalam bilan jit, amuk daong hu hagait ye daong chip. Amuk brei trun 500.000 đồng sa bilan sa bilik daok dalam 4 mbang jit tamuh tabiak saong meyah jit ruak kan kandah jang, amuk daok brei trun gac:

“Sa bilan dahlak trun 500.000 đồng sa bilik, nan ye 40 bilik yaok bilan trun 20 triệu đồng, meng bilan 6 mbiah tal tuk abih jit. Daok dom urang kan kandah jang, lahik bruk ngak ye dahlak brei trun rilo jang. Sang dahlak jeng gaok kan kandah hasit min drei hu klah rabha kan kandah haong mikva nan ye drei mboh oh lahik hadom”.

Jaik ini, rilo po sang trọ di dom quận, huyện dalam ban raya HCM hu trun yaom jien ka dom menuac pah bilik daok, lac dom urang ngak gaok kan kandah kayua jit praong. Bruk ngak bak hatai anit ranam ini hu klah rabha kan kandah ka urang ngak atah palei, saong daok hu daong palagaih ka urang ngak, pachreih urang daok veik ban raya, takik nao palei, patrun bruk njaom mbak di bilan jit./.

Urang lang: Mousaphương -4/7