Urang bac sy halan hatain tame dong ka Ban raya 

Taduan hu panuac ieu tagok jalan daong pacang caga jit COVID-19 di gah Meraong di tuk melam, kapul y, bác sỹ di sang iek ruak Bạch Mai tok hu dom mon piah rami ramik khan ao, pandap panda, caga tagok jalan ka mbang nao rilo glaih glar saong oh thau hu tukvak mai veik. Dalam dom y, bác sỹ di sang iek ruak Bạch Mai tagok jalan tame ban raya Hồ Chí Minh mbang ini, rilo urang bahrau mai veik meng dom bhum jit yau Bắc Giang, Hải Dương … Dom gah tangin halan hatian tagok jalan pacang jit di rilo y, bác sỹ hu yar glaong bak hatai khang meng di tuk hu panuac ieu daong ka gah Meraong meng sang iek ruak.

Hu ilamu 2 mbang pacang jit di tỉnh Hải Dương saong hu daong pacang jit di taneh ia Lào ayut sahabat, bác sỹ Trần Hoàng Long, Pasak Ruak nhiệt đới, Sang iek ruak Bạch Mai khan lac: Mbang jit ini di ban raya Hồ Chí Minh lac praong abih kuhria meng dahlau mai nan ye meda hu dom kadha oh caga dahlau hu.

Lac bác sỹ, sa-ai tuk halei jeng kham merat abih drei piah ngak siam bruk di drei. Thau hu bruk kan kandah, min sa-ai oh huac, halan hatian tame Meraong yaom lac oh thau harei halei meng hu mai veik sang di drei.

Phaok Giáo sư, Tiến sỹ Đào Xuân Cơ, Phaok Yam ndok Sang iek ruak Bạch Mai brei thau: hadei di tuk kapul y, bác sỹ camereip tagok jalan tame Meraong, dom urang pan akaok Sang iek ruak Bạch Mai daok caga veik menuac ka dom kapul hadei di nan, gam haong dom jamriak suak yava bahrau, jamriak halang darah bahrau… piah gam haong bhap bini gah meraong khang hatai pacang padam jit.

Meng parabha bruk di Mintri Y tế, Sang iek ruak Phổi Trung ương brei padang Pasak taong ruak ka urang ruak COVID-19 trak di tỉnh Đồng Nai. Ini lac bruk hadah mbaok meta min jeng biak trak damak kayua bruk di dom y, bác sỹ pak ini, lac meblah veik suan yava, bruk diukrai ka dom urang ruak COVID-19 trak.

Pandap ba tui di dom bác sỹ, điều dưỡng mbang ini oh lac ilamu ngak bruk, hatung hatian, prein yava umo ranaih, bo daok hu dom jamriak pacang jit lac 10 mac suak yava chức năng glaong, mac suak yava tame saong oh tame, 10 mac tui iek urang ruak, dom jamriak hồi sức cấp cứu saong pandap dut iek.

Bác sỹ Vũ Văn Thành, Akaok Khoa Ruak phổi mạn tính, Sang iek ruak Phổi Trung ương brei thau: Kol dahlak thau lac urang halei jeng kan kandah, thei jeng hu diuk anek, hu sang di drei, min kayua bruk haong gauk, kol drei klaak veik bruk di drei, kham merat haong gauk meng ngak hu siam bruk hu jao brei.

Thau lac jit ruak di ban raya Hồ Chí Minh rah tabiak khang, bruk mesruh pacang jit daok kan kandah, glaih glar saong dui atah, Phó Giáo sư, Tiến sĩ Nguyễn Viết Nhung, Yam ndok Sang iek ruak Phổi Trung ương brei thau, piah hu siam lagaih, jalan ngak di sang iek ruak lac parabha jeng rilo mbang. Mbang camereip, Sang iek ruak Phổi Trung ương brei urang jakar naih gheih abih tame dahlau piah padang hệ thống pacang caga jit.

Meng harei 27/7 tal harei 1/8, Sang iek ruak K hu daong 2 kapul y, bác sỹ tame Meraong pacang jit. Jaik 40 urang jakar, y, bác sỹ haong urang y tế di Sang iek ruak K hu mbaok dalam 2 kapul jeng lac dom urang jakar naih gheih, hu ilamu dalam bruk cấp cứu, tui iek, taong ruak daong ka urang ruak.

Sang iek ruak Hữu nghị Việt Đức brei kapul naih gheih lac dom bác sỹ hồi sức, điều dưỡng thau padang bruk suak yava meng jamriak piah taong ruak siam di abih ka urang ruak dalam gah Meraong. Abih di nyu nan lac, piah ngak hu siam abih bruk di drei, Sang iek ruak Hữu nghị Việt Đức hu caga ginup pandap panda, khan ao pacang caga rup pabhap, saong brei klauk ginup 2 mbang vaccine pacang COVID-19 ka dom urang dalam kapul tame daong Meraong. Sang iek ruak Hữu nghị Việt Đức pilih ruah Sang iek ruak Dã chiến ka 13 di xã Bình Hưng, huyện Bình Chánh, ban raya Hồ Chí Minh piah padang Pasak Hồi sức tích cực ka urang ruak COVID-19 trak haong biak trak.

Kayua radaih cứu thương oh pajeng hu abih 10 tấn pandap panda, jamriak piah ba tame gah Meraong, nan ye, piah samar daong ka bruk pacang caga jit, dom urang y tế di Sang iek ruak Hữu nghị Việt Đức kham merat ba rilo tấn pandap panda y tế tabiak “ga” Hà Nội piah ba tagok radaih pui pajeng tame gah Meraong dalam melam.

Taong abih jeng hu caga blaoh, piah nduac pakacah haong tukvak, sa hatung hatian haong gauk tame pacang jit, daong taong ruak ka urang ruak COVID-19, caong raidiuk siam mekre samar mai veik haong bhap bini pak ini./.

Urang lang: Mousaphuong -15/8