Sa urang ngak ikan ndih tapui tabiak dalam boh sang hu 3 rai nao tasik song 60 urang duik rai meng bruk ngak ikan, hu tal 10 kapan gilai taong ikan song ngak kaya meda meng bruk tong ikan. Nan lac urang ngak ikan angan Lê Văn Hồng dok di phường 2, ban sit Mỹ Tho, tỉnh Tiền Giang, sa urang ba abih rai di drei pambuak pagam haong tasik, hu akaok negar alin brei Huân chương Lao động hạng Ba song Kỷ niệm chương ka bruk ngak ikan. Nhật Trường, urang vak di rayo sap ndom VN dok di bhum taneran krong CL hu kadha vak ka urang ngak ikan naih gheih ni.

Patui jalan di boh sang, thun umo 15,  ong Lê Văn Hồng trun kapan nao tasik tong ikan. Tal thun umo 32, tuk patom hu phun jien, ong Hồng blei sa boh kapan sit 10 tấn piah tong ikan jiak takai tasik.

Tuk nan, kapal gilai taong ikan daok takik, kaya ikan di tasik daok rilo nan ye bruk tong ikan jiak takai tasik di ong jeng hu siam lagaih, rai duik sang ong hu tani tanat song dak harei dak patagok. 

Hadei di nan, kapan gilai dak harei dak rilo, bruk tong chap jaik takai tasik oh dok lagaih tra, ong Lê Văn Hồng khang hatai nao mesraiy jien piah ngak bahrau sa boh kapan tong ikan công suất 25 tấn piah tong chap kaya ikan di kreh tasik atah. Meng ilamu rilo thun dalam bruk tong ikan song kham merat duah labik hu rilo ikan, nan ye bruk tong chap ikan di ong hu rilo kein liba. Patak patom hu phun jien, ong ngak 6 sruh kapan hu công suất meng 400-420 CV (mã lực), tong ikan ngừ Sọc dưa piah pablei tabiak negar langiu. Bloh ong padang DN tư nhân Kim Hằng piah gam tong chap ikan gam ngak ikan, pabak xăng menyek, pandap mbang song blei veik ikan di urang tong ikan di tasik. Njauk menyai nan lac bruk tong ikan ngừ đại dương, ong lac sa dalam dom urang ba akaok nao dahlau di tỉnh Tiền Giang song hu rilo ilamu dalam bruk tong ikan. Ong Hồng brei thau, yaok thun meng bilan 4 saka ia bilan, ikan ngừ Sọc dưa patom rilo di bhum tasik Hoàng Sa song Trường Sa di VN. Janih ikan ni hu dom negar Châu Á biak takre, nan ye ong palih ruah piah tong chap nyu. Meng tuk salih tapa kapan hu công suất prong piah nao taong ikan di kreh tasik atah, kein laba meng bruk taong ikan di sang ong Hồng biak glaong.

Oh padeih di labik nan, sang ong daok hu ngak 4 sruh kapan công suất meng 620-750 CV. Nan ye kapal gilai taong ikan di sang ong Hồng hu tal 10 boh, yaok boh yaom labaih 6 tỷ đồng. Dalam nan hu 6 kapan ngak dịch vụ hậu cần bruk tong ikan song trọng tải labaih 100 tấn/sa sruh. Urak ni, ong lac sa urang tong ikan duy nhất di Tiền Giang hu dom baoh kapan taong ikan  di kreh tasik atah praong di abih saong abih song ngak bruk tui jalan “khai thác khép kín”. Tukvak jiak di ni, kaya ikan taong chap hu di dom baoh kapan di sang ong Hồng hu labaih 5.000 tấn sa thun. Kuhria rah tapa yaok thun, meng bruk nao tasik, sang ong mek tame hu labaih 10 tỷ đồng song ba bruk ngak ka 100 urang ngak. Ndom ka bruk kak kajap haong bruk nao tasik, urang tong ikan angan  Lê Văn Hồng lac: Meng dahlau mai, meng ong, meng ame bloh tal hulin jeng ngak bruk ni. Harei hadei,m hulin jeng pato ka anek bruk nao tasik.. Bruk taong ikan di tasik yaom lac rambah rambeip lo min mbuan duik. Bruk ini ngak mbang hu kayua pablei tabiak negar langiu, ngak mboh hu jang dom bruk karei. Yaom lac hu ribuk min hu karja dong, drei mesraiy jien  ngak tal tra.

Hu bloh 35 thun nao tasik nan ye bruk tong ikan song pacang caga ngin ribuk di urang tong ikan ni biak rilo ilamu. Ong Lê Văn Hồng khan lac, tukvak tapa, dom kapan tong ikan di sang ong hu siam mekre oh ka mbang halei khat lihik kayua  hijan ribuk. Pacang caga ribuk hu rayo sap ndom VN tuk brei thau lac hu ribuk ye drei duah labik piah njaik. Tuk mehit lac hu ribuk ye drei nao tui jalan hangin. Drei điện thoại tabiak chấm tọa độ, adei saai tui nan bloh plaih nao. Njauk di nyu lac kayua drei lavik thun nao tasik hu ilamu, tuk pang rayo khan lac hu ribuk ye drei caga ribuk nao jalan halei piah nyaik  dahlau 2, 3 harei.

Urak ni, umo glaong, pren yava oh daok khang kadang, urang taong

ikan angan Lê Văn Hồng jao bruk nao tasik veik ka dom urang anek. Ong dok di sang tacei pato meng atah, tacei ba bruk ngak mbang, pablei salih di sang drei. Yaom lac sang hu ginup meda song bruk taong ikan urak ini nyu kan kandah jang, langik tasik oh tani tanat min ong Lê Văn Hồng oh ka mbang halei sahaneng tal bruk padeih nao tasik. Ong khan lac, bruk nao tasik nan lac bruk meng kan di boh sang hu mbang tame dalam rilaow darah. Yaom lac bruk ni ndung bak kan kandah, glaih glar, gaok tuk mbuan metai lihik min ong  tuk halei jeng pachreih ba dom urang anek brei kham merat tabiak tasik piah dong khik caga chủ quyền tasik, pulao di taneh ia.

Di phường 2, ong  Lê Văn Hồng dok lac sa urang yau kreih camin, nao dahlau dalam dom bruk jak ba puk palei. Ong kham merat rik dong kadung jien iek glang, dong ka urang kan kathaot patrun kan kandah dalam rai duik. Ong  Nguyễn Hoàng Lâm, Trưởng Khu phố 3, phường 2, ban sit  Mỹ Tho, tỉnh Tiền Giang lac: Sang ong Hồng biak siam song bhap bini puk palei. Dom kadung jien dong ba di puk palei ye sang ong tuk halei jeng rik tame. Talei rohim pambuak bruk song puk paga biak siam. Ong lac sa urang hadah krah

Meng dom jak jeng dalam bruk taong ikan di tasik song abih hatai hu mbaok tame bruk khik caga chủ quyền palao tasik di taneh ia, bilan 3 thun 2014, ong Lê Văn Hồng nan lac sa urang tong chap ikan duy nhất di dom tỉnh ban gah merong hu palih ruah tame danak dak “Giao lưu nghệ thuật trái tim biển đảo” kayua Hội Nhà báo VN peih tabiak di Hà Nội, saong urang tong ikan ni dok hadah mbaok meta hu akaok negar alin brei Huân chương Lao động hạng Ba song  Kỷ niệm chương kayua bruk tong chap ikan./.