Pathau mikva saong taong abih gauk! Bảo hiểm y tế lac sarak an sinh biak siam dalam bruk iek glang pren yava ka bhap bini. Min dalam tuk peih ngak sarak ini di tỉnh Quảng Ngãi daok mblo tabiak rilo tavak tavaiy. Kadha vak di urang vak di rayo sap ndom Viet Nam daok di gah kreih negar brei thau ka bruk nan, da-a mikva saong taong abih gauk tui pang

Pasang likei di sa-ai Trần Thị Thuận daok di ban sit Chợ Chùa, huyện Nghĩa Hành, tỉnh Quảng Ngãi njauk ruak suy thận trak meng rilo thun ini mai. Sang kan kathaot, taong abih jien cai pandar dalam sang tal jien jru tavao, jien mbang bac ka anek bhik…jeng caong tame naong njam patam baoh kraoh di sa-ai. Dom bilan dahlau BS lac pasang likei di sa-ai njauk ung thư talang, sang biak duh hatai, nao mesraiy jien di rilo labik piah ba pasang likei tame ban raya HCM, bloh mai veik sang iek ruak Đà Nẵng, sang iek ruak Trung ương Huế piah iek ruak. Sa-ai Trần Thị Thuận khan lac: Meng hu thẻ bảo hiểm y tế urang kathaot, pasang likei di sa-ai meng diuk hu mbiah tal harei ini. Min urak ini, ba pasang likei nao iek ruak vượt tuyến tok hu bayar meteh yaom jien, daok veik oh thau duah pak halei: “ Pablei salih, patak pataom, nao nyim, nao mesraiy di urang lingiu darak, kan kandah lô min jeng kham merat nduac duah. Jru sang iek ruak brei bhian hu 5 janih, ye 3 janih hu, 2 janih oh hu njauk nao blei di gah lingiu. Jien jru bhian abih meng 3 tal 5 triệu đồng menyum hu 8 harei. Bharau ini 3 bilan pasang likei ndih di Huế, bloh daok sa drei, bloh tame Bei Gon, njauk lac ndih di sang iek ruak rilo jang daok di sang. Thẻ bảo hiểm hu daong ka urang kan kathaot)

     Tal urak ini, dalam tỉnh Quảng Ngãi hu labaih 220 ribau urang kan kathaot hu brei thẻ bảo hiểm y tế. Piah khik caga quyền lợi ka bhap bini, Bảo hiểm Xã hội tỉnh Quảng Ngãi hu jhul khang bruk salih bharau thủ tục hành chính, peih bruk pilih ruak baoh sang kathaot, baoh sang jaik si kathaot, piah meng akaok thun hu thẻ bảo hiểm y tế ka baoh sang kan kathaot. Ong Bùi Đình Thời, Phó Chủ tịch UBND huyện Nghĩa Hành, tỉnh Quảng Ngãi brei thau: “ Huyện tacei pato ủy ban dom xã, ban sit bhian pasang iek ka nyu kajap dom baoh sang kathaot, jaik si kathaot plaih labaih kurang tuk ngak danh sách. Padang danak dak phần mềm khik ramik dữ liệu ka cơ sở. Urang kathaot nao mai oh mbuan, rilo meng tut angan iek ruak di cơ sở, min jru tavao di cơ sở jeng hu takik, oh ginup yau di tuyến trung ương.”

          Bruk brei thẻ bảo hiểm y tế ka urang kan kathaot tukvak jaik di ini hu rilo salih bharau. Min bruk pilih ruah baoh sang kathaot saong jaik si kathaot jeng daok suai damuai, oh ka catang, daok labiah, kurang, daok suan angan, suan harei menek, bilan thun ndih tapui, ngak kan kandah tal quyền lợi di urang blei bảo hiểm y tế. Thun 2013, tỉnh Quảng Ngãi hu labaih 3000 thẻ bảo hiểm y tế cấp trùng, hu urang hu tal 3,4 thẻ, ngak palai pajoa jien padai karja. Bruk njauk biai nan lac, dalam tuk di bhum taneran tuk halei jeng bội chi Quỹ bảo hiểm y tế, ye di bhum ceik kadung jien labaih biak rilo. Biak di nyu mboh lac, jien labaih di kadung jien bảo hiểm y tế rilo meng mboh di bhum kan kandah, min oh ka labik halei hu mbang tui, bo brei payua abih tagok trung ương piah pabak ka dom labik kurang jien, labik thâm hụt quỹ. Ong Trương Văn Nam, Giám đốc Bảo hiểm Xã hội tỉnh Quảng Ngãi brei thau: “Bruk pilih ruah di dom xã oh ka catang ba tal bruk tuk urang nao iek ruak ye meng thau lac harak gar oh njauk angan. Gah nhập dữ liệu jeng hu rlo labaih kurang nan ye ba tal bruk salih veik thẻ. Hu urang mek thẻ ini nao iek ruak rilo mbang piah mek jru tabiak lingiu pablei. Anak tal kol dahlak brei pasang iek catang bruk ini.”

Piah ka urang kathaot blei bảo hiểm y tế oh njauk khat lihik, Karja njauk hu sarak ưu tiên đầu tư paglaong bruk iek ruak saong dịch vụ y tế ka tuyến cơ sở, daong palagaih ka urang kathaot di bhum ceik, bhum atah bayah hu mbang tui dịch vụ y tế tiên tiến saong dom urang jakar y tế hu ilamu glaong. Ini jeng lac sa dalam dom jalan njauk ngak chip piah patrun bruk urang ruak vượt tuyến nao iek ruak daok rah tabiak rilo dalam taneh ia./.