Danak dak “Paga pacang an ninh trật tự”

Dalam chreih chrai uan raok noel thun ni, bruk bui sambai di mikva daok di xứ đạo Định Bình – Long Thới yau hu patagok jang rilo mbang, tuk xã jaik ngak salah bruk padang ngak palei pala bahrau paglaong. Ni lac sa dalam dom xã camriep di tỉnh Trà Vinh mek hu jalan ba tabiak lac ngak salah dom asal kadha di bruk padang ngak palei pala bahrau paglaong di thun anak tal.

Jalan atah labaih 2 km, praong 2,5m nao tapa ấp Định Bình, sa dalam dom  jalan puac abih hu ngak pasiam, peih praong tui kadha bahrau hu tuh bê tông saong hu peih tabiak pabak ka bruk nao mai. Piah hu jalan praong, samu, tapak ni, hu bruk rik prein ngak, taneh riya, njam patam di bhap bini tui agama di pak ni. Ông Nguyễn Ngọc Thông, sa baoh sang tui agama halain hatain alin labaih 400 mét vuông taneh peih praong jalan ni chreih chrai brei thau: “Cha sở haong karja pambuak gauk jak ba pathau khan tal mikva, langyah brei drei thau cambaih ka kein laba di puk palei. Drap ar thei jeng damen, taneh lac ameh min kayua kein laba haong gauk, nan ye mboh biak chreih chrai. Oh lac ta-eng dalak bo mikva pak ni thei jeng halain hatain alin taneh, njam patam. Ngak jalan bê tông thei jeng uan tabuan, hu manuac yaok harei yaok puh ramik jalan”.

Oh lac halain hatain pachreih tui, ba tangin tame padang ngak jalan mbak, padang ngak dom kadha ilamo, Định Bình daok lac labik camriep di tỉnh Trà Vinh padang ngak danak dak “Paga pacang an ninh trật tự” di thun 2012. Saong bahrau ini di 04 jalan praong tame palei hu caik 04 baoh camera pasang iek luac harei melam, yaom jien buh tame ngak abih 26 triệu đồng, rilo meng lac kayua bhap bini rik tame. Danak dak ni ba mai siam lagaih saong daok hu peih praong di rilo palei karei, rik daong biak praong dalam bruk ngak salah asal kadha an ninh, trật tự dalam bruk padang ngak palei pala bahrau di Trà Vinh. Ông Trần Văn Thành – sa urang tui agama di họ đạo Định Bình brei thau: “Bruk an ninh trật tự dahlau di tuk ka oh hu pabah mbang jang biak kan kandah. Dom bruk klaik mek asau rahtabiak yaok harei, min tuk padang ngak pabah mbang jang bruk ni hu trun biak rilo. Langiu di pambah mbang pacang caga kol co klaik, mikva daok hu rik pataom jien padai ngak gheng điện truac hadah”.

Xã Long Thới hu urang Công giáo jaik 60% menuac sia dalam xã. Mikva Công giáo pak ni sangka patagok kinh tế, pachreih tui danak dak padang ngak palei pala bahrau, saong tuk pakat ủy Đảng, karja, kapul nyaom ba tabiak dom bruk jak ba, yau ye ““Taong abih bhap bani gul pataom dak padang raidiuk ilamo di puk palei”, “harei ngak brei ka urang kathaot”, danak dak “pachreih bac, pachreih megru”… jeng abih drei ngak tui, ba akaok nao dahlau lac Ban Quới chức họ đạo. Meng dom danak dak ni hu daong biak rilo ka bruk paglaong raidiuk saong mbaok mata di puk palei. Abih di nyu nan lac danak dak “pachreih bac, pachreih megru”, yaok thun Giáo xứ Rạch Vồn - Đinh Bình hu buh tabiak labaih 150 triệu đồng piah alin hadaih pandap saong brei jien bac ka anek kamuan dalam họ đạo. Kadung jien ni hu meng ngak bingu kiểng, 4,5ha bien li-u di giáo xứ saong bruk rik daong di bhap bini tui agama. Ông Nguyễn Thanh Hải, dahlau daih ngak akaok MT negar xã Long Thới brei thau: “Dahlau dieh raidiuk urang công giáo kan kandah jang urak ni. Jalan nao mai jeng biak kan kandah, njauk blei patau di Thất Sơn (An Giang) mai tauk, kan nduac radaih min nao takai lac mbuan. Hadei di nan hu kanja tuh bê tông, blaoh urak ni hu tuh menyek, sang haleijeng hu điện, hu ia, jalan puk palei jeng hacih, mekre, raidiuk di bhap bini dak harei dak tagok jang”.

Urak ni jien mek tame kuhria tui akaok menuac di xã hu labaih 60 triệu đồng/sa urang, glaong jang dua mbang dut saong dahlau di tuk salih jalan ngak mbang. Urak ni xã mek hu 19/20 asal kadha palei pala bahrau paglaong saong kham marat ngak salah kadha palei pala bahrau paglaong di thun anak tal. muk Kim Thị Sa Pha, Bí thư Đảng ủy xã Long Thới brei thau: “Dalam xã hu 04 nhà thờ, dalam nan Nhà thờ Định Bình mikva tui agama jeng yau giáo xứ rik daong biak rilo dalam bruk padang ngak palei pala bahrau. Sarak di Đảng bộ ye kham marat padang ngak palei pala bahrau paglaong di thun 2021”.

Hangin barak puac thun daok tuh mai, urang xứ đạo Đinh Bình– Long Thới daokchreih chrai uan raok harei noel. Mikva pak ni biak uan tabuan kayua drei hu rik prein tame padang puk paga, palei negar tui jalan “diuk siam makre dalam hatai bangsa piah duh ka haniem phul di bol bhap rahra”./.

Urang lang: Thu Thảo – 24/12