Tuk padai bilan Đông Xuân 2013-2014 trun tagok khang gah yaom kaom, labik pablei oh tani tanat, ngak ka rilo baoh sang urang nong ngak padai duh hatai kayua oh pablei hu padai ye dom baoh sang urang nong ngak padai dalam mblang hamu mẫu di tỉnh Sóc Trăng daok chreih chrai bui sambai kayua hu bao tiêu taong  abih padai ngak tabiak, yaom kaom tani tanat, phun jien buh tabiak takik jang, hu kein laba rilo jang. Kadh avak di urang vak Thạch Hồng saong Tuấn Phi brei thau ka bruk nan di  huyện Ngã Năm:

 Meng tuk hu mbaok tame ngak padai praong tui jalan mblang hamu mẫu, bruk ngak padai di mikva urang nong di labik bilai njuk ia palei Mỹ Phước, xã Mỹ Bình hu tani tanat, siam lagaih saong ba mai kein laba glaong jang. Thun ini, ngan saong 50 ha padai pajaih OM 7347, mikva di labik ini hu Công ty khik caga phun pala An Giang pabak brei jru halak, khak drak, pajaih padai meng akaok vụ bo oh mek laba, saong daok blei veik abih padai tui yaom 5.700 đồng sa kg padai thu. Rilo mikva di labik ini khan lac, vụ ini padai njauk, kuhria rah tapa hu 7 tấn meteh yaok ha, gam saong yaom phun takik, jaik 1 triệu meteh yaok công 1.000m², kaoh bloh phun jien buh tame ngak, daok laba hu meng 3 triệu tal labaih 4 triệu đồng yaok công, glaong di abih kuhria meng dahlau mai. Sa-ai Dương Đức Pháp daok di palei Mỹ Phước, xã Mỹ Bình brei thau: Tuk camereip công ty hu pabak brei pajaih, khak, jru halak, bloh hadei di nan hu dom adei sa-ai trun tacei pato ilamu ka mikva. Tal harei ini, công ty hu peih praong bruk blei padai pak di mblang hamu, bloh  ghe pajeng ka mikva urang nong, drei tok tapa sang mac teik padai mek jien. Thun ini, yaom công ty ba tabiak jeng glaong jang hasit dut saong yaom gah lingiu.

Rilo mikva hu mbaok tame mblang hamu mẫu di huyện Ngã Năm daok brei thau lac, ini lac bruk pala drak praong nan ye yaom pah urang ngak tuk halei jeng biar jang. Lingiu di nan, urang ngak nong hu mbaok tame bruk ini, hu dom công ty, doanh nghiệp blei veik abih padai meng akaok vụ tui yaom tani tanat, ba chreih chrai ka mikva. Sa-ai Quách Văn Khái  daok di palei Mỹ Tân, xã Mỹ Bình lac:

        Băng 20 giây: Kayua mikva mboh hu kein laba di drei, nan ye abih hatai pachreih tui. Vụ dahlau deih, khat lihik rilo, drei tame ini hu menuac bao tiêu ngak habar drei klaak hu..

Tui jabat ngak Nông huyện Ngã Năm, bilan đông xuân 2013 – 2014, huyện padang 17 mblang hamu mẫu praong abih tih labaih 4 ribau ha, rilo meng ngak dom pajaih padai cao sản, đặc sản, pajaih padai siam hu chất lượng glaong yau ST5, ST20, VRT, OM6976, OM5451… Huyện jeng hu panuac ieu dom doanh nghiệp tame blei veik abih padai ngak tabiak, padang dom bhum padai nguyên liệu di dom mblang hamu mẫu dalam huyện, tui nan hu 4 doanh nghiệp hu mbaok tame. Ta-eng Công ty khik caga phun pala An Giang hu buh jien tame padang bhum nguyên liệu dalam huyen jaik 1.600 ha ngak dom pajaih padai chất lượng glaong. Ong Nguyễn Ngọc Thạch, akaok jabat ngak Nông huyện Ngã Năm brei thau: Lingiu mblang hamu mẫu ye labik ar pacang sre jeng hu padang kapul pambuak bruk pala drak haong gauk. Lingiu di nan, daok hu pambuak bruk haong doanh nghiệp pablei jru halak, khak drak… tui yaom mbiah lap brei ka mikva tavak oh mek laba saong blei veik taong abih padai ngak hu di mikva. Abih di nyu nan lac pajaih padai đặc sản hu bao tiêu yaom kaom  mbiah lagaih meng akaok vụ. Hu 3959 hecta dalam abih tih 18 ribau hecta padai di huyen hu bao tiêu, ye dom laok hamu nan nyu njauk padai, pablei hu yaom, mikva urang ngak nong biak chreih chrai.

Meda ndom lac, pala drak tui jalan mblang hamu mẫu nan lac jalan ngak bahrau, pambuak pagam haong darak pasar, patagok kein laba, paglaong yaom pandap pablei tabiak negar lingiu. Saong tuk bo darak pasar yaom padai bhian trun tagok oh tani tanat yau ini, ye mblang hamu mẫu daok lac bruk pilih ruah siam abih di mikva urang ngak nong urak ini./.