Dom F0 saong gauk gar urang ruak njauk ngak catang tui dom bruk pacang caga jit

Meng akaok bilan 11, dom urang njom ruak dalam rahra di tỉnh An Giang daok tagok samar, tapa prein taduan tame taong ruak di dom labik y tế dalam tỉnh. Piah khik kajap bruk khik ramik saong taong ruak urang njom Covid-19,  tỉnh An Giang hu ba tabiak bruk khik iek taong ruak di sang ka dom urang F0 oh hu triệu chứng. 

  Di phường Mỹ Bình, ban Long Xuyên, labik camriep di tỉnh An Giang ngak iek bruk taong ruak F0 di sang. Piah khik hu salamat, dom F0 saong gauk gar urang ruak njauk ngak catang tui dom bruk pacang caga jit.

Tui TS, BS Trần Quang Hiền, Yam ndok Sở Y tế tỉnh An Giang, bruk ngak di Kapul iek glang Covid ka rahra hu makna biak praong dalam bruk taong ruak F0 di sang. Kapul iek glang ini, langiu di bruk pato tacei manuac dalam sang daok brei daok karei dom jalan ngak piah pacang caga njom mbak dalam sang, daok hu pato tacei dom manuac dalam sang khik caga dom urang mbuan njom mbak glaong (yau ye urang mangaok umo 65 thun, urang labaih umo 50 thun) hu ruak dahlau dalam rup, urang kumei daok matain atau hadei di tuk ndik tapui 2 adit…; brei dut iek chip ka urang dalam sang mayah mboh dom triệu chứng dalam tuk brei daok karei... TS, BS Trần Quang Hiền daok brei thau lac:“Abih di nyu nan lac hu mbaok di Kapul iek glang Covid ka rahra. Dom kapul ini, langiu di bruk khik ramik labik daok, dom baoh sang hu F0 daok karei. Kapul ini njauk hu mbaok tame daong gah ilamo, daong langyah gah prein yava piah khik siam makre ka urang njom Covid daok taong ruak di sang salamat, rahra jeng hu salamat”.

  Piah khik hu salamat, kapul urang y tế daok hu pambuak Zalo haong dom urang F0 piah tacei jalan atau taduan dom panuac ieu daong tuk hu bruk samar drah; roh duah jalan pambuak piah yaok harei tui iek, thau cambaih lbruk, pato tacei saong klah rabha haong manuac ruak.... Tui dom tinh, bal daok peih ngak iek bruk taong ruak F0 di sang, dom F0 rilo meng ngak njauk haong jalan taong ruak, yau ye: manyum jru njauk tuk, khik kajap bruk mbang huak ginup dinh dưỡng, paglaong bruk pahat rup… nan ye tapa sa adit taong ruak di sang, prein yava di dom F0 ni jeng hu siam jang. Saai Lê Văn Cường, lac gauk gar di sa urang ruak F0 hu taong ruak di sang daok di phường Mỹ Bình, ban Long Xuyên khan lac:“Prein yava di diuk dahlak urak ini biak tani tanat Dahlak mboh F0 oh hu triệu chứng bo brei daok karei di sang mboh hu siam jang”.

Ong Nguyễn Thanh Bình, Akaok UBND tỉnh An Giang brei thau, meng di tuk jit Covid-19 tamuh gilac, tỉnh samar padang ngak saong ba tabiak bruk taong ruak tui jalan 3 tal, dalam nan, iek praong bruk taong ruak F0 di sang. Urak ini An Giang hu peih ngak iek bruk brei daok karei di sang ka dom F0 oh hu triệu chứng di ban Long Xuyên, ban Châu Đốc saong ban sit Tân Châu. Ong Nguyễn Thanh Bình daok brei thau lac:“Dom urang njom Covid-19, dalam nan meda hu 80% lac oh hu triệu chứng saong njom njul; 80% ni meda hu khik ramik karei; 20% mboh trak ye njauk sangka jang dom urang ini, mayah oh sangka iek glang siam ka dom urang dalam 20% ni, ye meda trak jang saong metai lahik lac biak glaong. Jalan ngak di tỉnh An Giang lac pataom prein tame iek glang ka dom urang ini, nan ye urak ini, tỉnh An Giang daok pieh ngak tui bruk: F0 brei daok karei taong ruak di sang”.

  Anak bruk njom mbak sarau kadhau di jit Covid-19 dalam tỉnh An Giang jaik di ini, piah patrun trak damak ka dom labik taong ruak Covid-19 dalam tỉnh, saong piah khik tani tanat prein yava ka urang ruak, An Giang kuhria lac meda taong ruak ka 1.000 urang F0 di sang, ini lac sa jalan ngak lagaih, salamat saong piah pasang iek hu siam lagaih urang njom ruak covid-19./.

Urang lang: Thu Thao – 17/11