Urang nong pala njam piah pablei ka drak pasa 

Piah rik dong langyah kan kandah ka bruk pablei kaya nong, Công an tỉnh Sóc Trăng hu peih danak dak dong ka mik va urang nong dalam tỉnh, hu mbaok di kapul dam dara, Kapul urang kamei, Công đoàn di tỉnh. Thiếu tá Lê Thị Quỳnh, Akaok kapul urang kamei - Công an huyện Châu Thành brei thau, dom urang jakar, urang lin công an huyện tuk halei jeng yam takai nao haong mikva  tui jalan “daong gauk, anit ranam gauk”:

Kol dahlak brei kapul Công an huyện nao pajeng kaya nong mai , bloh drei jak ba urang jakar, urang lin dalam jabat blei dong ka urang nong. Dom kaya nong nan tabiak meng prein yava di mikva kham merat pala drak, iek glang, min tal tuk paik mek ye oh pablei hu kayua jit ruak .

Thiếu tá Đặng Văn Phương, Bí thư Kapul dam dara Công an tỉnh Sóc Trăng brei thau, kayua kan kandah di jit ruak nan ye rilo janih kaya nong yau tangei, medar, lahong, darang … kan pablei kayua dok peih bruk paatah di gauk piah pacang caga jit njom mbak.Taphia rilo kham merat di karja song dom jalan ngak dok hu ba tabiak, Công an tỉnh jeng hu jak ba urang blei, dong pablei kaya nong ka mik va. Jabat hu nao tal labik blei tui yaom mik va batabiak, khik hu phun jien song hu laba. Tal tuk vak ni, hu labaih  20 tấn kaya nong dom janih hu urang jakar, urang lin công an tỉnh dong pablei. Thiếu tá Đặng Văn Phương khan lac:

Kol dahlak taom gaok jabat ngak nong di dom huyện piah thau dom janih kaya nong dok kandong veik, hadei di nan, likau radaih di Công an tỉnh nao tal labik. Tuk vak pajeng ba ngak njauk tui 5 paka di Mointri Y tế, khik kajap bruk pacang caga jit, tuk mai tal jabat ye kol dahlak parabha tabiak jeng yaok binah, daa dom gah tagok taduan tui harak hu tut angan dahlau.

Dok di huyện Mỹ Xuyên, dom urang đoàn dam dara  hu nao tal puh daong paik mek, dong pajeng ba saong duah jalan pablei kaya nong ka mik va. Tui  saai Huỳnh Thị Cẩm Hồng, Bí thư Huyện đoàn Mỹ Xuyên, ngan song taneh pala njam prong, mik va urang nong dok gaok kan kandah trak kayua kaya nong oh hu labik pablei. Anak meta, Kapul dam dara huyện dong dahlau ka dom urang lac dom sang kan kathaot, ngak mbang sit sot song duah jien meng phun pala, piah dong ka mik va duah hu jien, tani tanat rai duik .

Kaya nong di mik va oh rilo, dahlau deih paik mek bloh ba nao pablei yaok harei, min, urak ni kayua bruk nao mai kan kandah  nan ye urang đoàn,dam dara di pak ni dong ka mik va paik mek song pablei. Hu bruk klah rabha dalam tuk kan kandah kayua jit ruak, mik va biak bui sambai 

Tukvak tapa, abih di nyu nan lac tuk peih bruk paatah di gauk  tui sarak 16 di Thủ tướng rajaei, Mban tacei jalan pacang caga jit Covid-19 tỉnh Sóc Trăng tacei pato dom puk palei  pasang iek mblang taneh song sản lượng dom janih kaya nong dok caga paik mek, ba mbuan lagaih ka dom labik blei song pajeng nao pablei dalam tỉnh hong dom puk palei jiak tapen, khik siam mekre dalam bruk pacang caga jit. Langui di nan, tỉnh dok brei padang kapul Xúc tiến thương mại song pambuak bruk pablei kaya nong, padang jalan hijao piah pajeng kaya nong song pandap mbang huak yaok harei./.

Urang lang: Hanipha- 11/8