Saai H’Hương Byă, daok di Buôn Cuôr Đăng B, xã Cuôr Đăng, huyện Cư Mgar, tỉnh Đắk Lắk lac sa kreih camin urang kamei Ê Đê tui agama công giáo gam ngak mbang naih joi gam thau khik ramik ilamu di bangsa drei, mekre yau bingu Pơ Lang di kreh ceik glai Tây Nguyên.. Dalam kadha “Kreih camin palei negar” harei ni, daa mik va song tong abih gauk pang kadha vak angaok harak mbao Tin tức hu khan tal kreih camin ngak KT naih joi ni.

Dahlau deih sang saai H’ Hương dok dalam angan lac sang kan kathaot di abih dalam palei kayua oh thau pala drak, bo hu tal 5 urang anek. Rai duik di  sang saai hu salih bahrau hadei di tuk saai hu mbaok tame Kapul urang nong song kapul urang kamei dalam palei. Meng tari tareing song takre bac megru ilamu kỹ thuật, nan ye bein cà phê sang saai tuk halei jeng hajao mekre. Lingiu di nan, saai Hương dok khang hatai mesraiy phun jien di gilang pariak piah blei limo, khak drak pabak ka bruk pala drak. Hu bruk dong di dom kapul nyaom gam song bruk tari tareing di 2 duik pasang, jang yau bruk thau patak patom, bo bruk ‘kurang anak kurang likuk” di sang saai  H’Hương hu samar tapa nao. Urak ni, sang saai hu 2,6ha cà phê, mek tame hu labaih 200 triệu đồng dalam sa thun. Jien duah hu meng phun durieng song rong glang jeng hu jiak 100 triệu đồng dalam sa thun. Meng kan kathaot, saai H’Hương jeng sa urang kamei ngak KT naih joi di abih dalam palei Cuôr Đăng B, urang halei jeng pok meyaom. Saai H’Hương dok abih hatai khik ramik ilamu di bangsa Ê đê, jiak 30 thun tapa saai pambuak pagam song bruk ngak alak cần hu meng muk kei caik veik tapa rilo rai. Angan “Alak cần Amí Dzoan” di saai hu mbaok dalam ban sit Buôn Ma Thuột song dom huyện, dom labik du lịch sinh thái dalam tỉnh, tal Hà Nội, Đà Nẵng, ban raya HCM… song tui takai tuai damuai tabiak tal negar langiu.

 Langiu di “Alak cần Amí Dzoan” hu angan, saai dok roh duah song khik ramik dom pandap panda di urang Êđê, yau Chiêng, ché, ghế kpan. Oh lac ngak KT naih joi, thau khik ramik ilamu bangsa, saai H’Hương dok hu mbaok tame bruk XH dong ka dom adei saai kamei dalam patagok KT. Urak ni, saai lac sa urang dalam Hội đồng bhap bini  xã Cuôr Đăng, urang dalam Ủy ban Mặt trận negar huyện Cư Mgar song iek gah jien ndo di Giáo xứ Thiên Đăng./.