Rilo nen taneh hu ieu pablei ka menuac urang 

Ngak meng lac menuac khin blei taneh padang sang, tui panuac yaih khan di 1 cò taneh, urang vak nao dalam tame hẻm sit 456 jalan 2/9, (labik Bàu Trũng) phường Nguyễn An Ninh, ban sit  Vũng Tàu piah duah urang pablei taneh. Di labik taneh klaak saoh hareik tamuh bak di jhung  jalan, hu sa nyaom urang kamei dang yaih khan taneh ka urang blei.

Sa urang angan H. ye ka urang vak iek  blah phô tô harak meriah bhong song blah bản đồ eng drei parabha labik ni jeng  91 lô taneh. Urang ni brei thau, labik taneh nan lac ngak nong  prong labaih  8.000 m2 song hu 57 urang dang angan ngak po, tui labik song tui taneh praong – sit bo yaok lô hu yaom meng  500 tal  800 triệu đồng, meyah oh samar caik cọc ye paguh page ini nyu abih mbong. "Cò taneh" ni dok yaih khan lac  hu gauk gar ngak di UBND tỉnh Bà Rịa- Vũng Tàu nan ye hu thau lac labik taneh ni tok dok dalam quy hoạch padang ngak mblang bein ilamu  song đô thị bahrau  Bàu Trũng min brei klaak  quy hoạch dalam thun 2021 hadei di rilo thun dok angaok ba ar. Kayua yau nan ye, urang blei meda sahnang hatai, kayua hadei di ni hu salih bruk pandar taneh piah padang sang: 

       "Danak dak bahrau vak angaok ba ar , ka oh hu thei ngak hagait di pak ni, dreih yau  quy hoạch tual,  cambaih di nyu lac tual jiak  25 thun ye, urak ni  bahrau klaak. Meyah blei tuk  yaom 18,5 triệu/m2, dok biak di nyu yaom  20 triệu đồng/m2, gar labaih  6 mét lac yaom glong di abih pak ni . Bahrau peih pablei harei kabroi bo meng labaih  90 lô urak ni jeng dok  12 lô"

        Dreih yau nan, di labik taneh ka 167 jalan  Đô Lương, phường 11, ban  Vũng Tàu, sa cò taneh angan L. brei thau ni lac  taneh  quy hoạch danao tathuak ia di ban saong hu klaak quy hoạch dalam thun  2021 kayua rilo thun oh peih ngak. Cò taneh ni  dok brei thau, labik taneh dok tapen  danao  hu parabha jeng  15 lô angaok baar  hu 15 urang blei  hu gam sa harak  chứng nhận Quyền pandar taneh lac  taneh ngak nong . Yaok  lô prong labaih  102 m2 hu pablei yaom  900 triệu đồng, sa bilan hadei di tuk  caik  cọc hu tabiak  công chứng ngak harak dang angan ngak po haong gauk:     

"Taneh di  Đô Lương iek taneh bloh mboh hu ye caik  cọc 100 triệu đồng , hadei di nan  2 gah tabiak  công chứng ủy quyền song yar abih jien. Urang blei meda khik veik meng  10 – 15 triệu, hadei di 15 harei  cang tabiak harak , tal tuk hu harak bhong ye urang blei bayar jien abih".

Daok gah chức năng, ong Nguyễn Trọng Thụy, Akaok jabat khik ramik  đô thị ban sit  Vũng Tàu brei thau, tui hukum, meyah hu  quy hoạch ye  tuk halei karja  tỉnh Bà Rịa- Vũng Tàu hu tabiak harak brei thau lac mek veik taneh ye bhap bini meng oh meda peih bruk pablei salih taneh rija. Dok urak ni, bhap bini meda   pablei salih hu tui jalan di hukum taneh riya. Min, . ong Thụy jeng brei thau, Jabat khik ramik  đô thị ban sit Vũng Tàu thau hu bruk  bhap bini parabha  lô pablei taneh  ngak sang angaok ba-ar piah pablei salih song ba dom labik taneh nan tame bruk pasang iek siam di abih  .

Tui  ong Vũ Hồng Thuấn, Phó Chủ tịch UBND ban sit Vũng Tàu, di labik urang parabha  lô pablei taneh angaok baar , ban sit hu  tỉnh Bà Rịa- Vũng Tàu jao bruk padang quy hoạch 1/2000 labik mblang bein ilamu song  đô thị bahrau Bàu Trũng. Anak tal, hadei di tuk mek panuac di dom sở, dom gah piah pasiam veik dom asal kadha pagam tal, blaoh pok tagok  tỉnh pasang iek, brei tapa di puac thun  ni. Jeng tui ong Thuấn, ngan song dom bruk batabiak di hukum taneh rija  ye bruk bhap bini eng drei parabha lô, pablei taneh dom taneh nan lac oh hu adat, dom urang pagam pambak tame labik huan di hukum piah parabha  lô angaok taneh ngak nong suan hukum. Ong Thuấn hu panuac kakei lac:

  Caong lac bhap bini tuk khin blei taneh  ye brei pasang iek cambaih laih harak gar taneh, meyah oh thau cambaih ye nao tal dom jabat di karja pak nan piah sua tangi, piah thau. Yau nan meda plaih hu bruk blei salih harak tangin, blei  sa harak haong gauk song hadei di ni oh ngak hu dom harak gar tui hukum gah taneh raja"

Meyah karja song dom jabat chức năng oh hu jalan pacang cakak bruk parabha lô, pablei taneh angaok harak ba ar di ban sit Vũng Tàu ye meda hu rilo cuang kandah rah tabiak. Abih di nyu nan lac, bruk rilo urang blei taneh parabha  lô tui jalan ngak yau ni dok ba tal patagok bruk padang ngak suan hukum, ngak srau kadau đô thị, ngak tayah bruk quy hoạch đô thị di Vũng Tàu di anak tal oh suai lavik./.

Urang lang: Hanipha- 16/12