Sinh viên Y khoa halan hatain hu mbaok di pasak jit 

Hadei di tuk taduan hu panuac khan meng Sở Y tế haong pasak pasang iek ruak kik ban raya HCM (HCDC) ka bruk ieu pataom sinh viên y khoa tame pacang jit, yaok rabau sinh viên meng dom sang bac gah y dam ban raya abih drei pachreih tui, tut angan nao ngak bruk di dom “labik pandiak” ka jit di dom quận 12, Gò Vấp, Tân Phú, huyện Nhà Bè haong ban Thủ Đức.

Tui Phó Giáo sư, Tiến sĩ, bác sỹ Nguyễn Thanh Hiệp, Phó Hiệu trưởng Sang bac ĐH Y khoa Phạm Ngọc Thạch (ban raya HCM), meng harei 27/5/2021, sang bac hu labaih 1.000 sinh viên meng thun bac ka 3 tagok, tut angan tame bruk pacang caga jit COVID-19. Dom sinh viên hu mbaok tame mek mẫu dut iek COVID-19, vak phiếu di dom labik dân cư; daong tacei ba, brei thau, tui iek prein yava rahra dahlau di tuk klauk vaccine caga COVID-19…

Bác sỹ Nguyễn Thanh Hiệp brei thau, dahlau di tuk tagok jalan tame bruk pacang jit, sinh viên hu pato pasram biak cambaih ka bruk ngak, jalan khik caga rup drei eng, dom bala meda mbuan hu… Dalam dom kapul sinh viên halan hatian, jaik abih lac hu mbaok tame bruk pacang jit meng dom mbang dahlau, thau bruk blaoh nan ye dom adei biak khang hatai, oh gaok kan kandah hagait dalam bruk ngak. Hu sinh viên hu mbaok tame bruk mbang ini hu jeng gru pato di sang bac, mbang ini mai veik daong bruk. Dom sinh viên bahrau hu mbaok, yaom lac daok rilo bruk mboh bahrau min hu bruk daong ba di dom sa-ai nao dahlau, jeng samar thau bruk, ngak bruk hu siam, lagaih.

Thạc sĩ Trương Văn Đạt, Akaok jabat Công tác sinh viên – Bí thư Đoàn Sang bac ĐH Y Dược ban raya HCM brei thau, pak dalam harei camereip sang bac ba tabiak bruk jak ba, hu labaih 500 sinh viên thun puac di taong abih dom khoa tut angan nao pacang jit. Dalam mbang tabung glaong, dalam sang bac hu labaih 1.000 sinh viên hu ba nao tal dom “labik pandiak” ka dịch piah hu mbaok tame bruk daong pacang caga jit COVID-19…

Sa-ai Trương Văn Đạt khan lac, halan hatian ba akaok nao dahlau dalam bruk pacang jit tuk umo thun daok biak ranaih, dom sinh viên gaok rilo kan kandah saong mbuan si njaom mbak, taom gaok rilo menuac; ngak bruk oh padeih tangin, mbang menyum padeih padei oh njauk tukvak, mbuan jhak ka prein yava. Min ini jeng lac tuk piah ka dom sinh viên y khoa hu ngak bruk tapak, daong ka dom adei hu thau jang ka jalan sahneng, ka bruk ngak, ka ilamu dalam bruk pambuak gauk taong ruak, saong thau cambaih jang ka trách nhiệm, y đức di 1 urang tui gah y, ngan saong bol bhap rahra; caga jeng dom gru jru siam hatung hatian di harei hadei, abih drei ka bruk sron mbon di taneh ia.

Salah bruk neh rabha mẫu dut iek saong ba tame dữ liệu tuk mon 2 saboh page di labik mek mẫu Khu chế xuất Linh Trung 1 (ban Thủ Đức), Nguyễn Duyên, sinh viên thun 5 gah Dược (ĐH Quốc gia ban raya HCM) samar mai veik labik ndih, taoh khan ao khik caga rup tabiak, menei ia njuh, kham merat ndih samar dahlau di tuk taduan bruk bharau di mon 6 dah page. Meng tuk mai daong bruk dut iek saong klauk jru vaccine pacang COVID-19 ka yaok rabau urang ngak di ban Thủ Đức, Nguyễn Duyên saong rilo sinh viên y khoa halan hatian karei oh ka hu melam halei ndih tapa 3 mon, tuk bruk hit biak rilo saong brei ngak dalam drah samar, saongdom sinh viên ini jeng takik hu mbang ginup 3 var sa harei.

Nguyễn Duyên khan lac: tuk camereip, sang oh pachreih tui tuk thau lac adei tut angan nao daong bruk pacang jit kayua bruk ngak hu rilo trak damak saong mbuan njaom mbak. Adei kham merat ndom biai, brei amak ame thau lac taneh ia daok khang drei mesruh pacang jit praong, lac sa rahra Việt Nam, sa urang đoàn dam dara, sa urang jakar y tế di harei hadei, ye bruk hu mbaok tame pacang jit ngan saong dom sinh viên y khoa yau adei lac bruk njauk ngak. Halan hatian nao dalam tuk oh ka tamat học kỳ nan ye langiu di bruk daong pacang jit dịch, Duyên haong dom sinh viên karei brei rami ramik tukvak piah hu mbaok tame bac dom tal bac online, caga ka mbang pakacah puac kỳ. Yaom lac glaih glar, min piah ka amaik ame haong sang bac jia tame, sahnang hatai, Duyên haong dom ayut jeng kham merat ngak siam bruk ngak haong bruk bac.

Daok ngan saong ayut Nguyễn Đình Tú, sinh viên thun ka 4, gah Điều dưỡng (sang bac ĐH Nguyễn Tất Thành), bruk halan hatian hu mbaok tame pacang jit lac meng puac bilan 5, tuk adei hu brei bruk nao daong labik pacang veik di Phường 5, quận Gò Vấp, hu brei bruk mek mẫu dịch tễ, duah thau ka jit ruak di labik, daong ka rahra khai báo y tế saong tame dữ liệu. Tuk bahrau tame bruk, Đình Tú jeng yau rilo sinh viên halan hatian karei mboh biak suh sah hatung hatain kayua dom menuac njom ruak dalam quận rilo, dom urang F1 jeng biak rilo, mbuan ba tal njom ruak. Kayua dahlau di nan hu pato pasram saong hu pabak ilamu ngak bruk ka pacang caga jit, nan ye Tú haong dom ayut sahabat pachreih ba gauk kham merat ngak njauk bruk ba tabiak di labik pacang veik, labik brei daok karei piah khik caga ka rup drei saong ngak hu siam bruk ngak di drei. Rilo ayut uan sang min tuk halei jeng sahneng lac njauk khang hatai kayua kein laba di taneh ia.

Sa-ai Ngô Minh Hải, Phó Bí thư Thành Đoàn, Chủ tịch Hội Liên hiệp Thanh niên Việt Nam ban raya HCM brei thau, tukvak tapa, sinh viên gah y di ban raya meng hatung hatian di umo dam dara, gam haong ilamu bac megru hu di sang bac, hu jeng kapul ba kaok nao dahlau praong, rik daong haong kapul urang y, bác sỹ, rik daong  hu siam bruk pacang caga jit ruak/..

Urang lang: Jasi -9/1