Rilo urang ruak ndik pak labik dok cang bac sy

Bác sỹ Trương Quang Anh Vũ, akaok jabat Kế hoạch Tổng hợp, sang iek ruak Thống Nhất brei thau: yaok harei sang iek ruak taduan labaih 3.000 urang ruak mai taong ruak ngoại trú. Di pak ni jeng daok taong ruak ka jaik 1.000 urang ruak ndih veik di sang iek ruak, rilo abih lac urang praong thun, hu ruak dahlau dalam rup, mayah rahtabiak jit ruak Covid-19 ye mbuan njom ruak biak glaong. Kayua yau nan ye, dom urang mai taong ruak ka oh hu tauk stick brei thau lac pathau khan blaoh, dut iek nhiệt độ meda njauk pacang veik tuk tame dom khoa. Sang iek ruak ieu kakei dom urang ngak gah y tế jeng njauk pathau khan y tế yaok harei. Dom urang nao mai meng dom tỉnh daok hu manuac njom Covid-19 jeng hu dut iek dalau di tuk mai ngak bruk veik.    

Sang iek ruak Thống Nhất hu peih mbang pasram ngak veik, ba tabiak dom jalan ngak dahlau mayah hu manuac njom ruak saong jalan langyah. Sang iek ruak jeng hu ba tabiak dahlau dom bruk jhak abih, dalam tuk rilo khoa oh tame tabiak hu tuk hu rilo urang dương tính saong SARS-CoV-2, abih di nyu nan lac jalan ngak tuk jit ruak njom mbak tame dom khoa praong yau ye gah hồi sức cấp cứu, bilik blaic raih… Bác sỹ Trương Quang Anh Vũ brei thau:

"Urang ruak praong thun gaok kan kandah tuk mai tal sang iek ruak ye hu brei taong ruak di sang. Sang iek ruak daok kuhria bruk pabak jru di sang ka urang ruak, urak ni daok pasram ka dom urang ngak bruk, kayua bruk pabak jru di sang daok gaok rilo tavak tavaiy, njauk ngak tani tanat piah hu biyar jien tui BHYT".

Daok di sang iek ruak Nhi đồng 1, TP.HCM, Bác sĩ Trương Hữu Khanh, akaok jabat Công tác xã hội brei thau, sang iek ruak hu 2 kapul ngak bruk iek gah pasang iek y tế pacang caga jit. Sa lac kapul khik caga hu 2 tal 3 urang, hu brei daok di dom pabah mbang piah dut iek rup pabhap, ieu kakei urang tame sang iek ruak njauk pathau khan y tế. Kapuk ka dua ngak bruk mek khau tin dịch tễ, tuk mboh  mbuan njom ruak samar drah ba nao mek mẫu dut iek.

Tui Bác sĩ Trương Hữu Khanh, ngan haong dom urang pathau khan oh njauk ka bruk nao mai, jeng hu jalan piah duah mboh aval abih, pacang cakak jalan njom mbak. Bahrau ni, sang iek ruak Nhi đồng 1 taduan hu sa urang ruak nao meng labik hu jit di Đà Nẵng tame taong ruak, bo pathau khan lac daok di ban raya HCM, min samar thau tuk hu bác sĩ duah thau ka prein yava di bilik taong ruak. 

Kayua yau nan ye, tui bác sĩ Khanh, oh jia hu bruk pathau khan y te tuk camriep, bo tuk ngak harak gar taong ruak atau tuk ngak harak tame sang iek ruak  ka manuac ruak, dom khau tin ni njauk hu sua tangi veik. Abih di nyu nan lac, bác sĩ taong ruak lac manuac khik caga puac abih tuk sua tangi tapak ka ruak, thau hu dom mbang taong ruak tui BHYT, tapa iek ruak, taong ruak ka manuac ruak:

"Urang ruak bhian pilih ruah taong ruak di sang iek ruak praong, siam, nan ye drei oh mbuah urang hu. Bo mayah urang nan mboh mbuan njom ruak ye drei njauk pathau khan min, ka dua veik lac njauk pasang iek ka nyu siam. Di sang iek ruak Nhi Đồng 1, pathau khan y tế blaoh, bác sĩ dalam bilik taong ruak sua tangi veik, tagok khoa tangi veik, tame sang iek ruak tangi veik sa mbang tra".

Di sang iek ruak Chợ Rẫy, bruk pasang iek, pato tacei bhap bini tame tabiak hu peih ngak biak catang. Urang ruak hu jalan nao sa gah, brei pathau khan y te di dom mbaik mac điện tử hu thau cambaih mbaok manuac. Di hành lang sang iek ruak, klaok ia rao tangin pametai anek ruak caik ka manuac ruak rao tangin gam gam hadei di tuk taong ruak blaoh. Min, jeng hu dom urang tal tuk tame gaok bác sĩ ye meng thau lac mbuan njom jit ruak.

Bác sĩ chuyên khoa 2 Phạm Thanh Việt, akaok jabat Kế hoạch Tổng hợp – sang iek ruak Chợ Rẫy brei thau:

"Dom janih ruak mbuan njom yau ye ruak tangi, idung, tarakaong, ruak jalan suak yava, lac dom janih jaik dreih haong Covid-19, mbuan klaak tapa ye hu brei tame salabik karei. Sang iek ruak jeng peih bruk pasang iek, abih di nyu nan lac ka dom urang mai meng dom tinh, bal hu jit ".

Ban raya HCM lac labik mbuan njom mbak jit ruak biak glaong. Abih di nyu nan lac di dom sang iek ruak praong, tuyến cuối, dom khoa taong ruak praong hu urang ruak lavik dalam rup, atau hu rilo urang ruak daok pagam pambak tame mac jamraih, bruk diukrai lac biak takik, mayah njom Covid-19 lac biak kan kandah. Mintri Y tế bahrau ni hu tabiak harak ieu kakei dom sang iek ruak samar drah patagok bruk peih ngak tui 8 jalan piah pacang caga jit ruak Covid-19. Oh ka hu tuk halei yau tuk ini, dom sang iek ruak njauk peih ngak catang dom kadha ni, rik tame khik Salamat ka prein yava di bhap bini./. 

Urang lang: Thu Thảo -17/5