Hu mai Sóc Trăng dalam dom harei ini, kol drei mbuan mboh jalan mbak di puk palei hu peih praong, nao tal yaok puk, yaok palei, yaok khu dân cư. Dom jalan mbak gluh bok dahlau daih oh daok ralo tra bo hu salih meng dom jalan tuh katak, samu tapak ba dom sruh radaih ô tô, dom radaih công cộng, dịch vụ nao tal dom pasak xã, atau dom sruh radaih mac nduac samar tal yaok puk palei. Taong abih janih nan nyu ngak brei hadah tagok rai diuk barau di dom bhum palei, bhum atah bayah harei dahlau kan kandah rambah rambup di puk palei. Ong Đào Đơ daok di xã Long Phú, huyện Long Phú brei thau:

 “Duk saong dom thun dahlau ye dom thun jaik di ini, kinh tế yaok baoh sang di xã Long Phú ngak mbang hu patagok, kayua dom jalan mbak palei pala hu ngak salah bloh. Bruk raong glang, pala drak jeng patagok kayua  pablei salih hu mbuan lagaih”.

Thau lac bruk padang ngak jalan mbak lac sa dalam dom bruk praong dang akaok dalam tuk patagok kinh tế - xã hội, meng dom phun jien daong brei, tỉnh Sóc Trăng hu buh tame ngak ralo jalan praong, yau jalan roya 60, jalan roya Nam Sông Hậu, jalan roya Quản lộ Phụng Hiệp, tal jalan tỉnh, jalan huyện, xã… nduac tapa dom puk palei ngak jeng dom jalan pambuak gauk, daong jhul pakhang patagok kinh tế - xã hội di tỉnh, pabak siam ka bruk ngak mbang, pajeng ba, paglaong yaom pandap panda, paglaong bruk mbak nao mai, rai diuk mbang ngui, daok dang di bhap bini  palei pala hu hadah hadai tagok.

Tui kuhria mboh, meng thun 2010 tal thun 2014, tỉnh Sóc Trăng hu ngak barau jaik 1000 km jalan. Dalam nan, jalan palei pala labaih 85% ngan saong jaik 830 km grap dom xã di tỉnh. Ong Lương Minh Quyết, akaok UB bhap bini huyện Mỹ Xuyên brei thau:

 “Jalan tỉnh 940 dahlak mboh lac ngan saong tỉnh Sóc Trăng lac  bruk biak praong, atah abih tih jaik 50 km; dalam nan nao tapa 4 huyện, Mỹ Xuyên hu jaik 20 km. Jalan pambuak 3 jalan roya nan lac jalan roya Quản lộ Phụng Hiệp, roya 1A saong Nam Sông Hậu, daong ngak jeng mbaok meta bahrau ka bhum palei pala Mỹ Xuyên, palagaih bruk pajeng ba pandap di mikva. 4 huyện ini biak hu kein lagaih, dalam nan Mỹ Xuyên hu peih tabiak jalan nao barau ka mikva dalam bruk ngak mbang, pablei salih, raong pala kaya nông biak lagaih”.

Tui UB bhap bini tỉnh Sóc Trăng, dalam 5 thun tapa, tỉnh pataom tame labaih 1000 tỷ đồng piah ngak jalan mbak palei pala. Urak ini dom jalan tỉnh hu ngak khang kajap jaik 95%, jalan huyện jaik 62%, jalan xã lac 72% saong jalan palei pala nan lac 50%. Dalam tuk dom xã di tỉnh hu jalan ô tô nao tal pasak jeng hu jaik 94%.

Min kayua phun jien hu takik, dom jalan mbak di Sóc Trăng jeng oh ka hu ngak ginup yau dom tỉnh dalam bhum jeng yau dalam taneh ia. Dalam tuk nan Sóc Trăng lac bhum taneh limin, hu rilo kraong ribaong njauk padang ngak ralo tatua nan ye bruk padang ngak jalan mbak palei pala gaok rilo kan kandah, phun jien buh tame ralo. Taphia di nan, dom jalan hu padang ngak bloh jeng daok sit duk saong bruk patagok di tỉnh jeng yau dom huyện, dom xã… Kayua yau nan ye, bruk patagok jalan mbak abih di nyu nan lac jalan mbak palei pala hu tỉnh quy hoạch cambaih laih. Tui nan, tal puac thun ini, kham merat ngak salah bloh taong abih dom xã di tỉnh hu jalan ô tô nao tal pasak, patui bruk buh jien tame ngak dom tatua palei pala brei ka bhap bini nao mai saong khik ramik pasiam piah khik siam mekre bruk nao mai. Langiu di nan, tỉnh Sóc Trăng jeng daok kuhria  padang ngak 779 công trình saong yaom jien labaih 1000 tỷ đồng meng ini tal thun 2020. Ong Trần Anh Việt, Giám đốc sở jalan mbak pajeng ba tỉnh Sóc Trăng brei thau:

“Meng hatai kham merat lac ngak yau habar ka jalan mbak hu ngak dahlau, piah peih tabiak jalan patagok dom gah kinh tế karei, anak tal brei ngak salah, dak harei dak patagok dom jalan tỉnh, jalan huyện. Abih di nyu nan lac jalan mbak palei pala brei ngak ka nyu siam jang, njauk tui tanut jalan mbak barau bo mintri jalan mbak hu patabiak bloh. Ngan saong bruk ini, kol dahlak kham merat gam saong dom puk palei ngak yau habar piah patagok jang, jak ba taong abih dom phun jien piah buh tame ngak, peih praong dom jalan mbak, paglaong bruk khik iek, ba pandar hu kein lagaih”.

Jalan mbak siam mekre hu rik daong praong ka bruk patagok kinh tế di tỉnh Sóc Trăng, Mbaok meta palei pala meng nan jeng hu hadah hadai tagok, rai diuk di bhap bini dak harei dak salih barau tui jalan siam, lagaih./.