Ngak tui harak 29 di Thủ tướng Rajaei ka bruk daong taneh daok ka urang bangsa takik, meng thun 2003 mbiah tal ini, tỉnh Trà Vinh hu labaih 2.000 baoh sang urang bangsa hu mbang tui sarak ini. Hu labik daok tani tanat lac jalan siam di abih piah ka mikva kham ngak mbang yam tapa truh kan kathaot. Kadha vak di Sa Oanh, urang vak di Rayo sap ndem Viet Nam daok ngak bruk di bhum taneran kraong Cửu Long brei thau ka huyện Tiểu Cần, lac bhum palei ngak hu salah bruk brei taneh saong harak chứng nhận quyền pandar taneh ka dom baoh sang urang bangsa takik aval di abih dalam tỉnh Trà Vinh.

Sang amuk Kim Thị Sa Ren daok di xã Hiếu Tử, huyện Tiểu Cần lac sang kan kathaot, oh hu taneh riya dalam tuk nan pasang di amuk ruak trak ndih beit sa labik jaik 10 thun ini mai, nan ye duah var mbang yaok harei mboh biak kan kandah ndem hagait tal yaom jien yaok pluh triệu đồng piah blei taneh ngak sang daok. Amuk Sa Ren brei thau, meng rai ong muk amaik ame, likau daok angaok taneh nyim di urang dalam palei. Min kayua sang dak harei dak hu rilo anek taco, urang tok brei nyim taneh daok tal abih rai di amuk, nan ye sang muk daok haduh hatai. Bilan 5 meng bloh, muk hu karja daong brei jaik 250 met vuông taneh ngak sang daok tui Sarak 29 di Thủ tướng Rajaei, sang amuk biak uan tabuan. Umo 62 thun, mbang akaok meti hu taduan harak chứng nhận quyền pandar taneh, amuk Kim Thị Sa Ren uan tabuan tal haok ia meta, amauk lac: “Dahlau diah, dahlak tuk halei jeng huac urang pateok. Meng tuk ndih tapui tabiak dahlak oh hu hasit taneh halei, urak ini hu Karja daong brei taneh saong harak chứng nhận quyền pandar taneh dahlak  uan tabuan lô.”

Dom baoh sang oh hu taneh daok bhian hu raidiuk karei di gauk, min hu sa kadha dreih yau gauk nan lac amaik ame kan kathaot, oh hu bac da-a, ndih tapui tabiak saong praong tagok angaok mblang taneh nyim di urang karei, nan ye takik sangka tal bruk ngak sang khang kajap, dalam tuk nan oh hu jien piah blei taneh. Tui kuhria, dalam 2.010 baoh sang hu daong brei taneh ngak sang daok di Trà Vinh hu tal 80% baoh sang taik tahak. Yau nan ye, hadei di tuk hu daong brei taneh, karja peih bruk pasang iek piah daong chip sang daok tui Danak dak 167 ka dom baoh sang  kan kandah di abih tui tanut ba tabiak. Ong Thạch Mai daok di xã Hiếu Trung birau hu karja daong taneh saong sang daok bahrau ini, brei thau: “Meng tuk daok sit tal tuk tok diuk tabiak daok karei, oh hu amaik ame brei hasit taneh halei. Urak ini, hu karja daong brei taneh daok, padang sang brei dahlak biak thau dhar phol. Dahlak kham ngak mbang jang.”

Tui sarak ba tabiak,  yaok baoh sang mbang tui Sarak 29 hu daong 33 triệu đồng, dalam nan kadung jien Trung ương 30 triệu đồng, daok veik 3 triệu đồng kayua karja palei pabak tame. Nan ye, karja palei brei daong taneh parong jang hasit piah hadei  di tuk ngak sang blaoh, daok hu taneh piah ngak var limo, var raong manuk ada, danao raong ikan, atau ngak ro pala njam…piah duah jien tame jeng yau lagaih saong raidiuk palei pala. Tui jalan ngak yau ini ngan saong 33 triệu đồng sa baoh sang, huyện Tiểu Cần blei hu labaih 51.700 met vuong taneh brei ka 128 baoh sang oh ka hu taneh daok, kuhria rah tapa yaok baoh sang hu labaih 408 met vuong taneh, praong jang jaik dua mbang dut saong bruk ba tabiak. Ong Sơn Sô Phon, Akok Mban bangsa huyện Tiểu Cần brei thau: “33 triệu sa baoh sang yaom lac takik min meng bruk kham merat di mBan tacei jalan, pambuak saong karja palei, saong dom gah, dom kapul nyaom nao jak ba dom baoh sang hu taneh piah ka  urang mboh hu sarak di Đảng, Karja biak sangka tal bhap bini bangsa takik; mboh lac daok saong gauk brei thau daong gauk, klak rabha dom akn kandah saong gauk. Meng nan bo hu rilo taneh.”

Kuhria mbiah tal harei ini, tỉnh Trà Vinh hu daong taneh daok ka taong abih 2.010 baoh sang oh hu taneh, abih tih labaih 728.000 met vuong, tui yaom jien daong blei taneh jaik 65 tỷ đồng. Dalam nan hu 486 baoh sang taduan hu harak chứng nhận quyền pandar taneh saong hu 448 baoh sang hu daong jien padang ngak sang daok.

Sarak 29 di Thủ tướng Rajaei lac jalan mbuan lagaih di abih piah ka mikva urang bangsa takik bhum taneran kraong Cuu Long salih birau raidiuk. Meyah yaok bhum palei thau jalan ngak, thau patagok pren khang di drei, tantu dom kein lagaih bo sarak ini ba mai meda prong jang rilo mbang, oh lac daong ka mikva hu labik daok tani tanat bo daok lac jalan piah yam tagok patruh kan kathaot khang kajap./.