Tài tử Nguyễn Văn Hương hu gah tài tử, anek saih bhian ieu lac Wa Tám Hương atau ame Tám urak ni ngak phó chủ nhiệm kalup kapul Đờn ca tài tử tỉnh Sóc Trăng. Ong dok hu tỉnh Sóc Trăng pok panuac tagok pakat angaok pok brei ka ong  angan nghệ nhân ưu tú  kayua abih rai  pambuak song bruk Đờn ca tài tử di tỉnh Sóc Trăng song tacei pato ka rilo anek saih, dalam nan hu dom urang hu angan je yau urang kamei soạn giả Hà Nam Quang (phó chi hội sân khấu tỉnh An Giang). Ong duik rai biak kandang kandaih min lac sa gilang tư liệu quý ka bruk Đờn ca tài tử. Yaih khan ka tài tử Tám Hương, Lệ Hoa, urang vak di rayo sap ndom VN daok di bhum taneran krong CL hu kadha vak hadei di ni. 

Tài tử Tám Hương angan biak lac  Nguyễn Văn Hương, ndih tapui thun 1932 di palei Vĩnh Lợi, quận Châu Thành, tỉnh Bạc Liêu (tui angan ieu di saman Prang). Ong prong tagok di bhum palei Đờn ca tài tử saong mboh hadah mbaok meta ka bhum taneh ndih tapui tabiak drei. Ong khan lac, tuk nan dalam palei Bạc Liêu di ong, meda lac urang halei jeng takre dom urang naih gheih hu angan yau: Nhạc khị, Bảy Kiên, Trịnh Thiên Tư, Ba Chột, Sáu Lầu, Bảy Cao, Năm Nghĩa...v.v…song bruk patui gauk megru doh, bac paik champi biak chreih hatai. Tuk umo 15 thun ong Tám biak takre dom mban nhạc tài tử. Mehit labik halei hu pataom gauk đờn ca ye ong nao tal piah gam pang gam yaok nhịp dalam tain. Tal thun 1948, sang ong ba gauk tagok daok di Bei Gon, ong hu nao tui 2 đoàn cải lương di ai sang lac Bảy Cao song saai samuk lac Năm Nghĩa piah bac bruk ngak. Tal thun 1958, ong tal Sóc Trăng padang mbang ngui meng bruk padang sa mban nhạc tài tử  angan Hương Giang, hadei di harei taneh ia hu ya sa, mban nhạc hu ba tame Pasak ilamu, patagok jeng kalup kapul Đờn ca tài tử tỉnh Sóc Trăng mbiah tal harei ni. Ndom ka rai duik, bruk ngak di drei brei ka kol dahlak pang, tài tử Tám Hương tuk halei jeng mboh bui sambai kayua hu buh pren yava di drei tabiak piah khik ramik ilamu gheih mekre Nam Bộ meng dom saman ong muk caik veik. Ong lac: Camereip hulin bac paik champi, hadei di nan bac bloh bac paneh kadha doh. Drei biak takre meng tuk drei bahrau 16, 17 thun, tal  harei ni, nyu njom tame rilaow darah ye oh klak hu. Hulin ma-in tài tử, caong khik veik saong patagok veik ĐCTT ka dom rairah harei hadei. Kayua ni lac sa bruk main biak bình dân, livik saman ye bo nyu daok veik tal harei ni brei mboh nyu biak prong glong.

Urak ini umo labaih 80 thun, tài tử Tám Hương jeng dok pambuak song bruk Đờn ca tài tử di palei song pato tacei veik ka rilo anek saih, dalam nan hu dom urang biak hu angan je yau soạn giả Hà Nam Quang di tỉnh An Giang song rilo tal nghệ sỹ, tài tử ranaih umo karei karei. Ong oh lac pato daoh saoh bo dok pato paneh kadha, pachreih ba anek saih paglong hatai anit bruk ngak saong duah hu cảm hứng sống, cảm hứng viết. Soạn gỉa Hà Nam Quang, po di yaok rituh vở cải lương song kadha doh vọng cổ hu angan brei thau hatai sahaneng ka urang gru pato Tám Hương yau ini: Ame Tám abih hatai ka bruk ngak, thau cambaih ka ĐCTT, sang ong hu ilamu ka bruk nan. Tame daoh ĐCTT, ong Tám oh tuk halei daoh suan nhịp. Dahlak thau gah cải lương dok gah ĐCTT hulin bac di ong Tám biak rilo. Ka dua, ong naih joi, min oh ka tuk halei ong pah cada lac drei naih gheih di abih dalam tỉnh Sóc Trăng ni. Dom adei daoh oh njauk, ong Tám tacei pato cambaih laih. Ong pok meyaom taong abih yaom lac ong biak naih gheih. Hulin bac di ong Tám  biak rilo janih, sa nghệ nhân naih gheih  yau nan min oh kiêu căng. Hadei rilo thun ngak bruk hulin biak anit ranam iek praong ong Tám.

Meyah urang halei hu nao tal sóc Trăng njauk di harei 12 bilan 8 saka ia bilan meda mboh boh sang sit di tài tử Tám Hương jeng sa labik pataom mbok di dom tài tử rilo rai rah, kayua 42 thun ni mai, thun halei duik pasang ong jeng ngak lễ giỗ tổ nghề pak di sang drei. Harei nan, dom rai anek saih praong tagok meng dom labik, daok khik ramik saong bac bruk di pasak ilamu gam saong dom urang ngak gah khik ramik ilamu di palei hu taom gauk, hadar veik dom kadha meng kan, rik pren tame ka bruk praong nan lac khik mek nghiệp tổ: Kayua randap ye, meng sit mai bruk nan nyu jeng bhian randap dalam sang. Yaok thun tuk hulin cúng tổ ye dalam sang bak menuac, bui sambai lô. Urak ini dam dara urang ranaih umo mai rilo lô, tapa nan drei mboh bruk ĐCTT nyu daok khang tagok. Nan jeng lac bruk bui sambai ba mai ka drei.

Umo labaih 80 thun, tài tử Tám Hương oh daok pren piah daoh, min ilamu daoh di ong jeng daok lac sa kho báu. Oh ka thau tài tử Tám Hương hu pok brei angan lac nghệ nhân ưu tú halei oh, min dalam angan phó chủ nhiệm kalup kapul Đờn ca tài tử tỉnh Sóc Trăng, ong jeng daok ba abih hatai jai ka bruk ĐCTT saong mboh bui sambai lô tuk hu karja sangka tal dom nghệ nhân. Jaik 70 thun pambuak pagam haong Đờn ca tài tử Nam bộ, ong Tám Hương khan lac: hulin thau meyah urang dak kak kajap haong nghệ thuật, ngan saong dom gheih mekre yau dom bài cổ nhạc ye urang dak mbuan var, mbuan njaik atah bruk kanjah, bruk jhak. Saong bruk nan biak caong hu piah ka xã hội này, taneh ia ini dak harei dak bui sambai jang, siam mekre jang./.