Tết thun halei jeng yau nan, rah tui jalan taphia negar atah labaih 292 km  taphia dua taneh ia Lào saong Capuchia labik tỉnh Kon Tum, palei halei jeng tuan hala dok negar. Piah khik kajap bruk pacang caga jit Covid-19 min daok hu mbang Tết, thun ini Harei pataom ngak ahar bánh chưng hijao di dom palei taphia negar Kon Tum hu salih jalan ngak. Oh daok pataom abih menuac dalam palei caga  sambai Tết, karja palei gam saong urang jakar, urang lin đồn biên phòng tacei pato bhap bini parabha jeng nyaom sit papaok ahar bánh chưng, brei urang lambaok peih ngak adat cambat blaoh parabha har ka yaok baoh sang. Sa-ai Thao Mía, palei Bun Ngai, xã Sa Loong, huyện Ngọc Hồi bui sambai brei thau: yaom lac thun ini oh mbang Tết haong gauk ka abih menuac dalam palei, min hu urang jakar, urang lin biên phòng Tết jeng bui sambai, mikva biak njauk hatai:“Urang jakar, urang lin Đồn Biên phòng Sa Loong mai mbang Tết haong bhap bini, daong biak rilo, tacei pato mikva papaok ahar bánh chưng. Dahlau di nan jeng hu pasang iek yaok baoh sang oh caik ka sang halei kurang pandap mbang Tết. Mikva biak bui sambai saong njauk hatai mong urang jakar, urang lin biên phòng yau menuac dalam sang di drei.”

Hu jeng bhian randap, taong abih dom Đồn Biên phòng di 13 xã taphia negar di 4 huyện, Đăk Glêi, Ngọc Hồi, Sa Thầy saong Ia H’Drai di Kon Tum  thun halei jeng peih bruk mbang Tết saong bhap bini. Trung tá Phan Trọng Bình, Akok Đồn Biên phòng Sa Loong, huyện Ngọc Hồi brei thau, gam saong bruk khik iek jalan taphia negar atah labaih 17 km taphia negar Campuchia dalam tuk jit ruak Covid-19 rah tabiak srau kadau, bruk pambuak saong karja xã peih bruk sambai Tết ka bhap bini jeng hu urang jakar, urang lin di Đồn maong lac bruk ngak, gam lac hatai anit ranam gauk: “Đồn Biên phòng Sa Loong pambuak saong karja palei peih Harei pataom ngak ahar bánh chưng hijao. Ini lac sa bruk hu meng lavik mai di biên phòng dalam negar. Đồn Biên phòng pambuak saong pakat ủy Đảng, karja palei duah thau dom baoh sang oh hu jien mbang Tết piah daong ka mikva uan raok Tết dalam bui sambai, oh hu thei njauk klaak veik gah lihuk”.

  Xã taphia negar Sa Loong, huyện Ngọc Hồi, tỉnh Kon Tum hu 1.479 baoh sang saong labaih 6.000 urang. Dalam nan, labaih 85% lac urang bangsa takik. Gam saong urang Xơ đăng daok meng lavik mai hu ralo di abih, daok hu dom baoh sang di 14 bangsa meng gah Barah negar tame daok, yau: Mường, Thái, Tày…Kayua yau nan harei Tết di bhum taphia negar Sa Loong hu biak rilo janih. Langiu di lisei lam, alak ghè, caduk mây, njam rớn…daok hu rilo kho nhục, bu yamen lam, ahar khảo. Dalam bui sambai harei puac thun, bhap bini saong karja xã Sa Loong jeng hu panuac siam mekre di abih tuk ndem tal dom urang jakar, urang lin biên phòng. Ong A Chơl, akaok palei Giang Lố 2 brei thau:“Thun halei jeng yau nan, urang jakar urang lin Đồn Biên phòng Sa Loong harei Tết jeng mai haong bhap bini. Meng hu Biên phòng mikva drei meng thau papaok ahar bánh chưng hijao. Baoh sang kathaot, sang daok sa drei dalam palei hu bo đoi Biên phòng alin brei pandap, brei ahar bánh chưng piah mbang tết. Mikva biak uan tabuan, sambai hatai.”

Harei puac thun, ba tui bruk bui sambai Tết saong hatai anit ranam di bhap bini labik taphia negar, dom kapol nyaom di Đồn Biên phòng Sa Loong kandi kandang pabak menuac ka dom bilai khik caga taphia negar. Anak bruk jit ruak Covid-19 rah tabiak srau kadau, piah ka puk palei hu bui sambai mbang Tết, ngak tui jalan pato di Đảng, Karja, Mentri Quoc phong saong meng hatung hatai di drei, dom urang lin Đồn Biên phòng Sa Loong Tết thun ini khik veik 3 nyaom khik kajap bhum taphia negar, khang hatai oh caik ka menuac saong jit ruak tame dalam negar./.

Urang lang: A.Nghiem  9/2/2021