Meng thun bac 2014 – 2015, thông tư 30 hu peih tabiak ngak dalam taong abih dom sang bac tiểu học dalam taneh ia. Tui jalan taong yaom bahrau ini, salih ka điểm số, gru pato taong yaom tame siphau anek saih tui 3 tanut: oh ka ngak hu, ngak hu saong ngak hu siam,  Panuac taong yaom brei hanjul saong brei pachreih urang bac. Tukvak takik, sổ sách saong kan kandah dalam panuac taong yaom daok ngak suh sah oh takik gru pato. Ngak yau habar brei ka anek saih thau cambaih pren bac di drei meng dom panuac taong yaom? Ngak yau habar hu ginup tukvak piah pasang iek, tui iek, taong yaom saong pachreih anek saih tuk yaok tiết bac tok dui atah 35 minit, daok anek saih bac tuk halei jeng hu 50 adei? Saong ngak yau habar hu kiên nhẫn piah vak veik yaok rituh panuac taong yaom tame siphau karei di gauk tui tacei pato di thông tư 30? Sa gru pato di ban raya HCM ndom ka bruk ini:

“Hadei di tuk peih ngak thông tư 30, anek saih mboh hanjul jang dalam bruk bac daa. Min dom adei bac takik siam jang. Ka dua tra, gru pato ngak sổ sách biak ralo nan ye abih ralo tukvak di dom gru. Drei mboh oh ka taong yaom njauk pren bac di dom adei”.

Tui dom gru pato, urang abih meng 3 tal 5 minit ka bruk vak panuac taong yaom tame siphau anek saih. Sa harei kham merat lo jeng taong yaom hu jaik 10 adei. Yau nan dom adei daok veik yau habar? Nan lac oh ka ndom tal yaok adit, yaok bilan saong trak di abih nan lac puac học kì, yaok gru pato brei taong yaom, vak tame yaok pluh baoh siphau yau: siphau khik iek pato megru, siphau chủ nhiệm, sổ liên lạc, học bạ…. Dalam nan, hu oh takik siphau hu asal kadha dreih yau gauk min gru pato njauk vak nao vak mai, abih ralo tukvak.

Ong Nguyễn Trung Hải, Hiệu trưởng sang bac tiểu học Minh Đạo, Quận 5 brei thau, thông tư 30 hu ngak brei salih barau bruk bac daa di anek saih. Min, meyah mintri pato megru samar hu dom tacei pato dalam bruk patrun patakik sổ sách ye meda hanjul jang ka gru pato

“Tui jalan taong yaom yau nan anek saih oh daok mboh trak damak, dom adei mboh takre, min gru pato mboh glaih glar. Kayua yau nan ye, meyah mintri pato megru meda hu salih jalan taong yaom ye patrun hu trak damak ka gru pato”.

Jeng saneng mboh yau nan, ong Bùi Ngọc Phi, Hiệu trưởng sang bac Tiểu học Nguyễn Trọng Tuyển, quận Bình Thạnh ndom lac, thông tư 30 hu ralo jang lahik. Kadha njauk biai di labik lac, njauk brei ramik veik yau habar piah gru pato oh biak glaih glar saong sổ sách. Meyah samar ba tame pandar sổ điện tử, bruk ba tame thông tin taong yaom hu lagaih jang ka gru pato. Ong Bùi Ngọc Phi lac:

“Gru pato di sang bac thau cambaih bruk taong yaom ini ba mai ralo kein lagaih ka anek saih. Bruk hagait siam ka anek saih, hu kein lagaih ka dom adei ye kol drei njauk ngak. Min dahlak saneng lac, dom gah khik iek vĩ mô njauk ruah duah jang piah ngak yau habar ka thông tư 30 patagok hu abih dom siam lagaih di nyu”.

Hadei di sa thun peih ngak thông tư barau, hu oh takik gru pato caong khin, mintri pato megru brei daong ralo jang piah patrun dom kan kandah ka urang dang pato.

 “Puac học kì 1 atau puac thun, gru pato taong yaom tame sổ sách biak ralo. Mintri meda patrun patakik atau hu jalan ngak siam jang piah daong ka gru pato tok ngak sa mbang atau patrun meneng bruk ngak”.   

“Brei gru pato vak njauk pren bac jeng yau hạnh kiểm di anek saih piah amaik ame hu jalan pasiam veik dom khuyết điểm saong patagok dom labik siam di dom adei piah bac siam jang. Urak ini, dom panuac taong yaom oh ka tantu, amaik ame ỷ veik, mboh gru pato oh chê ye sahneng  lac anek drei bac naih, anek drei jat”.      

Amuk Võ Ngọc Thu, dahlau daih lac akaok jabat pato megru Quận 5 mboh lac, brei hu rilo tukvak jang piah thông tư 30 hu tame dalam rai diuk:

“Ini lac thun akaok meti peih ngak thông tư, kayua yau nan ye, mintri jeng brei caik hatai pang dom panuac. Daok gah gru pato, dahlak saneng lac dom adei saai cứ ngak, dalam tukvak ngak kol drei bac hu ilamu saong khang hatai ndom meyai saong ban giám hiệu. Ban giám hiệu dom sang bac brei daong ka gru pato, jui ngak trak damak ka gru pato”.

Caong khin lac, meng dom panuac rik daong angaok nan, anak tal, mintri pato megru samar ba tabiak ralo jalan ngak cambaih laih jang piah langyah kan kandah bo sang bac daok gaok. Hu yau nan meng patagok hu glaong di abih jalan ngak saong makna di thông tư bak tính nhân văn ini./.