Bilan xuân daok mai bak palei mai kiểng Tân Tây

Dom harei ini, di palei mai kanyik Tân Tây, huyện Thạnh Hoá bak sap ndom klao chreih bui. Kayua oh daok huac lac Tết oh pablei hu kayua jit Covid-19, yaok pluh rabau phun mai samar hu doanh nghiệp mbaoh tangin tame harak pambuak bruk blei veik. Meng nan mikva sahanang hatai tuk hu jien tame aval jang.

Karei jang tukvak ini thun blaoh, thun ini sang sa-ai Phạm Văn Mười, urang pala mai kiểng daok di ấp 4, xã Tân Tây, huyện Thạnh Hoá bui sambai jang biak rilo kayua labaih 500 phun mai kanyik yaom labaih 1 tỷ đồng hu 1 doanh nghiệp mbaoh tangin tame harak pambuak bruk blei veik, Duk haong yaok thun, thun ini laba hu rilo jang dua mbang. Urak ini sang sa-ai Mười jeng daok 1.500 phun mai tra daok hu ginum biai ka yaom kaom piah ba tabiak darak pasar dalam dom harei jaik Tết anak tal. Sa-ai Mười brei thau: “Thun blaoh jien mek tame hu 600 tal 700 triệu đồng, thun ini mek tame hu rilo jang dua mbang. Dahlau daih tuk oh ka pala phun mai ye sang takik hu jien. Min meng harei pala saong hu pablei ye raidiuk hu siam jang biak rilo, drei bahrau ngak hu sang bahrau, blei hu tivi, tu la-an, pandap panda dalam sang… raidiuk siam jang dom thun dahlau, nan ye jeng bui sambai jang”.

Tui panuac khan di rilo urang ngak nong, duk saong ngak padai jien mek tame meng 30 tal 40 triệu đồng yaok thun ye pala mai kanyik hu daong ka rilo mikva di huyện Thạnh Hoá salih bahrau rai diuk saong jeng menuac kaya meda. Ong Nguyễn Văn Hoàng, urang pala mai di xã Tân Tây, huyện Thạnh Hoá lac sa dalam dom urang nan. Meng 4.000 phun mai kanyik hu pala meng 2 tal 4 thun, thun ini ba jien tame hu labaih 3,6 tỷ đồng. Jeng yau rilo sang dalam palei, sang ong Hoàng jeng biak bui sambai kayua urak ini dom phun mai pablei tuk Tết ini hu doanh nghiệp mbaoh tangin tame harak pambuak bruk blei veik: “Dahlau daih drei ngak padai 2 vụ hu 4 pluh triệu, urak ini pala mai jien tame hu rilo jang 10 mbang ngak padai. Jien ndo hu, urang ngak nong kaya meda jang biak rilo. Hu labik pablei, thun ini mikva mbang Tết praong ye, bui sambai lo”.

Palei mai kanyik Tân Tây tabiak meng dom baoh sang pala me-in saong pablei sit sot tuk Tết tal, thun bahrau mai. Hadei di jaik 10 thun pataom tame pala  mai kiểng, raidiuk mikva urang ngak nong hu salih bharau mboh di anak meta. Meyah thun 2018 hu labaih 180ha haong dom pluh sang pala, ye urak ini taneh pala mai tagok tal 260 ha haong 50 rabau phun mai saong 300 sang pala mai kiểng. Abih di nyu nan lac, jaik abih urang ngak nong tuk salih phun pala jeng pala hu meng bruk daong di dom urang hu rilo ilamu saong bruk daong phun jien jeng yau ilamu di dom gah chức năng dalam palei. Rilo sang urang ngak nong jeng sang kaya meda hadei di rilo thun tari taring, kak kajap haong phun mai kanyik.

Mai tal Tân Tây dalam dom harei ini mboh bak phun mai hijao jangaih, daok jaik tabiak caduk ba nao pahadah grauk labik. Oh daok mboh bruk urang ngak nong tangin takai gluh baok angaok dom mblang hamu, salih tame nan, lac dom phun mai kanyik ngak brei 1 bhum palei bak prein diukrai, bui sambai hadei di 1 thun kan kandah kayua jit Covid-19. Sa-ai Trần Văn Hẹ, akaok kapul urang ngak nong xã Tân Tây, huyện Thạnh Hoá, tỉnh Long An brei thau: “Tui yaok pataom, jien mek tame di mikva palei mai kanyik hu labaih 70 tỷ đồng. Hu jien yau nan, mikva bui sambai rilo jang, mbang Tết praong jang duk saong rilo thun dahlau”.

Daok labaih 1 bilan tra meng tal Tết Nguyên đán, min bilan xuân daok mai bak palei mai kiểng Tân Tây. Meng bruk cakrok patagok samar drah di bhum pala, labik ini daok jeng palei mai kanyik, rik daong ka bilan xuân gah meraong hadah hadai jang./.

Urang lang: M. Phương – 02/01/2021