Di huyện tapen negar Ia H’Drai, tukvak tapa, dom gah yau Bộ đội Biên phòng, Công an, Ban chỉ huy quân sự huyện saong dom kapul nyaom hu patagok bruk pambuak gauk dalam pathau khan, brei thau, pato pakai adat hukum piah daong paglaong akaok saneng, hatai ngak njauk adat hukum ka urang jakar haong bhap bani di bhum taneh tapen negar. Jit ruak Covid 19 rah tabiak khang, tui bruk takik brei pataom rilo manuac, bộ đội biên phòng Hồ Le saong Công an xã Ia Đan pambuak gauk pathau khan di palei 6 tuk melam. Di thôn 6, jaik abih bhap bani lac urang ngak di dom kong ty cao su, bruk ngak bhian meng mon 1 tal mon 2 page nan ye taong abih mikva daok pak ini bhian nao ndih avan jang. Thau cambaih bruk pak nan, dom kapul nao pathau khan meng mon 6 meteh biar harei sup tal mon 8 melam. Thiếu tá Võ Anh Hoàng, akaok công an xã Ia Đan brei thau:

“Công an xã jeng hu pambuak bruk haong dom kapul nghiệp vụ peih bruk pathau khan adat hukum yau Hukum Cư trú, Hukum An ninh mạng, adat ka tệ nạn xã hội, dom bruk pambuak tal mesruh pacang dom janih tội phạm, abih di nyu lac tệ nạn ma túy ye tapa pathau khan, bhap bani jeng thau cambaih jang saong thau ka bruk ngak di drei jang dalam pacang, caga, khan brei urang jakar thau kol tội phạm”. 

Piah peih ngak siam Danak dak, jabat Thường trực mBan Tacei pato Danak dak lac Bộ chỉ huy Bộ đội biên phòng tỉnh Kon Tum hu ngak dom blah ba-ar pathau khan dom paka di hukum lagaih haong bruk di puk palei. Dalam thun 2021, dom gah pataom tame pathau khan dom asal kadha ka dom bruk pakauk dalam khik iek, pandar phao ndao, pandap patuh, pandap piah ngak pandap patuh, adat brei thau ka bruk ngak gián điệp mạng, lih tame bí mật karja, bí mật bruk ngak, bí mật pablei salih, bí mật cá nhân saong rai diuk di manuac urang angaok mạng, dom bruk oh brei ngak gah an ninh mạng. Abih di nyu nan lac tukvak urak ini, Danak dak pataom tame langyah tui hukum bruk tame tabiak taneh aia suan hukum, dom adat pambuak tal bruk pacang caga jit Covid 19 saong tanut taong phạt. Tui trung úy Vũ Văn Phúc, urang jakar jak ba bhap bani đồn biên phòng Hồ Le, njauk hu rilo jalan ngak lagaih meng mek hu siam mekre:  

“Dalam tuk pathau khan haong mikva bhap bani ye jeng daok hu dom tavak tave nan lac tukvak mikva nao ngak mbang, pala drak lac biak atah, drei njauk iek tui tukvak ka nyu lagaih. Gaok tuk mai drei pathau ka sa baoh sang, blaoh nyim baoh sang nan pathau khan veik ka dom baoh sang karei thau.”  

Taphia di bruk pathau di tuk melam, dom gah daok pambuak bruk pathau khan meng loa katung tal yaok puk, palei. Tukvak peih ngak bhian lac van page mesup, jala pandiak saong biar harei. Sa-ai Nguyễn Văn Hiền, urang daok di palei 6 xã Ia Đan khan lac:  

“Khik caga cột mốc dahlau daih dahlak ngak bruk nan, đồn biên phòng hu meyaom dahlak, mboh urang daok pak atah mai, oh bhian randap ye drei khan brei ka công an, biên phòng thau.”  

Tukvak tapa, bruk pathau khan, pato pakai adat hukum mek hu rilo siam mekre, tapa nan paglaong akaok saneng di dom pakat, kapul nyaom saong bhap bani ka bruk ngak, labik dang di bruk pathau, pato pakai adat hukum saong hatai saneng ngak njauk adat hukum di labik tapen negar. Đại úy Nguyễn Hữu Cường, chính trị viên - phaok đồn biên phòng Hồ Le brei thau:

  “Dahlak bhian ngak piah paglaong siam mekre bruk pathau khan adat hukum lac paglaong ilamu ka urang jakar ngak bruk ini, ka dua nan lac patagok bruk ngak di urang hu angan je, taha akaok palei saong oh padeih salih bahrau bruk pathau khan; ka klau nan lac khaol dahlak oh padeih salih bahrau bruk pathau khan, pato pakai adat hukum.”

Tapa bruk peih ngak “Danak dak patagok pathau khan, pato pakai adat hukum ka urang jakar haong bhap bani bhum tapen negar, pulao tasik tukvak 2017-2021” di huyện tapen negar Ia Drai, meda ndom lac Danak dak hu daong ngak brei salih jalan saneng, paglaong hatai sahneng ngak njauk tui adat hukum di bhap bani, ngak patrun biak rilo dom bruk ngak suan adat hukum, daong ka bhap bani khang hatai kak kajap haong bhum tapen negar di taneh ia./.

Urang lang: Jasi – 14/12/2021