Pathau mikva saong grauk ayut!

Labaih 10 thun dahlau, sang taha Ríp, bangsa Bana daok di palei Dung Rơ, xã Kon Gang, huyện Đác Đoa, tỉnh Gia Lai nan lac baoh sang biak kan kathaot di palei, di xã. Meng thau kham merat yam tapa kandah, ngak mbang piah patruh kan kathaot, urak ini, baoh sang taha Ríp oh lac yam tagok ngak kaya meda bo daok lac sa dalam dom bruk ngak mbang patagok kinh te siam lagaih brei ka urang dalam palei bac megru ngak tui. Dalam kadha “Kareih camin palei negar” harei ini, da-a mikva saong grauk ayut pang kadha vak khan ka urang nan:

Taha Ríp thun ini umo labaih 60, lac kareih camin hadah dalam bruk ngak mbang, pala drak piah ka mikva dalam palei Dung Rơ bac megru ngak tui. Hadar veik tukvak kan kandah di sang drei, ngan saong 10 urang anek, ong lac: gaok tuk mai dom adit ye sang ong oh hu var halei huak lisei trei tian. Ngak miat bo oh ginup mbang, nyim mesre miat mboh glaih glar, ong sahaneng brei salih bruk pala phun takik kein laba tapa pala dom janih phun hu yaom kinh tế glaong jang. Pala caphe, amriak kalu iek mboh hu kein laba, ong khang hatai peih praong taneh pala amriak kalu. Bloh bruk caong khin ngak kaya meda di ong hu jeng biak. Meng dom got amriak kalu, bloh tal dom rituh got amriak kalu, urak ini sang ong Ríp hu bein pala 1.200 got amriak kalu jaik sang. Ong Ríp pala hareik limen piah raong limo, var raong lime drei limo ong mek khak buh ka amriak kalu. Mboh bein amriak kalu that hijao, yau brei thau dahlau lac hu rilo asar amriak kalu, ong kuhria mboh: “ gam saong 4 ha caphe saong limo, thun ini jien duah tame labaih 400 triệu đồng”. Ong klao bui sambai lac, dom thun ini mai, jien mek tame hu tani tanat meng bruk raong glang, pala drak.

Tangi sua ka ilamu yam tapa kan kandah, yam tagok ngak kaya meda, ong Ríp lac: kham hu mbaok tame dom tal pato pala drak, raong glang di xã, di huyện peih tabiak; bac megru di dom palei karei, duah tapuk, mbao piah iek dom bruk ngak kinh tế karei karei ba mai ngak di palei…Bruk praong nan lac, khang hatai salih janih phun pala, buh jien tame pala amriak kalu, lac janih phun ngak akya meda di bhum taneh Tay Nguyen.  

Phaok akok Uy mban bhap bini xã Kon Gang Phạm Văn Hảo brei thau: “Meng dom ilamu ngak  mbang kinh tế naih joi di drei, ong Ríp jak ba, daong tacei pato mikva dalam palei ngak mbang, tabiak truh kan kathaot saong yam tagok ngak kaya meda. Ong Ríp daok abih hatai hu mbaok tame ngak dom bruk dalam palei, dui pambuak mikva dalam palei jum pataom gauk, anit ranam gauk”./.