Di palei Nhơn Khánh, xã Nhơn Nghĩa, huyện Phong Ðiền, ban Cần Thơ, hu sa phun gừa tamuh siam hu ralo dhar pak gauk ngak jeng mejam praong ngan saong taneh dhar jaik 3 ribau m2, glaong jaik 12 mét nan ye bhap bini dalam bhum bhian ieu lac mejam gừa. Ralo urang nông daok di labik ini brei thau, di kreih abhap ka 19, hu sa urang likei angan Nguyễn Vãn Thành, bhian ieu lac Cả Thành meng bhum kraong Tiền mai labik ini ngak puh. Meng tuk mai labik ini pasiam taneh, ong Cả Thành hu pala phun gừa ini

      Kuhria tal ini phun gừa hu labaih 150 thun saong but pajaih Nguyễn hu nao tapa 6 rai rah. Anek kamuan bak sang, hu urang daok veik, hu urang nao palei karei ngak mbang min but pajaih Nguyễn jeng salih gauk khik ramik, iek glang mejam gừa. Yaok thun tal harei 28 bilan 2 tui saka ia bulan, mikva but pajaih saong bhap bini daok atah jaik hu mai pataom ala mejam gừa pok gilau, ngak adat paling di miếu Bà Thượng Ðộng Cố Hỷ - amuk kamei yang hu ralo urang iek praong piah likau ka taneh ia siam mekre, bhap bini ginup meda, hajan siam ngin lagaih, ngak mbang hu patagok saong hadar ta long muk dom urang nao peih taneh, padang mbang ngui di bhum taneh ini. Ong Nguyễn Văn Liên-taco ong Cả Thành brei thau:

         "Mejam gừa ini khik ramik hong gauk dalam but pajaih, yaok thun tal harei 28/2 ye anek kamuan pataom mai ini yau harei roya praong gam paling amuk gam rivang tangi piah maong veik but pajaih kayua nao atah, hu tuk ini meng mai ini pataom gauk, but pajaih pambuak gauk jang. Maong phun gừa ye hadar ta ong kaok ong kot caik veik"　 　 　 　 　

     Eng di palei Long Hòa B, xã Long Thạnh, huyện Phụng Hiệp, tỉnh Hậu Giang　hu phun lộc vừng jaik 300 thun. Phun lộc vừng praong ini glaong labaih 20m, chu vi gol labaih 6m. Tui dom urang nông, meng sit hu mboh phun lộc vừng praong di labik ini. Baoh kraong anak jaik phun lộc vừng tamuh atah jaik 3km jeng hu caik angan lac Rạch phun vừng. Tal bilan xuân phun jruh abih hala taha, tabiak dom hala meda, hijao gam saong yaok ribau bingu meraih bak sa bhum palei. Urang nông angan Cao Văn Đáng – umo 86 sang daok jaik phun lộc vừng khan lac:

     "Ong kaok dahlak lac haong ong nội dahlak meng kan hu 4 urang mai ini peih tabeh bloh maong oh thau labik ini angan hagait, bloh tabiak maong mboh phun lộc vừng praong lo, 4 thầy trò drei caik angan rạch phun vừng. meng nan anek kamuan bac tui, padang miếu kakuh gah ala tal harei 16 bilan 3 mai paling. Meng nan tal urak ini bhap bini di labik ini jia tame, ngak mbang hagait jeng mai tal phun lộc vừng ini likau".　

        Iek praong nan ye phun lộc vừng taha, praong hub hap bini labik ini salih gauk iek glang, khik caga meng ldom samar ini mai. Saong phun lộc vừng oh lac phun vô tri, vô giác dalam quyền sờ hữu di eng urang po taneh bo meng lavik mai nyu jeng phun tinh thần hong gauk di abih bhap bini daok di bhum taneh ini. Karja palei bhian hu mboh bruk phản kháng khang di bhap bini tuk cap hu urang khin palai pajoa phun lộc vừng ini. Ong Phan Minh Trí – akaok UB bhap bini xã Đông Thạnh, huyện Phụng hiệp hadar veik:

        "Dom thun dahlau daih jeng hu dom thương gia pandar phun bingu kiểng hu mai tal kênh phun lộc vừng piah brei yaom blei phun lộc vừng min ralo mikva phản ðối nan ye mikva hu ngak harak payua UB bhap bini xã oh brei pablei phun lộc vừng ini tabiak truh  xã Long Thạnh. Kayua phun lộc vừng ini hu meng dom rai ong muk kei caik veik".

      Meda lac, phun kayau hu pambuak pagam saong rai diuk anek menuac, hu mboh dom trun tagok, dom bui sambai atau duh hatai di dom rai anek menuac, di bhum taneh. Kayua yau nan ye, ralo urang sahneng lac, phun oh lac sa thực thể vô tri vô giác bo hu suan yava, kayua rai diuk di phun oh lac hu dom dấu ấn ka sajarah dak rai, ilamu bo daok ndung bak dalam nyu rup binguk amuk kei./.