Labaih sa bilan ini mai, di baha Kon Chắc Kro Ram Thlôt, xã Kim Hòa, huyện Cầu Ngang tuk mesup gam tuk biar harei jeng yau tuk melam jeng yava tagok sap yau ini. Ini lac sap papaoh akhar, pasram puac di dom anek saih bac akhar Khmer. Dom adei ralo meng lac anek saih phổ thông, tal 3 bilan hè tame baha bac akhar vak, ilamu bangsa drei. Adei Thạch Thị Đô Ra saong Thạch Thị Chanh Ni, 3 thun ini mai hè halei dom adei jeng tame baha bac akhar ndom:

 *“Hè halei adei jeng likau amaik ame tame baha bac akhar Khmer. Di labik ini adei oh lac hu bac akhar bo daok hu taom gaok, ndom meyai nao mai saong ayut barau, hu me-in kadha bhap bini. Urak ini adei puac hu akhar biak cambaih min adei daok bac gac piah joi sap Khmer jang”.

 *“Adei tame baha bac piah thau akhar bangsa drei. Yaok thun adei jeng kham merat tame bac. Urak ini adei thau puac, thau vak. Adei kham merat tal puac khóa pakacah mek hu điểm glaong, hu brei chứng nhận tamat tal bac”.

Yaom lac tal bac hu peih dalam tuk padeih hè, dui atah dalam 3 bilan, min thun halei jeng pachreih hu biak ralo anek kamuan urang bangsa Khmer mai bac. Thun ini, baha Kon Chắc Kro Ram Thlôt taduan jaik 150 adei anek saih, meng tal 1 tal tal 5, ralo di abih kuhria meng dahlau tal urak ini. Bruk ini dak brei mboh sap ndom, akhar vak, ilamu meng kan di bangsa daok hu rai rah ranaih umo patagok, khik ramik. Thượng tọa Thạch Đa Ra, trụ trì baha brei thau:

 “Dom thun ini mai tal bilan hè padeih 3 bilan, baha jeng hu peih tal bổ túc akhar Khmer pakat tiểu học ka anek kamuan phật tử. Kayua yau nan ye amaik ame biak njauk hatai saong pachreih anek bhik tame baha bac. Dom adei tame bac akhar dak harei dak ralo, thun hadei ralo jang thun dahlau”.

Ngan saong tal bac di baha, gru pato nan lac dom ong bhik atau dom À cha – urang bhian nao tu ralo thun, joi akhar Khmer jeng yau adat cambat tanarakun. Yaom lac tal bac tok rah tabiak dalam tukvak panak, min chất lượng bac daa di dom adei hu iek praong. Danak dak pato megru bhian hu salih barau, gam ralo bruk ngak karei piah ba chreih chrai daong ka dom adei  thau saong kanal bài siam di abih. Dalam tuk nan piah paglaong chất lượng, sở pato megru Trà Vinh pambuak saong sang bac đại học Trà Vinh peih tal pasram megru paglaong ilamu tui tanut chuẩn di mintri pato megru ka dom gru pato akhar Khmer di dom labik baha. Meng thun 2008 tal ini dom ong bhik, à cha – urang oh hu mbang jien bilan karja hu mbaok tame pato akhar Khmer di dom baha hu daong 25.000 đ sa tiết tui quyết định 30 di thủ tướng rajaei. Daok mintri pato megru tal urak ini jeng hu patabiak tapuk pato akhar Khmer tal tal 4. Ong Diệp Ken, baha Chrôi Tôn Sa, xã Kim Sơn huyện Trà Cú – urang hu labaih 30 thun pato akhar Khmer saong dua thun ini mai jeng hu mbaok tame tal pasram megru paglaong ilamu pato pakai kayua tỉnh peih tabiak, khan lac:

 “Yaok thun dahlak jeng hu mbaok tame tal pasram megru paglaong ilamu pato pakai, piah hu jalan pato ka dom adei mbuan thau jang. Di labik ini dahlak hu tacei pato, ngak iek jalan pato pakai dom môn hu peih pato dalam tuk padeih hè. Tapa tal bac ini dahlak mboh biak siam lagaih, pato uranaih thau siam jang dahalau ralo”.

Tui kuhria mboh, urak ini tỉnh Trà Vinh hu 136/142 baoh baha Khmer hu peih pato bổ túc akhar Khmer meng tal 1 tal tal 5 di tuk hè, pachreih hu jaik 11 ribau urang hu mbaok tame. Piah pachreih dom adei bac daa siam, tame tal bac dom adei oh lac hu bac saoh, bo baha daok buh jien kadung tabiak saong jak ba dom urang ngak pahala daong siphau, kalam ka dom adei. Abih di nyu nan lac, danak dak bac, langiu akhar Khmer dom adei daok hu duah thau ka ilamu, adat cambat bangsa, me-in dom kadha meng kan di bhap bini yau dui brak, tabit meta, jan gaok… Nan ye, dom tal pato akhar Khmer nan lac labik sinh hoạt hè biak siam ka dom adei anek saih, abih di nyu nan lac dom baoh sang kan kandah daok di palei pala. Đại đức Giang Thanh, trụ trì baha Chrôi Tôn Sa, xã Kim Sơn, huyện Trà Cú labik hu 185 anek saih daok tui bac, lac:

 “Langiu bac akhar dom gru daok hu pato dom adei bruk đạo đức, jalan ndom puac, tangi sua ong muk, amaik ame, gru pato, ong muk taha… tui adat cambat bangsa. Taphia di nan jeng hu pabak ka dom adei bruk ilamu, nghệ thuật yau dom ragam tamia, daoh ragu bhap bini, khan ao bangsa…. piah ka dom adei thau saong khik ramik ilamu di drei”.

Bruk peih dom tal pato akhar Khmer di baha brei ka anek kamuan bhap bini bangsa di tuk padeih hè nan lac sa dalam dom bruk ngak siam pachreih tui bruk ngak bilan hè khang kajap, bui sambai, kein lagaih. Tapa dom tal bac ini, gru pato jeng yau anek saih jeng kham merat paglaong ilamu, khik ramik, patagok sap ndom, panuac puac, akhar vak bangsa. Ini jeng lac bruk ngak siam piah khik ramik ilamu dalam bhap bini bangsa Khmer./.