Dom harei kuhria caga ka bruk pahadar 40 thun padang sang bac THPT bangsa gam bac gam daok Nơ Trang Lơng, gru Trương Văn Nòi drut drui hadar veik tukvak jaik 40 thun dahlau, tuk bahrau mai ngak bruk di sang bac “ Gam bac gam ngak”.  Sang bac hu ramik veik meng sa nông trường ngan saong dom khu lán trại daok tapen baoh craoh sit jeng daok sarak dalam glo akaok di gru Trương Văn Nòi. 40 thun dak padang, urak ini sang bac Nơ Trang Lơng, praong, siam, hu dom tal sang glaong, dom sang chức năng dalam mblang bein luac thun halui li-an saong bak bingu. 40 thun mboh bruk salih bahrau jeng lac sa dalam dom urang rik pren yava tame padang ngak sang bac hu angan urang anh hùng Nơ Trang Lơng, gru Trương Văn Nòi oh padauk hu bruk uan tabuan:

“ Tapa 40 thun, sang bac bangsa gam bac gam daok Nơ Trang Long hu salih bahrau biak rilo janih. Dahlau di abih lac cơ sở vật chất, hu padang tagok meng sa sang bac nông trường, cơ sở vật chất oh hu hagait, duk bilik lac dom sang kayau. Urak ini sang bac praong, siam, hu ginup cơ sở vật chất pabak ka bruk pato saong bac”.

Jeng lac sa dalam dom gru pato kak kajap haong sang bac meng tuk camereip, gru Nguyễn Kim Anh, Hiệu trưởng sang bac brei thau, dom harei camereip bahrau padang tagok, cơ sở vật chất oh ka hu hagait, labik gam daok saong duk bac di 2 khu atah gauk 1km jalan glai. Meng gru pato tal anek saih jeng samar yam tapa dom kan kandah meng bruk bac da-a, lao động sản xuất di sang bac tui jalan  “ Gam bac- gam ngak” piah hu siam mekre yau harei ini:

“Dahlak lac sa dalam dom urang camereip hu mbaok di sang bac dalam dom harei akaok meti di dom thun 80 abap dahlau. Kol dahlak lacdom urang hu pato pakai di bhum taneran tagok ini piah ba akhar haroh tagok ceik glaong piah pato pakai hu dom urang jakar bangsa takik pabak ka bruk cakrok patagok kinh tế xã hội di tỉnh . Dom harei camereip njauk ndom lac, dom rai gru – saih biak kham merat meng ngak hu bruk gam bac, gam ngak. Harei adit kol dahlak saong anek saih njuak tame glai tak njuh, saong daok njauk pacang dom bruk ngak di kol Funro”.

Piah pato pakai dom dam dara jeng dom urang ngak hu ilamu, hu pren yava, pabak hu bruk cách mạng di puk palei, dalam 3 thun camereip bahrau padang, sang bac tok cử tuyển dam dara dom bangsa takik, anek di liệt sỹ, anek di sang hu urang ngak bruk cách mạng tame bac pakat 1, pakat 2 saong hệ bổ túc văn hóa pakat 3. Hadei di nan, sang bac salih tapa tuyển sinh tal 10 hệ phổ thông trung học meng dom bhum oh ka hu sang bac pakat 3 dalam tỉnh Đăk Lăk. Bilan 8 thun 1984, piah “samar pato hu 30 ribau urang jakar bangsa takik”, sang bac hu peih praong bruk pato pakai tal jaik 1.200 anek saih. Thun 1991, sang bac hu salih angan jeng “Sang bac THPT bangsa gam bac gam daok Nơ Trang Lơng” saong khik miat mbiah tal harei ini.

Chất lượng pato saong bac di sang bac dak harei dak hu rilo salih bharau khang. Ta-eng thun bac 2014-2015 meng bloh, sang bac hu tal 93,6 % anek saih dom tal 12 pakacah đậu tame  đại học.  Tal urak ini, sang bac hu 6 anek saih joi pakat negar saong rilo anek saih joi Olympic dom tỉnh gah meraong, anek saih joi pakat tỉnh. Dalam luac 4 pluh thun dak padang saong patagok, meng sang bac ini hu jaik 6 ribau anek saih tamat trung học phổ thông. Rilo anek saih dalam dom anek saih nan urak ini daok ngak praong pan akaok dom pakat, jeng dom gru pato, dom kỹ sư, nhà báo, sĩ quan… Dom rai gru pato, dak mboh hadah mbaok meta jang tuk hu pato di sang bac angan Nơ Trang Lơng Nơ Trang Lơng anh hùng bangsa. Anek saih Niê Đức Thịnh, khan lac:

“Adei biak uan tabuan tuk hu bac di sang bac ini.  Adei bac hu biak rilo janih, meng akhar haroh tal dom bruk  thể dục thể thao,ilamu, daong ka adei thau hu biak rilo ilamu, kỹ năng. Adei jeng kham merat bac da-a piah mek hu siam mekre di abih, njauk saong angan di sang bac”.

40 thun dak padang saong patagok, sang bac THPT bangsa gam bac gam daok Nơ Trang Lơng kham merat piah jeng 1 dalam 5 sang bac THPT mek hu chuẩn di tỉnh Đăk Lăk, hu akaok negar alin brei Huân chương Lao động hạng Ba. Dom angan je praong glaong nan, hu meng kham merat oh thau glaih glar di rilo rai gru – saih, urang jakar, urang ngak dalam sang bac. Nan oh njauk lac bruk ngak brei hadah mbaok meta, bo daok lac pren pachreih ba khang piah patui jalan brei mboh labik dang di sa sang bac phổ thông trung học bangsa gam bac gam daok hu angan urang anh hùng di bhum taneh Tây Nguyên./.