Labaih 10 harei ni mai, meng di tuk rah tabiak bruk apui mbang khuah 12 boh sang di palei Kon Sơ Lăl klak, amuk Ien dok mebuk hatai mong iek song biak damen ka boh sang pambuak pagam haong amuk jiak abih rai. Amuk Ien oh khin jia tame dom hagait mong mboh, yaom lac anak meta sa mbuk ging pui song dom mbaik gheng khuah jhuk. Amuk brei thau, boh sang hu meng labaih 50 thun dahlau, tuk amuk bahrau tok pasang, hu amaik ame song gauk gar padang brei. Boh sang kayau tauk tabung hala, daneing haluk, yaom lac đơn giản  min nyu bak ia hauk di amaik ame song gauk gar nan ye tui amuk nyu biak hu yaom glong. Dahlau deih, hu thau dom gheng sang di amuk ngak meng kayau trắc, hu rilo menuac mai khin blei yaok boh gheng yaom yaok pluh triệu đồng, min amuk khang hatai oh pablei. Jeng piah dong ka puk paga, khik tamo palei Kon Sơ Lăl. Min dalam sa biar harei, hu sa mbang hajan ribuk, jakala klaak trun palei, ngak khuak boh sang. Muk Ien drut droi lac:

Drei hu sang bahrau di palei bahrau, min khin khik veik sang klak ka anek taco harei hadei thau ka ilamu meng kan di ong muk. Min urak ni khuak abih ye, oh dok hagait. Damen lo .

Atah di labik amuk Ien dok la dom pluh takai yam, taha Chưng, urang taha di abih dalam palei Kon Sơ Lăl, dok la anak sang (boh sang di taha Chưng patuah oh khuah), dok paik capi Goong song doh dom kadha doh bhap bini pang mboh biak drut drui. Taha Chưng oh daok hadar truh drei thun ini umo 80 atau 90. Taha kuhria lac, drei duik ka nyu abih dom harei dok veik di rai drei dalam palei meng kan, dalam boh sang hala, bui sambai song mbaik capi Goong. Min urak ni sang rong oh dok, mikva puk palei dok yah dom baoh sang daok veik piah tapa daok palei bharau, taha jeng daok cang yah sang, tabiak nao haong anek taco. Taha Chưng lac:

  “Taha ndih tapui di labik ni, prong tagok di labik ni song kurhia tui ong muk ong kei di labik ni. Min urak ni sang rong khuak abih ye, dom baoh sang daok veik, oh khuak min dok yah, taha jeng nao labik karei. Damen ka boh sang rong, damen ka palei meng kan lô,  khik hu dom thun ni mai,  urak ni nyu khuak abih.

Palei Kon Sơ Lăl klak lac sa dalam 9 palei lavik saman di urang Ba Na di xã Hà Tây. Dahlau di tuk khuah, palei jeng dok khik hu boh sang rong meng kan song jiak 50 boh sang kayau klak, hu tabung tuak hala, daning haluk atau krein hala. Oh lac ba mai yaom glong gah kiến trúc, sajarah dak rai, dom boh sang di Kon Sơ Lăl daok hu yaom glong kayua hu ngak meng kayau trắc, sa janih kayau quý hiếm. Kayua yau nan ye, thun 2002, tuk salih mai dok di palei bahrau, mikva oh yah dom boh sang kayau siam, bo khik tamo. Min bala meng langik tasik tuh trun palei. Hu biak rilo urang anit ilamu meng kan biak damen tuk thau lac palei Kon Sơ Lăl - sa palei mekre yau rup cih, dok di ala takai ceik Chư Păh, njauk cakala klaak khuah. Nghệ sĩ nhiếp ảnh Nguyễn Linh Vinh Quốc lac:

 “Palei dok khik tamo yau meng kan urak ni hu palei Kon Sơ Lăl ni. Adei saai khol hulin, dom urang takre thaot binguk bhain tagok pak nan. Mehit cakala klaak khuak sang rong ye khol hulin drut drui, hu urang sraiy ia meta tuk mehit khuah sang rong. Ngak habar hu veik. Duah halei hu sa labik mekre, tamo yau palei Kon Sơ Lăl.

Dom boh sang dok veik di palei Kon Sơ Lăl klak, patuh oh njauk apui mbang, dok hu urang yah klaak piah nao daok palei bahrau. Kayua lac, oh dok sang rong, palei oh daok brei menuac iek glang, khik caga. Dom kayau trắc dok veik dalam palei dok njauk co kalaik. Ong  Duy, Phó akaok palei Kon Sơ Lăl, brei thau

:Sang rong khuak kayua langik tasik. Min di labik nijeng hu  co klaik dom geing sang, sang ni lahik, sang gah la deih jeng lihik. Nan ye urak ni, sang lei jeng yah mek abih kayau trắc piah padang sang atau blei, huac co klaik atau apui khuah kayua yau harei dahlau. Nan ye oh khik hu palei ni tra.

Nan ye, yaom lac hu mbaok dalam luac dom pluh thun, tapa rilo mbang trun tagok di dakrai sajarah, yaom lac nao daok di palei bahrau, min urak ni, dom boh sang di palei Kon Sơ Lăl  klak njauk yah klaak abih kayua bala meng langik tasik song kayua menuac urang palai pajoa./.