Menyum alak bia oh daok thau hagait ba tal mesao gauk, ndom prong sap haong gauk, taong paoh gauk

Page harei 4 bingun tết, gah cấp cứu lingiu, pasak cấp cứu A9, Sang iek ruak Bạch Mai hu biak rilo manuac hu ba tame iek ruak. Dalam 4 harei tapa, yaok harei gah cấp cứu langiu hu taduan meng 25-30 urang njauk bala angaok jalan nao mai, bala meng taong gauk saong meng bruk sinh hoạt. Bác sỹ Nguyễn Như Phong brei thau: dom harei tết, bruk mebuk alak, taong klauk gauk hu biak rilo, tui labik njauk rabuis bo dom bác sỹ hu jalan langyah ka nyu lagaih: “Hu dom urang sơ cứu saong blac raih sit. Min hu dom urang njauk ba tame bilik blac raih. Urang halei trak  ye njauk pambuak rilo chuyên khoa karei gauk. Ngan haong dom urang ngak y tế, khaol dahlak kakei manuac sia dalam tukvak jit Covid njauk ngak tui dom adat hukum di Karja, Raja-ei, Mentri Y tế ka bruk pacang caga jit. Gam haong nan takik menyum alak bia, ngak njauk tui adat nao mai angaok jalan mbak piah hu mbang tết bui sambai”.

Biak di nyu, manuac urang njauk rambuis, metai lahik kayua taong klauk gauk dalam tuk Tết meda hu rilo jang yaok pataom di dom labik y tế di Karja saong daok hu rilo jang meyah kuhria tal harei 6 bingun bilan Sa – abih tukvak padeih Tết.

Bruk bui sambai harei akaok thun njauk padeih veik di oh takik sang tuk tết hu urang dalam sang ndih dalam sang iek ruak, njauk nao tal jabat công an atau pandik harao jang nan lac “miat miat oh daok hu veik mai saong” kayua taong gauk. Tuk hu bruk taong gauk, ba tal njauk rambuis, oh lac urang taong gauk bo abih menuac dalam sang, gauk gar, ayut sahabat, puk paga... jeng oh daok hatung hatai halei piah bui sambai mbang tết, ngak ka makna siam mekre di harei tết oh daok. Hu oh takik menuac urang tuk hu tangi sua jeng brei mboh lac oh njauk hatai haong bruk kateik gauk menyum alak, bia tuk Tết ba tal dom bruk oh siam kan thau dahlau, dalam nan hu rilo bruk taong, klauk gauk:“Tết ye bui sambai min jhui bui sambai biak rilo. Blaoh gaok alak độc, nao cấp cứu chip”

“Harei Tết, ilamo di urang Yuan lac nao taom gaok gauk hasit nan ye tadhau ayuh gauk 1,2 cavan alak ka nyu chreih chrai. Juai iek trak bruk menyum alak tapai, menyum rilo ye ba tal taong paoh gauk”.

“Harei karei jeng oh menyum rilo, juai ndom lac harei Tết, alak tapai ba mai rilo srau kadau”.

Menyum alak bia oh hu tuk padeih, menyum oh daok thau hagait, nan lac makna caik ka “alak tame panuac tabiak”, ba tal mesao gauk, ndom prong sap haong gauk, taong paoh gauk. Yau nan min, tui dom urang ilamu, taong paoh gauk dalam tuk Tết, oh njauk lac tok kayua sa makna mai meng alak bia. Bruk taong gauk haong thei nan meda lac bruk pandiak hatai di anak meta, lac tuk oh un sabar hu, min asal di bruk nan mai meng bruk pathram di yaok urang. Thiếu tá Đỗ Thị Phương Thanh, Học viện Cảnh sát bhap bani saong Phaok Giáo sư, Tiến sỹ, Gru pato pakat glaong xã hội học Phạm Hương Trà ndom lac:“Bruk taong paoh gauk harei Tết ye makna di nyu kayua hjatai sahneng di yaok urang. Gaok tuk mai kayua khin praong mbaok meta, bo hu sa panuac ndom oh njauk. Jeng meda kayua hu hasit alak harei Tết ngak ka dom urang nan oh daok khik hu panuac ndom jeng yau bruk ngak di drei, ba tal taong paoh gauk. Jeng meda kayua yaok urang oh eng drei pasram megru, piah pasang iek hu bruk ngak di drei”.

Oh tuk halei menuac sia mboh anit ranam gauk jang yau tuk tết. Njauk di nyu, bruk anit ranam gauk di manuac urang – baoh sang – puk paga hu kak kajap jang dalam dom harei akaok thun bahrau. Yau nan min dom urang tame sang iek ruak saong metai kayua taong paoh gauk dak harei dak rilo jang dalam tuk Tết dom thun jaik di ini. Saneng lac, yaok urang brei thau bruk di drei ngak anak adat hukum. Gam haong nan, njauk jhul khang bruk pato pakai adat hukum, mek pacang caga lac bruk praong, piah ka harei Tết lac tukvak bo manuac sia ndom puac haong gauk siam di abih./.

Urang lang: Jasi – 19/02