Meng tuk tok pasang padang raidiuk, sang kan daman bo daok hu rilo anek, sa-ai Bệnh saong pasang lac sa-ai Lâm Dưa jaoh sa takai gah hanuak meng tuk daok sit njauk nao grauk labik, luac thun bilan duah ngak apah, bruk hagait jeng ngak min oh ginup mbang, kathaot jeng daok tui miat. Lingiu di nan, ruak kik daok tui sa-ai dalam tukvak suai lavik. Mbiah tal thun 2003, sa-ai hu daong brei mesre phun jien blei limo sind mai raong piah patagok kinh tế, gam raong pabui. Yaom lac biak kham merat min oh hu labaih hagait.

Oh taduan lah thar vak, thun 2011 sa-ai tame kalup kapul pachreih nong di palei saong hu gilang pariak sarak karja brei mesre 10 triệu đồng. Mboh hu kein laba di bruk raong limo ia tasau di dom baoh sang dalam xã, sa-ai pablei limo sind, gam jien mesre buh tame blei limo ia tasau mai raong. Meng sangka iek glang, limo ia tasau di sa-ai drah praong, hadei di sa thun mek hu ia tasau. Meng nan, raidiuk sang sa-ai hu salih birau meng bruk mek ia tasau limo pablei yaok harei.  Sa-ai khan lac:

“ Dahlau diah sang biak kan kathaot. Ngak mbang hu meng tuk tame hop tac xa raong limo ia tasau saong hu Kalup kapul pachreih nong daong ba. Hu ia tasau limo pablei raidiuk baoh sang jeng hu mbuan sahanang jang. Thun 2013 sang hu tabiak truh kan kathaot, khang kajap, anek bik hu nao jeng mboh sahanang hatai, oh daok duh hatai ka bruk jien padai tra.”

Urak ini, yaok harei mek hu labaih kurang 20 kilo ia tasau, yaom pablei 11 ribau đồng sa kilo, kaoh bloh phun jien, yaok bilan sang sa-ai daok laba hu meng 5 tal 6 triệu đồng. Sa-ai Bệnh daok brei thau lac, kayua limo menek drei tano nan ye pablei mek jien blei limo binai piah patagok tapon. Thun blaoh, sa-ai buh tame 40 triệu đồng meng jien patak pataom hu blei 2 drei limo binai mai raong. Tal urak ini, limo praong hu 7 bilan. Sa-ai khan lac, dua klau bilan tra, dua drei limo binai birau raong  mek hu ia tasau, tuk nan ia tasau hu rilo, raidiuk meda hu trei sir jang. 

Tui sa-ai Bệnh, meng hu daong brei mesraiy phun jien, pajaih raong pala, pasram ilamu ky thuat…daong ka urang nong, abih di nyu nan lac dom baoh sang urang Khmer kan kathaot yau sang sa-ai hu jalan salih birau raidiuk saong patagok kinh te baoh sang. Langiu limo ia tasau daok mek ia tasau pablei yaok harei, sang sa-ai Bệnh daok blei hu 2.000 met vuong taneh piah ngak padai, daong ka raidiuk hu ginup meda jang. Sa-ai Lý Kim Sia, Bí thư Chi bộ palei Bắc Dần, xã Phú Mỹ, huyện Mỹ Tú khan lac: Hu ia tasau pablei mboh raidiuk di sa-ai Bệnh hu patagok. Hadei di ini sa-ai jeng daok kham merat, kuhri kuhria pablei limo tano anek di limo ia tasau piah blei dua drei limo binai mai raong. Dalam var di sa-ai hu abih tih 3 drei limo, min sa drei daok brei ia tasau yaok harei, daok veik dua drei tra daok tui tano, paguh diah metian saong mek ia tasau. Meng nan, mboh lac sang sa-ai meda tabiak truh kan kathaot hu khang kajap.

Meng hatai kham merat yam tagaok, hadei di jaik 40 thun rambah rambup, glaih glar, tal thun 2013,  sang sa-ai Lý Thị Bệnh hu tabiak truh kan kathaot, hu raidiuk tani tanat. Sa-ai jeng lac kareih camin urang nong ngak mbang naih joi, jum pataom daong gauk ngak kaya meda saong patrun kan kathaot khang kajap di tỉnh Sóc Trăng tuvak 2012 -2014. Sa-ai Bệnh khan lac, raong limo ia tasau lac jalan ngak ba mai kein laba. Kayua yau nan ye, anak tal, sa-ai saong baoh sang di drei daok buh jien tame peih praong bruk raong limo mek ia tasau piah duah jien tame rilo jang./.