Labaih 2 adit tapa, urang dok di xã Phước Vinh, huyện Châu Thành mbang huak oh bingi anak bruk ia di krong Vàm Cỏ Đông nyu njom nerak trak, ngak ka ikan metai rilo. Labik Bến Đá, di palei Phước Trung hu rilo bè rong ikan ia taba dok rah tapen krong, sang rilo ye 5,6 bè, sang halei takik jeng 1 atau 2 bè. Sang muk Lưu Ngọc Huệ hu 3 bè rong ikan rô phi song ikan điêu hồng. Dom harei tapa, ia krong njom nerak ngak ka 2 dalam 3 bè rong ikan di muk Huệ glaih glar, hu ikan metai, hu ikan klaak mbang. Amuk Huệ duah abih jalan piah dong ikan min oh jeng. Puac di abih, muk nduac duah urang mai blei piah caong mek veik phun jien. Amuk  Lưu Ngọc Huệ khan lac:

Mehit ikan mblo akaok tagok ye dui mô tơ peih jamriak ka ia nyu parai tabiak piah dong ka ikan min oh jeng, ikan nyu ndaong, metai, dalam sa tuk metai abih bè. Mik va di labik ni kan kathaot, oh hu taneh pala drak, cong tame dom bè ikan, urak ni yau ni, thei jeng kan kandah abih.

Jeng hu ikan metai kayua ia njom nerak nan lac sang ong Nguyễn Văn Lộc. Meng 20 thun ni mai, ong Lộc duik meng bruk rong ikan ia taba di angaok krong Vàm Cỏ Đông. Meyah oh hu bruk njom nerak ye tal tuk chap ikan pablei, yaok ký ikan bống tượng sang ong dok rong, pablei tabiak meng 200 tal 250 ribau đồng. Min vụ ikan thun ni, ong Lộc khat lihik kayua ikan metai. Bruk ia krong bhian njom nerak ngak ka ikan metai ngan song dom urang luac thun pambuak pagam song krong ribong nan lac bruk bhian rah tabiak, min mbang ni nyu khang jang, tapa hatai sahaneng di ong Lộc.

Dom thun dahlau ikan metai min takik, 5-6 thun ni mai jeng hu 1 mbang. Ikan bống ni nyu khang pren l ô, diuk hu dalam ia nerak, 2-3 harei oh njauk hagait, min tukvak ia njom nerak lavik l ô, ikan meng metai) 

Dalam dom urang rong ikan di palei Phước Trung, xã Phước Vinh, glaih glar di abih nan lac sang ong Nguyễn Văn Đạt. Sang kan kandah, yaok harei duik pasang ong Đạt nao pablei vé số, patom jien rong ikan trắm cỏ song điêu hồng. Oh hu jien blei pandap mbang công nghiệp, ong mek pandap klaak song nao paik lục bình brei ka ikan mbang nan ye tapon ikan di ong suai prong, tuk vak rong suai jang urang. Urang karei rong 2 thun ikan trak 3 kg, min sang ong rong dalam 3 thun. 2 duik pasang ni kuhria mboh lac, meyah pablei abih ikan meda laba hu labaih 200 triệu đồng, hu jien ye peih prong bè rong ikan, oh dok nao pablei vé số song tagok thu padang sang dok tani tanat. Min urak ini dom caong khin jeng seik tui ia, ralai tui ngin tuk ia krong njom nerak ngak ka ikan dalam bè sang ong Đạt metai jiak abih. Ong Nguyễn Văn Đạt dut hatai lac: 

Bhian di nyu ikan palao rong tal 13 bilan oh ruak kik hagait. Ia ni tui hulin mboh kayua sang mac mì tathuak tabiak meng yau nan, ia kraong oh nerak tachauk yau nan. Ikan jiak 5000 drei, metai jiak 98%, harei lei ikan jeng metai, dok bè saoh.)

Tuk vak rah tabiak bruk ikan metai meng harei 3/3. Tuk thau hu bruk nan, urang jakar chuyên trách di xã Phước Vinh song huyện Châu Thành hu nao tal labik rong ikan di Bến Đá piah pasang iek, duah thau tapak. Sở Tài nguyên Môi trường tỉnh Tây Ninh jeng hu mek mẫu ia krong song hu panuac lac: dom thông số jeng yam tapa tanut môi trường meng 2 – 5 mbang, ôxi hòa tan bier, ngak breil ikan metai. Min mbiah tal urak ni, gah chức năng jeng oh ka hu panuac lac makna ngak ka ia njom nerak mai meng ia tathuak di 2 Doanh nghiệp Sầm Nhất song Hồng Cúc  yau bhap bini medhi halei ô, saong urang halei taduan bayar khat lihik ka dom boh sang rong ikan. Ong Nguyễn Đình Xuân, Giám đốc Sở Tài Nguyên - Môi trường tỉnh Tây Ninh brei thau:

Bruk DN ngak njom nerak njauk xử phạt lac bruk oh plaih hu, min meyah bhap bini khin hu bayar brei tacei hu bruk sang mac tathuak ia tabiak  tapak ngak metai ikan di bhap bini song ikan ni brei rong dalam quy hoạch, hu đăng ký meng hu bayar brei) 

Tui Sở Tài Nguyên-Môi trường tỉnh Tây Ninh, labik rong ikan bè di Bến Đá, palei Phước Trung song palei Phước Lộc, xã Phước Vinh, huyện Châu Thành hu meng yaok pluh thun tapa, min nyu oh dok dalam quy hoạch rong pala patagok kaya ikan di tỉnh. Nan ye, bhap bini njauk khat lihik tuk hu tranh chấp pháp lý, ndok quyền lợi di drei. Sở Tài Nguyên-Môi trường daok tui iek, mek ia meng krong Vàm Cỏ Đông song ia nerak tachuak meng dom DN ngak bei blom di gah angaok krong, hadei di nan payua nao ban raya HCM dut iek. Tuk thau cambaih laih, meng hu jalan langyah ngan saong dom menuac urang atau đơn vị ngak nerak tachuak krong Vàm Cỏ Đông ba tal bruk ikan metai rilo yau urak ni./.