Urak ini, ia di binek Dầu Tiếng, lac labik pabak ia pruh ka bruk pala drak saong ia hacih ka dom sang mac ia di dom tỉnh Tây Ninh, Bình Dương, Long An saong Ban raya Ho Chi Minh daok trun biar 22,87 mét, biar jang tanut ia binek 1,53 mét, kurang 324 triệu mét khối ia. Piah pacang caga pandiak bhang, khik ginup ia pala drak saong ia pandar ka bhap bini, meng akok vu padai đông xuân 2015 - 2016, Công ty TNHH MTV khai thac thuy loi Dầu Tiếng - Phước Hòa pambuak saong Công ty TNHH MTV khai thac thuy loi Tây Ninh, Công ty khik iek khai thac dịch vụ thuy loi Ban raya Ho Chi Minh padang bruk parabha ia pruh patak pataom. Tui nan, Công ty brei ngak tui jalan pruh ia patak pataom tapa 3 ribaong praong nan lac: ribaong Đông, ba ia pruh ka 36.600 hecta phun pala di Tây Ninh saong Ban raya Ho Chi Minh; ribaong Tây ba ia pruh ka 21 hecta phun pala di tỉnh Tây Ninh; kênh Tân Hưng ba ia pruh ka labaih 10 ribau hecta. Parabha harei peih kareik ia yaok adit meng 17 tuk harei angan tal 17 tuk harei sanecar; khik ia 3,5met khối dalam tha giây. Ong Bùi Xuân Đại, Phó akok Công ty TNHH MTV khai thác thuy loi Dầu Tiếng – Phước Hòa brei thau:

“Dalam tuk peih ia, Công ty khol dahlak bhian pambuak bruk saong 2 công ty di 2 tỉnh, ban piah khik iek catang oh caik ka ia nyu sraiy ngak khat lahik, palai pajua. Công ty khol dahlak hu panuac caong 2 công ty pathau khan brei ka dom  kapul nyaom, menuac urang saong bhap bini paglaong akok sahaneng brei pandar ia patak pataom; palih ruak phun pala lagiah, salih taneh pala padai mbuan kurang ia tapa pala phun karei takik pruh ia min hu siam; Ka klau, Công ty pambuak saong tỉnh piah thau tukvak ia ndik, ia mbak di kraong Bai Gon, kraong Vàm cỏ đông piah kuhri kuhria saong peih ia pabak trun kraong lagaih ka bruk pala drak, gam patak pataom ia”.

Langiu bruk parabha tukvak peih kareik ia, dalam tuk peih ia pabak ka bruk pala drak, Cong ty tacei pato jabat khik iek ia saong công trình pambuak bruk haong xí nghiep thuy nong palei dut iek halau ia piah peih kareik ia hu lagaih saong bruk pala drak, patak pataom ia; kakei mikva urang nong brei pandar patak pataom, salih bruk pruh ia pagap mbiah, juai palai pajua khat ia. Sa-ai Nguyễn Anh Thái, Phaok akok jabat khik ia saong công trình, Công ty TNHH MTV khai thac thuy loi Dầu Tiếng- Phước Hòa brei thau:“ Ngan saong mikva urang ngak nong ye hu khan ka tukvak peih kareik ia tal yaok baoh sang piah mikva thau sumu ba ia tame hamu di drei. Meng akok vụ tal urak ini oh thei lac kurang ia kayua hu urang jakar bhian hu mbaok tui iek”. 

Meng bruk kuhria brei peih kareik ia tani tanat di Cong ty TNHH MTV khai thac thuy loi Dầu Tiếng – Phước Hòa, rilo mblang hamu, bein njam patam di tỉnh Tây Ninh saong dom tỉnh jaik taphia hu ia pruh tani tanat, yauk kuak hu rilo padai brah. Lac sa dalam yaok rituh baoh sang urang ngak nong hu mbang tui ia meng ribaong Tua 2, huyện Châu Thành  tui ribaong ine binek Dầu Tiếng, ông Võ Văn Lã biak bui sambai kayua hu ia pruh tani tanat, vụ padai đông xuân ini sang ong njauk linge pablei hu yaom glaong. Meng 2 hecta lange, sang ong laba hu jaik 100 triệu đồng. Ong Lã chreih chrai khan lac:“Ia di binek Dầu Tiếng di labik ini hu ginup, ia tui hu lagaih saong tuk halei jeng hu ia”

Tui bruk aba tabiak dalam thun 2016, Cong ty TNHH MTV khai thac thuy loi Dau Tieng – Phuoc Hoa brei 118, 628 triệu mét khối ia pruh ka bruk pala drak saong ia pandar ka bhap bini; ia nduac eng 166.348 hecta; padang ia pruh 125.000 hecta. Tui jalan patak pataom ia di urak ini, bilan padai đông xuân gam vụ hè thu, vụ mùa oh lac tỉnh Tây Ninh, bo Ban raya HCM, Long An, Bình Dương meda hu ginup ia pruh./.