Palei Mười Mẫu daok di bhum biên giới di xã Phước Thiện, huyện Bù Đăng, tỉnh Bình Phước. Dahlau diah, rai diuk di labaih 40 baoh sang urang bangsa takik tok pambak tame bruk jah tak glai ngak apuh, harei pak ini harei pak diah nan ye rai diuk gaok ralo kan kandah. Eik lipa, ruak kik tuk halei jeng hu mboh dalam mikva labik ini. Hadei di jaik 5 thun peih bruk ramik veik, grap tanat dom xã tapen negar Việt Nam – Campuchia tui sarak di tỉnh Bình Phước, tal harei ini rai diuk di mikva hu grap tanat. Meng sa bhum taneh balau harei halei urak ini hu jeng sa labik pala cao su, amaraik kalu, pa-aok blait, ba mai yaom kinh tế prong. Yaok baoh sang urang bangsa takik labik ini hu brei labaih 1 héc-ta taneh daok saong taneh pala drak, hu daong phun pajaih, pandap pala drak, padai brah... Bruk du canh du cư, jah tak glai ngak puh oh daok mboh tra, bruk ngak suan adat hukum quy chế biên giới jeng oh daok, bhap bani labik ini tok kuhria ngak mbang, pandar ilamu kỹ thuật, pala pablak siam lagaih piah cakrok patagok kinh tế baoh sang.

Ong Điểu Dê – Phaok akaok palei Mười Mẫu brei thau, rai diuk mikva harei ini dut haong dahlau diah hu trei sil, siam mekre jang. Hu Karja sangka brei taneh daok, taneh pala drak, blaoh peih tal pato akhar huroh, meng nan mikva meng thau puac, thau vak. Meng nan bac hu jalan pala saong iek glang phun cao su, phun amariak kalu, jien mek tame grap tanat, hu dom baoh sang thau kuhria brei anek nao mbang bac. Ndom ka bruk kuhria caga mbang Tết cổ truyền Ất Mùi 2015 ini, ong Điểu Dê bui sambai khan lac: Sang dahlak jeng tui adat di urang Yuan, oh njauk lac yau meng kan diah. Melam 30 ye ngak salao lisei uan raok giao thừa. Tuk Tết karja palei gam haong dom urang ngak pahla hu brei pandap panda ka mikva. Sang halei kathaot ralo oh hu jien mbang Tết hu karja palei sangka iek glang, oh klaak thei, thun halei jeng yau nan, oh hu ralo jeng hu takik. Nan lac brah, mì tôm, ndiuk piah ka mikva tapok bánh chưng, ngak pei nung)

Jeng yau dom baoh sang karei, dahlau diah kayua oh hu taneh pala drak, oh hu phun jien ngak mbang nan ye sang sa-ai Đầu Khắc Cử daok di palei Mười Mẫu tok nao ngak mbang pah tui thời vụ, rai diuk di sang sa-ai tuk halei jeng kurang anak, kurang likuk. Tal thun 2010, sang sa-ai Cử hu urang jakar,  chiến sĩ Đồn Biên phòng Đắc Quýt daong ngak van, pato pathram ilamu raong pabe, daong phun jien piah blei anek pajaih... Sa-ai Phạm Văn Quỳnh – Chính trị viên, Bí thư Đảng ủy Đồn Biên phòng Đắc Quýt, tỉnh Bình Phước brei thau: Ndom ka bruk daong bhap bani ye đơn vị jeng hu palih ruah 3 baoh sang dalam palei Mười Mẫu ngan haong mô hình raong pabe. Dalam thun bloh, Đảng ủy đồn gam haong karja palei hu daong ka 3 baoh sang tabiak truh kathaot.)

Lingiu di nan, baoh sang sa-ai Cử daok hu dom đơn vị daok ngak bruk dak padang dự án kinh tế quốc phòng pak ini jao brei 1 héc-ta cao su piah kuah katak. Tuk hu jao brei bein cao su piah kuah, sa-ai Cử kham merat ngak, thâm canh tăng vụ. Tal urak ini kinh tế baoh sang sa-ai hu jang dahlau biak ralo. Karja palei gam haong dom đơn vị, công ty, xí nghiệp daok hu daong padang ngak sang bahrau yaom 60 triệu đồng ka sa-ai. Yau nan hadei di dom thun bilan glah glar, Tết ini sang sa-ai biak biai hu salih bahrau. Sa-ai Đầu Khắc Cử brei thau: Sang halei caong khin raong pabe ye đồn daong jien atau anek pajaih ka mikva raong. Ta-eng sang dahlak hu urang jakar tabiak daong ngak van, pasiam veik sang danaok saong padang hu dom got amariak kalu. Urak ini sang dahlak hu blaoh dom rituh got amariak kalu di gah lakuk sang. Rai diuk jeng hu siam jang nan ye Tết ini jeng blei ralo pandap jang, ngak hagait ngak ye Tết njauk hu ginup abih.)

Kadha bui sambai di sang ong Điểu Dê saong sa-ai Đầu Khắc Cử gam haong labaih 40 baoh sang urang bangsa daok pak palei Mười Mẫu yau hu tagok jang rilo mbang tuk Tết ini dom baoh sang hu karja palei daong dui điện tame tal sang. Hu điện blaoh, rai diuk di bhap bani bhum tapen negar ini meda cakrok. Ong Nguyễn Đức Huy, akaok Ủy ban Bhap bani xã Phước Thiện, huyện Bù Đốp, tỉnh Bình Phước brei thau: Thun blaoh khaol dahlak buh jien tabiak ngak labaih 7 km jalan nhựa tame palei Mười Mẫu, labaih 1,4 tỷ đồng katung jalan điện trung saong hạ thế tame labik 134 saong khaol dahlak kham merat dalam thun 2015 ini, dahlau Tết piah ka mikva hu điện pandar. Hu điện blaoh meda hu mac maoc piah ngak mbang pala drak, hu bingun khoan piah mek aia pruh. Dahlak jia lac danak dak prong ini di Karja meda ba mai hadah hadai,, grap tanat bruk cakrok patagok kinh tế di labik ini .

Khaol dahlak likau drei mikva palei Mười Mẫu nao sang dalam langik la-ar di kreh bein cao su praong daok jruh hala; dom bein pa-aok blait daok trak baoh meda brei thau ka sa bal bingu bahrau daok mai angaok bhum taneh tapen negar. Bruk daong pren di dom pakat, dom ngành, gam haong bruk kham merat yam tagok di mikva, taong abih bruk nan hu ngak jeng sa pren yava bahrau angaok bhum taneh tapen negar. Tadhau ayuh ka mikva daok pak dom labik bahrau dalam tỉnh Bình Phước hu rai diuk dak harei dak trei sil saong kaya meda./.