Sang daoh tamia Biển Xanh tỉnh Bình Thuận nan lac sa dalam 19 kapul nghệ thuật lambaok ka dom kapul nghệ thuật di Việt Nam hu mbaok dalam Harei pataom tamia dunya 2014, mbang akaok meti hu peih tabiak di Huế meng harei 14 tal harei 18-4. 

Yaom lac dom harei bilan 4 langik pandiak pa-uh kan daok, min dalam khán phòng di sang daoh, dom adei sa-ai urang tamia thei jeng kham merat pathram gam haong dom biên đạo di sang daoh tamia Biển Xanh tỉnh Bình Thuận. Urang taoh ao, urang thal capha tal ta-uk, aia huac bak mbaok bak meta min oh mboh thei merao lac glaih glar. Dom ragam tamia limin lamuac, dom takai yam sami samar di dom urang tamia ngak ka khaol dahlak pachreih hatai tui iek. 

Nghệ sĩ Ưu tú – Biên đạo tamia Mai Kiên di Sang daoh tamia Biển Xanh tỉnh Bình Thuận brei thau: Dalam mbang hu mbaok di Harei pataom pak Huế mbang ini, sang daoh  hu 3 kadha tamia gam klak gam bahrau. Brei mboh ilamo biak karei di tỉnh Bình Thuận jang yau dom bangsa daok pak Việt Nam. Sang daoh jeng hu pasram biak siam saong đầu tư gah ý tưởng ka dom kadha di drei piah ngak habar tuk pakacah haong dom negar karei drei brei mboh hu ilamo biak karei di bangsa Việt Nam ngan haong ayut sahabat dunya.

Quỳnh Anh, urang tamia daok brei thau lac: Dalam 3 kadha ye adei hu mbaok dua kadha, dom kadha ini khaol dahlak hu parang me-in blaoh dalam nan hu kadha hu nao pakacah dalam taneh aia saong mek hu giải biak glaong. Kayua angan je di sang daoh tamia nan ye mbang pakacah ini khaol dahlak kham merat  abih drei.

Ini lac mbang akaok meti Việt Nam peih harei pataom tamia pakat dunya, hu mbaok 9 kapul di dunya saong 16 kapul dalam negar. Bruk daok pamaong tal nan lac duah tabiak kadha dreih gauk dalam ilamu tamia di dom bangsa saong pachreih dom kadha tamia bahrau. Tui jalan ngak yau nan, Sang daoh tamia Biển Xanh tỉnh Bình Thuận hu palih ruah 3 kadha biak karei ndung bak ilamo di urang Cam saong Raglai daok pak Bình Thuận nan lac: Hatai anit palei ngak lan am, Pui ginreih I-nư-gar saong Ragu tamia menuk glai.

Tui ong Mai Kiên, Nghệ sĩ Ưu tú – Biên đạo tamia, ilamo di urang Chăm tuk halei jeng ngak pachreih dom urang ngak gah ilamu nghệ thuật. Urang Chăm daneiy angan haong ragam tamia Áp-sa-ra, tamia kadhik… Tamia meng kan di urang Cam hu padang ngak tui jalan âm dương, langik tasik. Asal bangsa tuk halei jeng lac talei merai bhong nao gam saong saman bahrau, lac talei marai hijao xuyên suốt kadha, dua yếu tố ini tuk halei jeng lai tame gauk, paglaong ilamu di dom kadha. Biên đạo Mai Kiên lac: Dalam dom rija roya di urang Cam bhian hu bruk tâm linh nan lac urang sahneng tabiak dom pô yang tuk halei jeng daok dalam akaok ba mai hatai caong saong haniem phul ka anek manuac. Ye kadha Pui ginreih Inưgar ndom tagok bruk ginreih jeng yau bruk khang kadang di sa bangsa. Daok kadha Hatai anit palei ngak lan am nan nyu brei mboh bruk ngak mbang ngak huak di dom palei ngak, bo pak ini lac palei ngak lan, bo urang Cam ngak lan tui jalan thủ công nan ye tính cộng đồng biak glaong dalam bruk ngak mbang ngak huak, urang Cam lac yau nan. Kadha ini ndung bak ilamo bhap bini meng kan)./.