Tui bruk ba tabiak, bilan hè thu thun 2014, tỉnh Tây Ninh parabha labaih 200 triệu m³ ia ka bruk pala drak meng 3 công trình thủy lợi praong di binek Dầu Tiếng, binek Tha La saong dom blai bơm điện. Meng hadom ia yau nan, meda pruh hu ka jaik 42.800 ha. Min tukvak jaik di ini, kayua nduac tui kein laba anak meta, ralo sang urang nông daok di tỉnh ini eng drei salih taneh ngak padai tapa pala pablak ralo janih phun pala. Rilo bruk pala pablak yau ye: padai – njam patam, padai – phun công nghiệp, phun mbang baoh… daok ba kandah gauk dalam bhap bini saong ngak kan kandah oh sit dalam bruk khik iek, qui hoạch bhum pruh ia ka bruk ngak nông di tỉnh. Ong Nguyễn Hoàng long – phaok giám đốc xí nghiệp thủy lợi ban sit Tây Ninh brei thau:

“Labik pruh di ban sit Tây Ninh hu 5 xã labik pruh saong 2 xã jaik taphia di huyện karei. 5 labik pruh ye labik halei jeng pala phun oh yau gauk, phun pala pablak gauk hu phun takik harei, phun lavik harei, nan ye bruk pruh ia biak kan kandah, adei sa-ai biak glaih glar”.

Tui pathau khan di công ty TNHH sa thành viên khai thác thủy lợi Tây Ninh, yaok thun, công ty jeng hu kế hoạch pruh saong parabha bruk pruh sit ka yaok xã, yaok labik pruh yau: taneh pruh, công suất blai njuk, dung tích danao padang ia saong tanut kan kandah ka bruk khik iek công trình. Min, kayua bruk pala pablak ralo janih phun pala dalam bhum pruh daok ralo, urang nông oh ngak njauk tui qui hoạch pala drak, eng drei pok haluk pacang jalan ia nduac piah pruh ka phun pala di drei, ngak kan kandah tal bruk parabha ia pruh jeng yau bruk khik iek khai thác dom công trình thủy lợi. Ong Nguyễn Công Tâm, urang jakar khik iek ia pruh palei Tân Hòa, Tây Bình, ban sit Tây Ninh lac:

‘Menuac caong menuac oh khin, nan ye bruk parabha ia biak kan kandah. Nan ye drei brei taom gaok tapak, harei halei jeng hu mbaok di labik ini piah parabha ia ka mikva. Meyah caong ye peih ia khang jang,, daok oh caong ye peih sit atau kreik veik”.

Ong Lê Thành Công – giám đốc công ty TNHH sa thành viên khai thác thủy lợi Tây Ninh brei thau:

“Piah langyah bruk ini ye kol dahlak ieu pataom công nhân, adei saai kol dahlak tui iek tapak  di langiu ribaong piah langyah chip brei ka urang nông. Công ty jeng hu ngak pasiam dom ribaong, abih di nyu nan lac kuac rok dom ribaong, caga hajan ralo ngak dauk dom phun công nghiệp ye brei tathuak ia ribaong nan, langyah bruk dauk ia ka urang nông”.

Bruk urang nông di tỉnh Tây Ninh eng drei pala pablak ralo janih phun pala angaok taneh hamu oh lac ngak tayah bhum qui hoạch ngak padai, bo daok pacang bruk quy hoạch thủy lợi ka bhum pala drak di tỉnh. Dom gah pambuak tal bruk ini di tỉnh brei kham merat duah jalan langyah dom kan kandah, tavak tavaiy urak ini; taphia di nan, patagok bruk pathau khan, piah paglaong akaok saneng ka urang nông dalam bruk pala pablak phun pala./.