Bilan hajan ini, thung lũng Đăk Hlơ (huyện Kbang, tỉnh Gia Lai) bak sambo hijao di phun tabau. Ong Tống Văn Giang, daok di palei 4, xã Đăk Hlơ brei thau, bhum ini rilo meng lac taneh meluk cuah, lagaih haong phun tabau. 3 thun peih ngak danak dak di taneh ia padang ngak palei pala bharau jeng lac 3 thun, ong saong mikva dalam xã jhul khang bruk ba tame pandar dom ilamu khoa học – kỹ thuật,ba jamriak tame bruk pala drak, ba pajaih bahrau tame pala.. Kein laba hu mboh cambaih, năng suất tabau meng 60tấn sa hecta tagok jeng 100 tấn yaok hecta, hu labik hu tal 130tấn sa hecta. Urak ini ong Giang saong  15 baoh sang karei dalam xã Đăk Hlơ  daok ngak iek bruk padang mblang hamu mẫu praong di angaok taneh jaik 13ha piah patui jalan patagok dom kein lagaih di khoa học, kỹ thuật dalam bruk pala phun tabau. Ong Tống Văn Giang lac:

 “Tuk sang mac ba tabiak bruk padang mblang hamu mẫu praong ye drei nao jak ba mikva, mikva njauk hatai ye drei ngak. Mboh hu jang gah lingiu, dalam mblang hamu mẫu praong bhap bini hu kein, phun jien hu sang mac buh tabiak bo oh mek laba. Daok khak saong gluh piah ngak pasaoh taneh ye sang mac brei saoh. Li-ua ye hu sang mac li-ua dalam jang, siam jang.”

 Hu lingik tasik,taneh riya siam lagaih haong phun tabau, hu bruk daong pren di sang mac saradang An Khê saong bruk kham merat di bhap bini dalam palei, mô hình mblang hamu mẫu praong anak tal meda hu pambak praong, piah ba mai kein laba praong jang ka  xã Đăk Hlơ, huyện Kbang.

 Gam saong dom salih bahrau dalam bruk pala drak, mbaok meta palei pala bahrau di xã Đăk Hlơ jeng hu slih bahrau. Meng hatai khin ngak, bhap bini dalam xã hu pataom pren, rik pandap piah padang ngak jalan nao mai dalam palei, dalam mblang hamu. Mbiah tal harei ini, hu labaih 90% jalan dalam xã Đăk Hlơ, atah labaih 8km hu tuh menyek, tuh bê tong, lagaih ka bruk nao mai saong pajeng ba pandap panda. Ong Nguyễn Thanh Phượng, daok di palei 3, xã Đăk Hlơ brei thau:

“Bhap bini dalam palei pachreih tui lô, kayua jalan ini dahlau deih nyu khut, nyu gluh baok, nao mai kan kandah. Tuk hu danak dak palei pala bharau ye karja daong, bhap bini gam ngak, bhap bini chreih chrai lô. Dahlau deih oh hu jalan yau ini, urak ini ngak salah bloh mboh palei hacih sa-at, thei jeng uan tabuan.”

 Gah la patagok, bruk ngak mbang hadah hadai hu pachreih rilo mikva di Đăk Hlơ buh jien tabiak padang ngak sang danaok. Ong Nguyễn Văn Thắng, daok di palei 2, xã Đăk Hlơ brei thau, meng jien patak pataom hu dalam rilo thun tapa, sang ong daok buh tabiak jaik 1tỷ đồng piah padang ngak sang bahrau:

“Sang mboh lac ngak sang ye brei ngak ka nyu khang, kajap, mekre iek, lagaih haong labik daok peih ngak danak dak padang ngak palei pala bahrau.”

 3 thun tapa, di xã Đăk Hlơ hu jaik sa rituh baoh sang pakat 3 saong pakat 4 saong yaom jien buh tame yaok baoh sang yaok rituh triệu đồng, hu sang hu buh tame labaih sa tỉ đồng hu padang ngak. Dom baoh sang praong, mekre hu padang tagok di kreh dom bein tabau hijao, au brei mboh bruk patagok di bhum taneh ini.

  Maong iek veik 3 thun peih ngak danak dak padang ngak palei pala barau, ong Trần Hữu Phước, Chủ tịch Ủy ban bhap bini xã Đăk Hlơ, huyện Kbang chreih chrai brei thau, praong di abih saong jak jeng di abih jeng lac dom salih bharau dalam jalan sahneng, jalan ngak dib hap bini. Bruk salih bharau nan hu ba mai dom kein laba siam lagaih mboh di anak meta.. Pagap yau, di angaok mblang taneh praong jaik 1700ha, jeng pala phun tabau min jien mek tame kuhria tui akaok menuac dalam xã urak ini hu jaik 28 triệu đồng sa người, rilo jang jaik 2 mbang dut saong thun 2011. Dalam xã hu 800 baoh sang, min urak ini daok hu 50 baoh sang kan kathaot min. Ong Trần Hữu Phước lac:

“Akaok sahneng nan lac kadha bo kol dahlak caik hatai sangka rilo di abih. Tuk bahrau ngak, urang jakar jeng mboh tatuak drei, ndom hagait tal bhap bini. Tuk peih ngak yau nan, kol dahlak langyah brei thau cambaih laih tal yaok urang jakar dahlau, bloh hadei di nan tal bhap bini. Tal tuk kol dahlak khan brei bhap bini thau ye bhap bini ngak, karja tok daong palagaih ka bhap bini ngak. Bloh bhap bini mboh lac drei hu kein laba meng bruk ngak nan.”