Gah ngak nong tỉnh hu tui iek catang ia angaok dom baoh kraong piah peih ba aia ka nyu laghaih

Bilan padai Đông Xuân ini, ong Trịnh Ngọc Châu, daok di Phước Lợi, xã Phú Tân, huyện Châu Thành trun pajaih labaih 02ha, rilo meng lac pajaih Đài Thơm 8. Meng bhian duah thau ka bruk ia njaom mbak, tal urak ini mblang padai jaik 50 harei di sang ong Châu daok tamuh siam. Ngan haong yaom padai di tanut glaong, ong Châu caong lac hu sa bilan jayah. “Rilo urang nong thau hu bruk njaom mbak thun 2021, samar trun pajaih min tuk ba aia tame ye tui iek độ mbak. Dom thun dahlau oh hu balai quan trắc ye mikva pandar dom nding duk iek, daok thun ini urang nong thau hu tapa mac, tuk độ mbak ala 1 phần nghìn ye ba aia tame hamu piah khik ia taba”.

Di huyện Châu Thành, tỉnh Sóc Trăng, ia mbak rilo meng njom tui dom baoh ribaong meng huyện Long Phú, Kế Sách saong kraong Phụng Hiệp gah meng bal Sóc Trăng tuh tame. Thun 2017, huyện Châu Thành hu buh jien tabiak ngak dom mbrong pacang ia mbak, khik aia taba di dom mbrong prong saong mbrong sit di dom labik ngak padai praong nan ye caga hu aia pruh. Langiu di nan, thun bloh, huyện daok buh jien tame ngak 5 balai quan trắc di dom xã Phú Tâm, Phú Tân, An Hiệp saong bal sit Châu Thành, bhian brei thau ka độ mbak nan ye hu daong ka mikva urang nong caga pacang njaom mbak. Ong Nguyễn Văn Hận, Phaok akaok jabat ngak nong saong patagok palei pala huyện Châu Thành brei thau: “Kakei mikva urang nong caga pala drak, patrun patakik khat lahik saong dalam thun pataom tame kuac kuah ribaong, jalan ba aia piah laghaih ka bruk ba aia taba tame hamu duh ka bruk pala drak; bhian pasiam veik dom baoh mbrong pacang ia mbak, peih dom tal pato pathram ilamu kỹ thuật, tacei mikva ngak padai dalam tuk pandiak bhang, ia njaom mbak.”

Piah pacang caga tua riya pandiak bhang, kurang ia, ia njaom mbak dalam bilan thu thun ini, gah ngak nong tỉnh hu tui iek catang ia angaok dom baoh kraong piah peih ba aia ka nyu laghaih tal dom danak dak ba aia pala drak saong ia pandar. Abih di nyu lac, tỉnh hu ngak salah blaoh bruk kuac kuah dom ribaong dalam danak dak padang ngak jalan ba aia, khik aia taba pacang cakak tua riya pandiak bhang saong njaom mbak di dom huyện Thạnh Trị, Mỹ Tú, Châu Thành, ban sit Ngã Năm ngan haong phun jien labaih 88 tỷ đồng. Langiu di mbrong Ngan Rô hu padang ngak bahrau, tỉnh hu peih ngak bruk kuac kuah dom ribaong di huyện Trần Đề ngan haong phun jien 152 tỷ đồng. Danak dak pabak ka cakrok patagok bruk ngak nong dom labik pala drak praong pacang caga tua riya pandiak bhang njaom mbak ngan haong phun jien 77 tỷ đồng jeng hu padang ngak blaoh blai saong ba tame pandar. Ong Huỳnh Ngọc Nhã, akaok Sở Ngak nong saong patagok palei pala tỉnh Sóc Trăng brei thau: “Caga pacang caga tua riya pandiak bhang njaom mbak dalam bilan thu thun 2020-2021, khaol dahlak patagok dom bruk ngak yau pasiam veik dom mbrong, pasiam veik ar pacang, ngak habar piah ba aia trun dom mbrong jeng yau dom ar pacang ia mbak, khik aia taba. Taphia di nan kuac kuah jalan ba aia trun mblang hamu, khik siam bruk ba aia brei ka pala drak. Gam haong nan, kakei mikva ngak njauk tui lịch pala drak, tuk halei trun pajaih ka nyu laghaih, di labik halei…”

Meng caga pacang siam hoang tua riya pandiak bhang njaom mbak, nan ye bilan padai Đông Xuân avar di tỉnh Sóc Trăng mek hu jayak. Urak ini gah ngak nong daok peih ngak catang dom jalan pacang caga tua riya pandiak bhang njaom mbak piah patrun patakik di abih dom kan kandah di ia mbak tal mblang padai Đông Xuân daok veik di tỉnh./.

Urang lang: Jasi – 24/03