Sang bac trung cấp Pali – Khmer tỉnh Trà Vinh hu ba tame pato meng thun bac 2014 – 2015. Ini lac sang bac ka 2 di bhum taneran kraong Cửu Long brei ka tăng sinh khmer, hadei di sang bac bổ túc ilamu pali trung cấp Nam bộ di tỉnh Sóc Trăng. Min danak dak bac di dua sang bac ini nyu karei di gauk. Meyah yau sang bac bổ túc ilamu pali trung cấp nam bộ piah pabak ilamu meng danak dak tiểu học tal trung học phổ thông, dalam nan danak dak phổ thông meblah 75%, danak dak Pali – khmer 25% ye sang bac trung cấp Pali – khmer tỉnh Trà Vinh tok di pato apkat trung học phổ thông dalam nan danak dak phổ thông saong dom kadha bac pali – Khmer, Phật pháp samu gauk. Meng danak dak bac yau nan yaom lac nyu trak jang duk saong dom hệ pato megru karei min nyu pabak hu hatai caong di mikva tui agama kayua gam bac hu danak dak phổ thông gam bac hu danak dak phật học trung cấp – sa bruk hu bhap bini Khmer Nam bộ iek praong. Ong Kim Sang – phaok UB bhap bini MT negar tỉnh Trà Vinh lac:

 “Tỉnh brei padang sang bac trung cấp Plai – Khmer piah likei dam Khmer nao tu di dom baha oh ka bac phổ thông ye hu bac ilamu, sap Khmer taphia di nan gam hu bac danak dak phổ thông, piah hu bac tagok ĐH atau sang bac karei piah paglaong ilamu. Nan lac bruk kol dahlak biak njauk hatai saong pok meyaom”.

Piah mek hu kein laba, di khóa bac akaok meti sang bac tok peih sa tal piah gam pato gam rút kinh nghiệm. Dom urang hu tame sang bac nan lac dom tăng sinh hu chứng nhận sơ cấp Pali – Khmer saong chứng nhận tamat THCS. Anek saih hu brei labik daok, brei tapuk siphau… hadei 3 thun bac tamat hu tut angan tame pakacah di dom sang bac cao đẳng, ĐH. Dalam tuk kapul gru pato hu palih ruah nan lac dom gru pato naih, pato saim, hu ralo ilamu saong brei hu kapul jum pataom ong bhik ranam taneh ia tỉnh Trà Vinh ba tame. Tăng sinh Thạch Văn Ngọc brei thau:

 “Dom học viên tui bac jeng taduan hu jien bac 920 ribau đồng sa bilan ginup piah kuhria bruk bac yaok bilan. Daok tapuk siphau , pandap bac daa, labik daok jeng hu karja daong”.

Yaom lac oh kuhria ka jien padai, tapuk siphau min dom kadha bac rilo jang jaik dua mbang duk saong danak dak pato megru thường xuyên urak ini. Dalam nan di hệ pato megru thường xuyên, langiu dom kadha urak ini, daok hu kadha Anh Văn saong tin học. Daok hệ trung cấp Pali – Khmer hu dom kadha phật pháp căn bản saong ariya Khmer… Langiu danak dak bac da-a, sang bac daok daa dom jabat hu pambuak tal mai khan brei thau bruk thời sự, chính trị atau tacei pato ilamu meng kan, makna sajarah dak rai dom harei rija dalam thun, abih di nyu nan lac brei thau ka jalan ngak di Đảng, hukum di karja. Kayua yau nan ye học viên brei bac 2 var sa harei meng tui dil danak dak, dalam tuk dalam thun hu biak ralo rija roya di agama saong dom tăng sinh brei hu mbaok tame ngak adat, nan ye dom học viên kham merat biak ralo meng bac hu siam. Tăng dinh Kim Tuấn brei thau:

 “kayua adat cambat di urang Khmer hu ralo rija, roya,  nhà sư njauk padeih bac piah ngak adat cambat nan ye bhian trễ danak dak bac kayua yau nan ye lớp brei bac pabak saong gru jeng halan hatian pato. Danak dak yaom lac trak min kham merat ye học viên tui hu. Abih di nyu nan lac tuk tamat danak dak phổ thông ye sap Khmer jeng mek hu ilamu tương đương, nan ye bian an tâm meyah tame ĐH”.

Tui bruk ba tabiak, hadei di yaok thun bac, sang bac trung cấp pali – Khmer tỉnh Trà Vinh hu patagok meng 1 tal 2 tal saong tal thun bac 2017 – 2018 hu 6 tal bac tani tanat hu 240 học viên. Yaom lac yau nan min tal urak ini sang bac jeng oh ka hu labik bac di drei saong daok nyim labik baha Kompong – inem krung kiến trúc pakat negar daok di phường 1, ban Trà Vinh piah bac. Ueak ini UB bhap bini tỉnh TV hu ba bruk padang sang bac trung cấp pali – Khmer tame bruk đầu tư trung hạn, dalam tuk sở pato megru daok kham merat duah labik lagaih piah dom học viên hu sinh hoạt agama lagaih di abih dalam tuk tui bac 3 thun di sang bac. Ong Lê Văn Hẳn, phaok akaok UB bhap bini tỉnh TV brei thau ka jalan ngak di anak tal:

 “Ndom ka sang bac pali tuk hu padang tagok tal urak ini labik bac jeng daok gaok kan kandah. Piah lanyah bruk ini UB tỉnh hu tacei pato brei ba tame kế hoạch đầu tư trung hạn, ngak habar piah khik kajap hu quy mô sang bac tal bac. Ka dua tra jao ka sở pato megru palih ruah labik lagaih saong samar ngak hồ sơ dự án piah pasang iek buh jien tame ngak dalam tukvak samar di abih”.

Tỉnh TV hu labaih 320.000 bhap bini bangsa khmer, meblah jaik 1/3 menuac sia di tỉnh. Dalam tỉnh hu 142 baha phật giáo Nam tông khmer hu labaih 3.600 ong bhik daok tu bac di dom labik baha. Bruk padang sang bac trung cấp pali – khmer nyu pabak hatai caong di urang khmer, rik daong jhul pakhang bruk pabak menuac urang hu ilamu dalam bhap bini, ong bhik khmer, taphia di nan rik daong tame bruk khik ramik saong patagok ilamu hadah krah di bangsa./.