Pathau mikva saong taong abih gauk!

Đồng Nai lac tỉnh hu ralo bhap bini bangsa takik ngan saong labaih 192.000 urang meblah jaik 8% menuac sia dalam tỉnh. Bhap bini bangsa daok pataom gauk di bhum atah bayah, diukrai meng bruk ngak nông. Tapa peih ngak dom danak dak, dự án kinh tế - xã hội di tỉnh brei ka bhum urang bangsa takik, tal urak ini, di dom bhum ini kinh tế hu patagok siam, bruk ngak mbang pala drak sangka tal phun pala, janih raong ba mai kein laba glaong. Rai diuk tani tanat, kinh tế patagok, mbaok meta palei pala hadah hadai. Bilan xuân ini, daa mikva saong taong abih gauk gam saong kol dahlak nao rivang palei Lý Lịch 1, xã Phú Lý, huyện Vĩnh Cửu saong palei 4, xã Xuân Hưng, huyện Xuân Lộc, tỉnh Đồng Nai piah mboh bruk bui sambai di mikva labik ini.  

Mai veik palei Lý Lịch 1, xã Phú Lý, huyện Vĩnh Cửu, tỉnh Đồng Nai dalam dom harei jaik tết ini, kol drei mboh hu bruk bui sambai chreih chrai di mikva bangsa Châu-ro labik ini. Oh sambai habar hu, tuk xã Phú Lý barau hu brei angan lac xã palei pala barau. Taha palei Năm Nổi (Nguyễn Văn Nổi) daok di palei Lý Lịch 1 brei thau, dahlau daih mikva daok oh pataom gauk, harei labik ini, harei labik daih rambah rambup lo. Urak ini hu karja padang brei sa palei, mikva daok pataom gauk, tani tanat bruk ngak mbang. Bloh daok hu ngak brei sa baoh sang tah meng kan di urang Châu-ro piah mikva sinh hoạt. Palei bangsa Châu-ro di palei Lý Lịch 1 lac sa dalam 5 dự án định canh, định cư ka 600 baoh sang bhap bini bangsa takik, hu yaom jien buh tame abih tih 11 tỷ đồng, padang ngak dom công trình yau: sang daok, jalan điện, sang bac, blai iek ruak, pakhang pakajap dom kraong ribaong, padang ngak sang ilamu, ngak tatua tuan… Tuk tangi sua ka bui sambai di taha palei Năm Nổi tuk xã hu brei angan xã palei pala barau, ong lac:

“Daok ndom hagait gac, biak siam ye, dahlau deih nao takai saoh, daok urak ini hu hon đa, radaih juak, langiu darak hu radaih khin nao halei jeng hu. Dalam palei dalam xã urak ini hu jalan tuh menyek, hu ia hacih, hu sang bac. Anek bik urak ini thei jeng bac tamat tal 12 abih nan ye kol nyu jak, kol nyu thau. Dahlau daih sap Việt oh thau, oh hu ao cuk, radio oh hu pang. Urak ini bac daa ye hu karja daong, biak siam ye”.

Meng sa palei kan kathaot di tỉnh, tal urak ini, jaik abih 160 baoh sang bangsa Châu-ro jeng hu rai diuk tani tanat. Urak ini, dalam palei daok oh ka tal 10 baoh sang jaik si kan kathaot tui quy định barau di tỉnh Đồng Nai. Langiu bruk buh jien padang ngak hạ tầng saong peih ngak dom sarak an sinh XH, karja labik ini jeng hu quy hoạch dom bhum pala phun hu yaom kinh tế glaong yau: pa-aok, tabau, cao su, pa-aok blait, cam, quýt saong labik raong glang praong tui jalan trang trại yau: pabui, pabe, baya saong menuk ada… daong ka mikva labik ini salih barau rai diuk. Urak ini, ralo baoh sang bangsa Châu-ro daok di palei Lý Lịch 1 khang hatai tame dom bhum pala ini. Ong Nguyễn Đình Biên, akaok palei Lý Lịch 1, xã Phú Lý, huyện Vĩnh Cửu, tỉnh Đồng Nai brei thau:

“Eng mikva bangsa urak ini mikva pala pa-aok blait, bei plom, yaok baoh sang hu sa mẫu. Yaok thun jeng duah hu dom triệu iek tui sản lượng saong yaom kaom. Daok kỹ thuật ye mikva di labik ini hu urang jakar pachreih nông huyện, tỉnh mai ini tacei pato ilamu pala drak, raong glang meng nan mikva pandar ngak biak siam. Pala phun ini oh lagaih ye salih tapa pala phun karei”.

Jeng yau mikva Châu-ro daok di palei Lý Lịch 1, xã Phú Lý, huyện Vĩnh Cửu, mikva Chăm daok di palei 4, xã Xuân Hưng, huyện Xuân Lộc jeng biak chreih chrai tuk thun barau anek sak kara 2016 daok mai jaik. Mai rivang veik bhap bini Chăm palei 4, xã Xuân Hưng, kol dahlak jeng mboh bui sambai tui tuk mbaok meta barau di palei 4 ini hu hadah hadai, rai diuk mikva hu patagok. Bruk gluh bok harei dahlau urak ini oh daok tra. Ong Noru Đin – akaok palei 4, xã Xuân Hưng, huyện Xuân Lộc, tỉnh Đồng Nai chreih chrai khan lac:

Sap Chăm

Tal urak ini, taong abih dom baoh sang di mikva Chăm labik ini hu jalan nding ba ia pandar. Taphia di nan, karja labik ini jeng hu buh jien ngak jaman ka jaik 100 baoh sang gaok kan kandah. Saai Mari Yam – sa urang hu daong ngak jaman mboh biak chreih chrai, saai lac: tết ini sang saai oh daok kuhria labik vệ sinh tra, dahlau daih tuai mai sang me-in, oh hu jaman mboh biak kandah kandaiy. Dom anek di saai biak takre tuk hu jaman:

Sap Chăm

Jalan tame palei hacih, mekre, jeng ngak ka dom takai yam nao me-in thun bahrau di bhap bini labik ini hu mbuan lagaih jang. Taphia dom urang nao takai lac dom sruh radaih "tay ga" dua kong nduac bingi angaok jalan, ngak ka dom blah khan me-om di dom kamei dara Chăm par tui ngin, dalam pandiak hasit di langik li-ar, nyu ngak ka urang var nao bruk glaih glar di rai diuk yaok harei.

Ndom ka bruk salih barau bhum urang bangsa takik, ong Điểu Bảo – akaok mban bangsa tỉnh Đồng Nai brei thau, oh ta-eng hagaih dua palei Lý Lịch 1 saong palei 4 ini, bo jaik abih mbaok meta bhum bangsa dalam tỉnh Đồng Nai jeng hu salih barau.

"Meyah duk saong 5 thun, 10 thun dahlau ye rai diuk di mikva bangsa salih barau biak ralo. Mbaok meta palei pala bhum urang bangsa takik dak harei dak hadah hadai. Meyah kol drei hu tuk mai rivang bhum Đồng Xoài saong Đức Thắng ye jalan điện nao kreih bhum bhap bini daok, melam hu pui hadah. Dahlau daih jalan gluh bok urak ini hu tuh menyek".

Xuân mai hu ba bui sambai tal, abih di nyu nan lac Xuân anek sak kara 2016 ini dak hu makna jang tuk taneh ia drei barau peih ngak hu jak jeng nyaom roya Đảng pakat negar mbang ka 12. Bloh meng ini, Đảng drei hu dom quyết sách barau peih tabiak jalan ka dom bhum bhap bini bangsa patui bruk patagok. Piah ka bilan xuân thun hadei, kol drei hu daoh veik kadha daoh Đảng hu brei drei sa bilan xuân bak hatai caong. Sa bilan xuân ba pandiak hadah tal grauk labik./.