Menek tabiak saong praong tagok dalam sa baoh sang urang ngak nong kan kathaot di xã Xuân Hải, huyện Ninh Hải, tỉnh Ninh Thuận, Lượng Mai Lệ Hải tuk halei jeng thau yam tapa kan kandah di sang drei piah bac da-a piah pabak hatai caong ka harei hadei di drei. Meng hatai caong jeng sa nai gru, hadei di tuk bac tamat trung học phổ thông, Lệ Hải pakacah tame gah pato megru chính trị Sang bac Đại học sư phạm ban raya Hồ Chí Minh. Yam takai tame đại học, meng hatai kham merat di drei, Lệ Hải oh padeih pasram megru, paglaong ilamu chuyên môn, nghiệp vụ; rami ramik tukvak bac da-a biak siam, biak lagaih. Lingiu di nan, Lệ Hải daok duah thau, bac megru ilamu meng ayut sahabat saong dom sa-ai khóa angaok. Kayua yau nan ye, Lệ Hải samar jeng 1 sinh viên khá dalam 3 thun gam di sang bac. Oh lac bac da-a siam, Lệ Hải daok hu mbaok dalam kapul daoh tamia di sang bac, bhain tame dom danak dak daoh, tamia, me-in thể thao di khoa. Meng bac da-a siam, bahrau ini, Lệ Hải uan tabuan taduan hu jien bac “ sinh viên yam tapa kan kandah bac da-a naih joi” kayua dhar kapul bangsa Cam di ban raya Hồ Chí Minh alin brei. Ini lac bruk pachreih ba ka Lệ Hải kham merat jang dalam bruk bac da-a di drei. Lượng Mai Lệ

Daok ngan saong Thành Hoàng Thảo Nguyên, anai sinh viên di sang bac Đại học Mở ban raya Hồ Chí Minh, meng tuk daok bac phổ thông anai caong harei hadei jeng sa doanh nhân thành đạt. Meng hatai caong nan, tuk bac tamat trung học phổ thông, Thảo Nguyên pakacah tame sang bac Đại học Mở ban raya Hồ Chí Minh saong hu tame gah kinh tế. Thau lac bruk di drei nan lac bac da-a siam, tuk bac tamat bloh hu bruk ngak tani tanat piah pabak veik bruk amaik ame glaih glar raong anek nao mbang bac, Thảo Nguyên kham merat bac da-a. Lingiu tuk bac di sang bac, Thảo Nguyên daok caik tukvak bac di sang, duah thau tapa dom tài liệu, harak tapuk pambuak tal bruk bac piah pabak ilamu ka drei. Meng kham merat, tari taring, tapa 4 thun bac da-a, Thảo Nguyên hu 3 thun gam mek hu angan khá. Meng dom kham merat nan, thun 2014, Thảo Nguyên taduan hu jien bac “sinh viên yam tapa kan kandah bac da-a naih joi” kayua dhar kapul bangsa Cam di ban raya Hồ Chí Minh alin brei. Sa kadha bui sambai tra hu mai haong Thảo Nguyên nan lac dalam bilan 11 meng bloh, hadei di tuk bac tamat bloh Đại học, anai hu sa công ty di ban raya Hồ Chí Minh taduan tame ngak bruk văn phòng, saong yaom jien bilan 5 triệu đồng. Yaom lac bruk ngak nan oh ka njauk haong gah bac di drei, min Thảo Nguyên maong ini lac tuk piah pabak ilamu, piah patui jalan caong di drei. Thành Hoàng Thảo Nguyên khan lac.Lượng Mai Lệ Hải saong Thành Hoàng Thảo Nguyên  bahrau lac 2 dalam yaok ribau sinh viên Cam daok harei melam kham merat yam tapa kan kandah, yam tagok dalam bac da-a, pasram megru jeng urang siam hatung hatian. Bruk kham merat nan oh lac ngak pasiam rup pabhap, bo daok rik daong ka bruk patagok di taneh ia./.