Dalam dua bilan tapa, di labik glai pacang caga Dầu Tiếng, huyện Tân Châu, tỉnh Tây Ninh rah tabiak jaik 40 mbang apui mbang glai  praong, hu tuk apui khuah labaih 20 mbang dalam 2 adit, khat lihik jaik 100 hecta glai, ralo meng glai pala birau, glai phun sit, hareik…Langik thu bhang lavik harei saong mai tal aval jang dom thun dahlau ngak ka bruk khuah glai mbuan si rah tabiak jang. Tukvak khuah glai bhian rah tabiak di jala pandiak, hu hangin nan ye kan si padam. Min, tui Chi cục Kiểm lâm Tây Ninh, ralo mbang apui khuah glai meng blaoh mboh yau anek manuac khin palai pajoa glai, yau ye di harei 20 bilan 2 rah tabiak 4 mbang, 3 mbang di tiểu khu 43, tha mbang di tiểu khu 37, dua labik ini atah di gauk labaih 10km. 

Langiu dom makna ba tal apui khuah glai yau ye: kayua mikva tame glai kaoh njuh, paik dom janih phun pala di tapen glai ngak pui khuah, hu urang khin cuh di tapen glai piah cang tal bilan hajan mai lih tame taneh ngak nong, gah chức năng Tây Ninh duah mboh lac apui khuah glai yau tukvak tapa nan hu manuac jhak hatai khin cuh glai. Kol nyu tui iek bruk ngak di gah kiểm lâm,  khin cuh rilo labik dalam sa tukvak piah parabha urang khin iek glai tabiak. Ini lac dom urang khin lih mek taneh glai ngak apuh suan hukum. Ong Nguyễn Hoàng Sơn, Akok Ban khik iek glai Dầu Tiếng, huyện Tan Chau lac:

Hu rilo harei rah tabiak rilo mbang khuah, daok khuah di labik ini ye labik  jaik taphia nan jeng khuah tui, padam bloh labik ini ye tal labik diah khuah. Meda hu menuac oh njauk hatai kayua bruk khik iek di drei dak harei dak catang. Oh lac samar pacang cakak hu abih, njauk pathau khan suai livik..

Dalam tuk nan, dom glai karei dalam tỉnh Tây Ninh jeng mbuan si khuah kayua langik pandiak bhang khang. Abih di nyu nan lac, glai labik taphia negar Campuchia, bruk pacang caga apui khuah glai dak hu caik hatai sangka jang kayua  urang Campuchia daok taphia negar bhian randap cuh glai ngak apuh, mbuan pambak khuah. Gah khik iek glai brei parilo menuac khik iek luac harei melam di dom labik mbuan si khuah, caga pacang apui khuah. Ong Nguyen Van Cong, Akok Mban khik iek glai ialmu – sajarah Chàng Riec, huyen Tan Bien lac:

Apui khuah bhian kayua pambak meng Campuchia tapa. Drei hu ngak jalan pacang apui khuah, hu mbaok khik iek mboh khuah ye padam chip. Tuk pataom mbaok dom cụm taphia negar ye drei khan ka mikva thau caga apui khuah. Langiu di nan, dom gah khik iek glai bhum taphia negar pambuak bruk siam lagaih.

Urak ini, bruk mbuan khuah glai di Tây Ninh daok di pakat 5, lac pakat biak mbuan si khuah. Tapa pasang iek tapak rilo glai di tỉnh jeng mboh mbuan si khuah, dalam nan hu labaih 38.600 ha glai tự nhiên, labaih 10 ribau ha glai pala saong jaik 7.400 ha glai tamuh birau.

Anak bruk kan kandah kayua langik pandiak bhang saong bruk palai pajoa di anek manuac, tỉnh Tây Ninh hu tacei pato dom huyện, xã, mBan khik iek glai patagok bruk khik iek, caik biển brei thau bruk mbuan si khuah glai, pabak dom pandap padam apui, ngak jaln pacang apui, brei hu dom kuang padang ia , radaih li-ua pajeng ia jaik labik mbuan si khuah.

Gah khik glai pandar abih dom hagait drei hu, sami samar dalam bruk khik iek, patagok bruk pathau khan, yau: duah phun glaong piah ngak labik daok khik apui, pasram pacang caga apui khuah glai; gah khik iek glai di tỉnh, huyện bhian trun daong…Dom gah yau ye cảnh sát pacang padam apui khuah, urang lin jeng caga hu mbaok tuk hu apui khuah praong. Abih di nyu nan lac, bruk pathau khan jak ba hu iek praong piah ka bhap bini thau saong juai palai pajoa glai, ngak bruk tapak saong dom urang taha, akok palei, tui dom mbang taom gaok mikva di Uy ban mat tran negar piah pablak tame bruk pathau kahn jak ba mikva khik iek glai. Ong Mang Văn Thới, phaok akok Chi cục khik iek glai tỉnh Tây Ninh lac:

 Bruk khik iek glai, pacang padam apui khuah glai meyah oh hu mbaok , oh hu bruk pachreih tui di bhap bini ye oh ngak hu. Bruk pathau khan, pato pakai bhap bini nan lac bruk praong abih. Ini lac jalan hajan tathaiy taneh tathak suai. Pataom tame bruk pathau khan bhap bini di palei tapa rilo jalan, tapa rayo papar binguk, tapa balai papar sap di huyện, xã brei bhap bini thau khat lahik kayua cuh glai meng nan paglaong jalan sahaneng khik iek glai.

Langiu bruk pathau khan, urak ini gah khik iek glai tỉnh Tây Ninh hu pambuak haong karja palei saong công an palei duah thau, pasang iek dom dom urang khin cuh glai piah samar pacang cakak. Min , piah patrun, patakik hu bruk mbuan si khuah glai, praong di abih jeng lac bruk pathau khan piah ka bhap bini thau paglaong akaok sahanng khik iek glai. Tuk halei bhap bini daong tame ye bruk khik caga apui khuah glai meng hu siam./.